سکیورٹی فورسز دی بلوچستان وچ فتنہ الہندوستان دے خلاف کامیاب کارروائیاں، 5 دہشت گرد جہنم واصل

اسلام آباد۔20اگست (اے پی پی) سکیورٹی فورسز دی بلوچستان وچ آپریشن ردالفتنہ 3 دے تحت فتنہ الہندوستان دے خلاف کامیاب کارروائیاں جاری ہن، سکیورٹی فورسز آپریشن دے دوران فتنہ الہندوستان دے 5 دہشت گرداں کوں جہنم واصل کر ݙتا جݙاں جو ٻہوں زخمی وی تھئن۔ سکیورٹی ذرائع موجب سکیورٹی فورسزآپریشن ردالفتنہ 3 دے تحت پنجگور کلی سوران وچ کامیاب انٹیلی جنس بیسڈ آپریشن کیتا جیں دے دوران سکیورٹی فورسز فتنہ الہندوستان دے 5 دہشت گرداں کوں جہنم واصل کرݙتا۔ کارروائی دے دوران ٻہوں سارے دہشت گرد زخمی تھئے۔ مارئے ونڄݨ آلے دہشت گرد موٹر سائیکلاں تے سوار تھی تے دہشت گردی دی وݙی کارروائی انجام ݙیوݨ ویندے پئے ہن۔سکیورٹی ذرائع دا آکھݨ اے جو کارروائی دے دوران جدید ٹیکنالوجی تے ہتھیاراں دے استعمال نال دہشت گرداں کوں کامیابی نال نشانہ بݨایا ڳئے۔ ہلاک تھیوݨ آلے دہشت گرداں توں باری مقدار وچ جدید اسلحہ تے گولہ بارود برآمد کر ڳھدا ڳئے، دہشت گرداں توں 3 گاݙیاں، 2 موٹرسائیکلاں، آئی ای ڈی ڈیوائس سودھے کالعدم تنظیم داجھنڈا وی برآمد تھیا۔ سکیورٹی ذرائع موجب ہلاک دہشت گرد مقامی لوکاں دی لٹ مار، بھتہ خوری، اغوا برائے تاوان، ٹارگٹ کلنگ تے خودکش حملیں دی منصوبہ بندی وچ ملوث ہن۔ سکیورٹی ذرائع آکھیے جو سکیورٹی فورسز بلوچستان توں دہشت گردی دے خاتمے کیتے پرعزم ہن تے چھیکڑی دہشت گرد دے خاتمے تئیں کارروائیاں جاری رہسن۔