وفاقی وزیرِ صحت دی صدارت اچ جوائنٹ ورکنگ گروپ دا اجلاس، انسدادِ ایچ آئی وی پروگرام تے عملدرآمد، نگرانی دے نظام تے جاری اقدامات دا جائزہ

اسلام آباد۔19اگست (اے پی پی) وفاقی وزیرِ صحت مصطفیٰ کمال دی زیرِ صدارت وزارتِ صحت وچ ایچ آئی وی/ایڈز متعلق جوائنٹ ورکنگ گروپ دا اجلاس منعقد تھیا جیں وچ ملک وچ ایچ آئی وی دی مجموعی صورتحال، انسدادِ ایچ آئی وی پروگرام تے عملدرآمد، نگرانی دے نظام تے مختلف صوبیں وچ جاری اقدامات دا تفصیلی جائزہ ڳھدا ڳیا۔ اجلاس وچ ڈیجیٹل ڈیٹا، صوبائی اقدامات تے گلوبل فنڈ دے تعاون نال جاری سرگرمیاں دا جائزہ ڳھدا ڳیا۔ وزیراعظم ٹاسک فورس تے ٻئے مجاز فورمز دی طرفوں منظور شدہ سفارشات تے اقدامات تے پیشرفت وی زیرِغور آئی۔اجلاس وچ انجکشن سیفٹی، بلڈ سیفٹی، انفیکشن پریوینشن اینڈ کنٹرول، عوامی آگاہی، ایچ آئی وی وائرل لوڈ ٹیسٹنگ، نگرانی دے نظام، ڈیجیٹل ڈیٹا مینجمنٹ، بارڈر سکریننگ تے وزیراعظم ٹاسک فورس دیاں سفارشات تے عملدرآمد دا وی جائزہ ڳھدا ڳیا۔ وفاقی وزیرِ صحت مصطفیٰ کمال ہدایت کیتی جو ملک وچ ہر وݙے یا معمولی آپریشن تے چمڑی کوں چیرݨ یا چھیدݨ آلے طبی عمل توں پہلے ایچ آئی وی سکریننگ لازمی طور تے یقینی بݨائی ونڄے۔ انہاں آکھیا جو صحت دیاں سہولتاں وچ ایچ آئی وی دی منتقلی دے خطرات کوں مزید گھٹ کیتا ونڄے، سندھ، پنجاب تے اسلام آباد کیپٹل ٹیریٹری وچ معمولی تے وݙے جراحی طریقہ کار توں پہلے ایچ آئی وی سکریننگ پہلے ہی کیتی ویندی پئی اے۔ وفاقی وزیرِ صحت ہدایت کیتی جو بلوچستان، خیبرپختونخوا تے گلگت بلتستان دے متعلقہ حکام سرجری توں پہلے ایچ آئی وی سکریننگ دے نفاذ کیتے ضروری نوٹیفکیشن جاری کرن۔اجلاس وچ ایڈیشنل سیکرٹری وزارتِ صحت میجرجنرل (ر) اظہر محمود کیانی، گلوبل فنڈ دے ہیڈ آف گرانٹ مینجمنٹ، گلوبل فنڈ کنٹری ٹیم دی نمائندہ، ڈبلیو ایچ او، UNAIDS، یونیسف تے یو این ڈی پی دے کنٹری نمائندگان جݙاں جو پنجاب، سندھ، خیبرپختونخوا، بلوچستان، آزاد جموں و کشمیر تے گلگت بلتستان دے محکمہ صحت دے سیکرٹریز شریک تھئے۔