گوگل پاکستان اچ ٹیکنالوجی دے شعبے اندر نویں ٹیلنٹ کوں تکڑا بݨیسی تے مقامی ٹیکنالوجی ایکو سسٹم کوں مضبوط کریسی، شزہ فاطمہ خواجہ

اسلام آباد۔19اگست (اے پی پی) وفاقی وزیرانفارمیشن ٹیکنالوجی و ٹیلی کمیونیکیشن شزہ فاطمہ خواجہ آکھیے جو پاکستان وچ گوگل دے پہلے دفتر دا قیام ملک وچ ٹیکنالوجی دے شعبے کیتے نویں ٹیلنٹ کوں تکڑا بݨاوݨ تے مقامی ٹیکنالوجی ایکو سسٹم کوں مزید معاونت ݙیوݨ وچ اہم کردار ادا کریسی، آئی ٹی برآمدات گزریل ڈھائی سالاں دے دوران مسلسل تقریباً 20 فیصد دی شرح نال ودھدیاں پئن جیڑھی نجی شعبے وچ ترقی ظاہر کریندی اے۔اے ڳالھ انہاں پریس کانفرنس توں خطاب کریندے آکھی۔ انہاں امید ظاہر کیتی جو گوگل دا دفتر پاکستان دے ٹیک ٹیلنٹ کوں ودھارا ݙیوݨ، عالمی ٹیکنالوجی شعبے تے مقامی ٹیکنالوجی ایکو سسٹم ݙوہیں کوں تکڑا بݨاوݨ وچ معاون ثابت ہوسی۔شزہ فاطمہ خواجہ آکھیا جو وزیراعظم محمد شہباز شریف گزریل ݙو سالاں دے دوران ڈیجیٹل تبدیلی دے ایجنڈے دی ذاتی طور تے قیادت کیتی تے ’’ڈیجیٹل نیشن پاکستان‘‘ اقدام دے ذریعے ایں حوالے نال واضح روڈ میپ ݙتا۔ انہاں آکھیا جو گزریل ݙو سالاں دے دوران وفاقی حکومت دی ڈیجیٹلائزیشن، ایف بی آر تے ریونیو دے شعبے وچ اصلاحات، ڈیجیٹل معیشت، کیش لیس ادائیگیاں تے ڈیجیٹل گورننس وچ نمایاں پیشرفت تھئی۔ وفاقی وزیرآکھیا جو پاکستان دی آئی ٹی برآمدات گزریل ڈھائی سالاں دے دوران مسلسل تقریباً 20 فیصد دی شرح نال ودھدیاں پئن جیڑھی نجی شعبے وچ ترقی ظاہر کریندی اے۔انہاں آکھیا جو ملک دی فری لانسنگ معیشت وی اڄوکے سال ہک ارب ڈالر توں تجاوز کر چکی اے، انھاں پیش رفتاں توں عالمی برادری دا پاکستان تے اعتماد ودھ ڳئے۔ انہاں ٹیکنالوجی دی صنعت کیتے وزیراعظم محمد شہباز شریف دی ذاتی قیادت، عزم تے تعاون دی تعریف کیتی۔ شزہ فاطمہ آکھیا جو بجٹ وچ آئی ٹی صنعت کوں خصوصی مراعات ݙتیاں ڳئن جنہاں وچ برآمدات کیتے فائنل ٹیکس رجیم تے برآمدات تے 0.25 فیصد ٹیکس دا نفاذ شامل اے۔ وفاقی وزیر آکھیا جو پاکستان وچ تقریباً 3 لکھ 50 ہزار گوگل سرٹیفیکیشنز مکمل کیتے ونڄ چکئن، حکومت ایں ویلھے گوگل دے تعاون نال 3 ہزار سرکاری افسراں کیتے سرٹیفیکیشن پروگرامز تے وی کم کریندی پئی اے۔ انہاں آکھیا جو گوگل ڈویلپرز گروپ دے نال رل تے شروع کیتے ڳئے ’’اے آئی سکھو‘‘ پروگرام وچ 17 ہزار توں ودھ ٹیماں حصہ ڳھدا جنہاں وچ تریمتاں دی شرکت 25 فیصد رہی۔ انہاں آکھیا جو تقریباً 50 ہزار ڈویلپرز کوں گیمنگ تے اینیمیشن دے شعبے وچ تربیت ݙتی ڳئی جݙاں جو ‘‘Think Apps’’ تے ‘‘App Design Master Classes’’ دے ذریعے تقریباً 120 کمپنیاں کوں گیمنگ تے ڈیزائن دے شعبیں وچ تربیت ݙتی ڳئی۔ وفاقی وزیر آکھیا جو گزریل سال پاکستان وچ کروم بک دی اسمبلی لائن دا وی افتتاح کیتا ڳیا ہئی، گوگل کروم بکس ہݨ مقامی سطح تے اسمبل کیتے ویندے پئن تے حکومت مستقبل وچ ان دی برآمد دے امکانات وی تلاش کریسی۔ انہاں صحافت تے سائبر سکیورٹی دے شعبیں وچ تربیت ݙیوݨ آلے اقدامات کوں وی اجاگر کیتا۔