آسان ٹیکس ایپ دا اجرا، تاجراں دی دیرینہ خواہش پوری کر ݙتی ڳئی: وفاقی وزیرِ خزانہ

اسلام آباد۔19اگست (اے پی پی) وفاقی وزیرِ خزانہ سینیٹر محمد اورنگزیب آکھیا جو پاکستان دے ٹیکس نظام توں کہیں وی طبقے کوں باہر نئی رکھیا ونڄ سڳدا، حکومت دا مقصد تمام کاروباری طبقات کوں قومی ٹیکس دائرے اچ گھن آوݨ تے ٹیکس نظام کوں آسان، شفاف تے کاروبار دوست بݨاوݨ اے، چھوٹے دکانداراں تے تاجراں کیتے متعارف کروائی ڳئی آسان ٹیکس سکیم ایں مقصد آلے پاسے اہم قدم اے۔ اے ڳالھیں انہاں بدھ کوں تاجراں تے کاروباری افراد کیتے آسان ٹیکس ایپ دے اجراء دی تقریب دے موقع تے وزیرِ مملکت برائے خزانہ بلال اظہر کیانی، چیئرمین ایف بی آر راشد محمود لنگڑیال، ممبر ایف بی آر حامد عتیق تے تاجر رہنماواں دے نال پریس کانفرنس کریندیں ہوئیں کیتا۔ وزیرِ خزانہ اکھیا جو تاجراں دی دیرینہ خواہش رہی اے جو ٹیکس سکیم کوں سوکھا اتے قابلِ عمل بݨایا ونڄے، ایں کیتے حکومت موجودہ سکیم وچ طریقہ کار کوں انتہائی سادہ رکھیے۔ انہاں اکھیا جو کوئی وی طبقہ اگر قومی دھارے وچ شامل نہ ہووے تاں ٹیکس نظام موثر انداز وچ نہیں چل سڳدا، حکومت چاہندی اے جو چھوٹے دکاندار تے تاجر پیچیدہ طریقہ کار دے بجائے ہک سادہ نظام دے تحت آپݨی ٹیکس ذمہ واریاں پوریاں کرن اتے غیر ضروری مشکلاں توں محفوظ رہن۔ محمد اورنگزیب اکھیا جو تاجر آپݨی کاروباری نوعیت تے ضرورت دے مطابق ریگولر ٹیکس سکیم یا خصوصی ٹیکس سکیم وچ شامل تھی سڳدن، حکومت دا مقصد ٹیکس دی شرح وچ غیر ضروری اضافہ کرݨ دے بجائے ٹیکس نیٹ کوں وسعت ݙیوݨ اتے ودھ توں ودھ افراد کوں قومی مالیاتی نظام دا حصہ بݨاوݨ اے۔ وزیرِ خزانہ اکھیا جو اگر حکومت ہر طبقے تے ہر علاقے کوں ٹیکس نظام دا حصہ بݨاوݨ اے تاں ضروری اے جو حکام خود کاروباری برادری دے درمیان ونڄن، انہاں دے مسائل سنن تے جہاں ممکن ہووے اتھائیں انہاں دے حل کیتے اقدامات کرن۔ وزیرِ مملکت برائے خزانہ بلال اظہر کیانی اکھیا جو آسان ٹیکس سکیم دے تحت ایپ وچ رجسٹرڈ دکانداراں دی سیل تے ہک فیصد ٹیکس عائد ہوسی جݙاں جو ایپ انہاں تاجراں کیتے وی دستیاب اے جو اڄاں تئیں ٹیکس نیٹ وچ شامل نہیں تھئے۔ انہاں آکھیا جو پہلے توں ٹیکس نظام وچ موجود دکاندار وی ایں ایپ دے ذریعے سکیم وچ شامل تھی سڳدن، ایپ دے ذریعے ٹیکس دی ادائیگی تے چھوٹے دکانداراں کوں رجسٹریشن پلیٹ حاصل کرݨ دی سہولت وی فراہم کیتی ویسی۔ بلال اظہر کیانی ݙسیا جو مقررہ تاریخ توں پہلے رجسٹریشن کرواوݨ آلے دکانداراں کوں پلیٹ مفت فراہم کیتی ویسی جݙاں جو مقررہ تاریخ دے بعد رجسٹریشن کرواوݨ آلیاں کوں پلیٹ دی قیمت ادا کرݨی پوسی۔  ایپ کوں ستمبر تئیں ٻیاں مقامی زباناں وچ وی متعارف کروا ݙتا ویسی۔ چیئرمین ایف بی آر راشد محمود لنگڑیال آکھیا جو آسان ٹیکس سکیم دے تحت تاجراں کوں مکمل تحفظ فراہم کیتا ڳئے، پلیٹ فارم ایں ڳالھ دی ضمانت ہوسی جو ایف بی آر دا کوئی افسر دکاندار دی دکان تے نہ ویسی۔ انہاں آکھیا جو حکومت دا مقصد ایہوجہا ٹیکس نظام متعارف کرواوݨ اے جئیں وچ دکانداراں کوں غیر ضروری انتظامی پیچیدگیاں تے افسراں دے براہِ راست رابطے توں محفوظ رکھیا ونڄ سڳے۔