وزیرِاعظم دی زیرِصدارت وفاقی کابینہ دا اجلاس، نیشنل ایڈولیسینٹ اینڈ یوتھ پالیسی دی منظوری ݙے ݙتی

اسلام آباد۔20اگست (اے پی پی) وفاقی کابینہ وزارتِ بین الصوبائی رابطہ دی سفارش تے نیشنل ایڈولیسینٹ اینڈ یوتھ پالیسی دی اصولی منظوری ݙے ݙتی اے جیں دے تحت نوجواناں کوں مرکزی دھارے وچ گھن آیا ویسے۔ وزیرِاعظم محمد شہباز شریف دی زیرِصدارت وفاقی کابینہ دا اجلاس تھیا ۔ وزیراعظم دفتر دے میڈیا ونگ توں جاری بیان موجب اجلاس وچ وفاقی کابینہ وزارتِ بین الصوبائی رابطہ دی سفارش تے نیشنل ایڈولیسینٹ اینڈ یوتھ پالیسی دی اصولی منظوری ݙے ݙتی۔ اے پالیسی پاکستان دی نوجوان آبادی کوں بااختیار بݨاوݨ کیتے ھک مربوط قومی فریم ورک بݨاوݨ دے حوالے نال ھک اہم پیشرفت اے۔ایں پالیسی دے تحت حکومت دی سطح تے نوجوان آبادی کوں مرکزی دھارے وچ گھن آیا ویسے جیڑھا جو نوجواناں کوں ھکو سویں تے بہتر معاشی و معاشرتی ماحول ݙیوݨ یقینی بݨاوݨ دے حوالے نال ھک اہم سنگِ میل ثابت تھیسی۔ ایں پالیسی قومی فریم ورک دے چار بنیادی ستوناں وچ تعلیم، روزگار، شمولیت تے ماحولیات شامل ہن۔ ایں پالیسی دے نفاذ دے حوالے نال پاکستان یوتھ ڈویلپمنٹ کونسل تے فیڈرل ایڈولیسینٹ اینڈ یوتھ ایجنسی دا قیام عمل وچ گھن آیا ویندا پئے۔اجلاس کوں ݙسایا ڳیا جو ایں پالیسی دی تشکیل دے حوالے نال ملک وچ 32 ہزار 145 سروے کیتے ڳئن تے ایں حوالے نال 2 لکھ توں ودھ نوجواناں دی صلاح ڳھدی ڳئی۔ وزیرِاعظم ہدایت کیتی جو مذکورہ پالیسی دے حوالے نال کابینہ ارکان دیاں تجویزاں کوں پالیسی دا حصہ بݨایا ونڄے۔ وفاقی کابینہ، کابینہ کمیٹی ریاستی ملکیتی ادارہ جات دے 9 جولائی 2026ء کوں تھئے اجلاس وچ ڳھدے ڳئے فیصلیں دی توثیق کرݙتی۔ وفاقی کابینہ اقتصادی رابطہ کمیٹی دے 14 اگست 2026ء تے کابینہ کمیٹی لیجسلیٹو کیسز دے 18 جون 2026ء، 30 جولائی 2026ء، 5 اگست 2026ء تے 18 اگست 2026ء دے اجلاساں وچ کیتے ڳئے فیصلیں دی توثیق وی کیتی۔