انسانی ہمدردی متاثرین دے وقار، تحفظ تے انصاف کوں یقینی بݨاوݨ دا تقاضا کریندی اے: اعظم نذیر تارڑ

اسلام آباد۔19اگست (اے پی پی) وفاقی وزیر برائے قانون تے انصاف و انسانی حقوق سینیٹر اعظم نذیر تارڑ انسانی ہمدردی دے عالمی ݙینہہ دے موقع تے دنیا بھر دے امدادی کارکنان کوں خراجِ تحسین پیش کریندیں ہوئیں آکھیا جو مشکل تے خطرناک حالات وچ امدادی کارکنان دیاں خدمات قابلِ تحسین ہن، جو انسانیت، ہمدردی تے بے لوث خدمت دی روشن مثال ہن، انسانی ہمدردی صرف فوری امداد دا نام نئی بلکہ متاثرین دے وقار، تحفظ تے انصاف کوں یقینی بݨاوݨ دا تقاضا وی کریندی اے۔ انسانی ہمدردی دے عالمی ݙینہہ دے موقع تے آپݨے سنیھے وچ وفاقی وزیر آکھیا جو قدرتی آفات تے بحراناں دے دوران امدادی کارکنان دا کردار انتہائی قابلِ قدر اے، انسانی ہمدردی تے احترامِ انسانیت اساݙی مشترکہ اخلاقی ذمہ واری اے، بحراناں دے دوران متاثرہ افراد دے بنیادی حقوق دا تحفظ یقینی بݨاوݨ ضروری اے۔ انہاں اکھیا جو خواتین، ٻالاں، معذور افراد تے ٻئے کمزور طبقات دا تحفظ ترجیح ہووݨی چاہیدی اے، جݙاں جو ہنگامی حالات وچ ریاست کوں متاثرہ افراد کوں بلاامتیاز تحفظ فراہم کرݨا پوسی، انسانی ہمدردی صرف فوری امداد دا ناں نئی بلکہ متاثرین دے وقار، تحفظ تے انصاف کوں یقینی بݨاوݨ دا تقاضا وی کریندی اے۔ اعظم نذیر تارڑ آکھیا جو ریاستی ادارے، سول سوسائٹی، طبی عملے تے رضاکاراں دی خدمات قابلِ تحسین ہن، بحراناں وچ کوئی فرد بے یارومددگار نہ راہوے، اے اساں ساریاں دی اجتماعی ذمہ واری اے۔ وفاقی وزیر آکھیا جو پاکستان انسانی حقوق، احترامِ انسانیت تے قانون دی حکمرانی دے اصولاں تے قائم اے۔