وزیراعظم پاکستان اچ گوگل دے مقامی آفس دا افتتاح کر ݙتے

اسلام آباد۔18اگست(اے پی پی)وزیراعظم محمد شہباز شریف پاکستان اچ گوگل دے مقامی آفس دے قیام دا خیرمقدم کریندے اکھیے جو پاکستان ڈیجیٹل ٹرانسفارمیشن دے عمل توں گزردا پئے، نوجواناں کوں جدید ٹیکنالوجی نال آراستہ کر تے ملکی تقدیر بدل سڳدے ہیں۔ انہاں اے ڳالھ گوگل دے مقامی آفس دی افتتاحی تقریب ویلھے خطاب کریندے آکھی۔ ایں موقع تے وفاقی وزیر انفارمیشن ٹیکنالوجی شزا فاطمہ، امریکی ناظم الامور نیٹلے بیکر، گوگل دے نائب صدر ولسن ایل وائٹ اتے اعلیٰ سرکاری حکام موجود ہن۔ وزیراعظم گوگل دی ٹیم دا خیرمقدم کریندے آکھیا جو گوگل دا ناں ڄڳ اچ منیا اتے سنڄاݨیا ویندے، اے گوگل دی ٹیم دا پہلا دورہِ پاکستان اے، پاکستان اچ گوگل کیتے وݙے مواقع موجود ہن، اے ہک وݙے پندھ دی شروعات اے، امید اے جو ساݙی شراکت داری ٻعی ودھسی۔ انہاں اکھیا جو نوجوان ملک دا قیمتی اثاثہ ہین، انہاں کوں جدید ٹیکنالوجی نال آراستہ کیتا ویسی۔ وزیراعظم گوگل دے وفد دے دورہِ پاکستان دا خیرمقدم کریندے آکھیا جو گوگل دی ٹیم اینجھے ویلھے پاکستان آئی اے جݙاں ملک ڈیجیٹل ٹرانسفارمیشن دے عمل توں گزردا پئے، کئی حکومتی و سرکاری شعبیاں اچ ڈیجیٹل ٹرانسفارمیشن تھیندی پئی اے۔ وزیراعظم ایں موقع تے گوگل دے مقامی دفتر دا افتتاح کیتے۔ گوگل دے نائب صدر ولسن ایل وائٹ ملاقات تے وزیراعظم دا شکریہ ادا کریندے آکھیا جو پاکستان آوݨ تے اتھائیں کم کرݨ گوگل کیتے اعزاز اے۔ انہاں حکومت دے 30 ارب ڈالر دی آئی ٹی دی برآمدات دے ہدف دا ݙسیندے آکھیا جو اے گوگل دے وژن نال ہم آہنگ اے، پچھلے ݙاہ سالاں اچ گوگل پاکستان اچ 3.9 ٹریلین روپے دی اکنامک ایکٹیویٹی کیتی اے جیںدے نال 960 ہزار ملازمتاں پیدا تھیاں ہن، گوگل دے مقامی آفس دے قیام نال پاکستان اچ ملازمتاں دے مواقع پیدا تھیسن۔ انہاں پاکستان نال طویل المدت شراکت داری دا عزم کریندے آکھیا جو حکومتِ پاکستان دے ڈیجیٹل ٹیکنالوجی کیتے اقدامات کوں ٻیا ودھاوݨ دی لوڑھ اے۔ انہاں وزیراعظم کوں گوگل دے اہداف اتے مقاصد دا وی ݙسایا۔