قومی اسمبلی پاکستان دفاعی افواج ایکٹ 2026ء دی منظوری ݙے ݙتی

اسلام آباد۔20اگست(اے پی پی)قومی اسمبلی پاکستان دفاعی افواج ایکٹ 2026ء دی منظوری ݙے ݙتی اے جیڑھی 13 نومبر 2025ء توں موثر باعمل سمجھی ویسی۔ قومی اسمبلی اچ وزیرِ دفاع خواجہ محمد آصف ایوان اچ اے بل پیش کیتا۔ ایں موقع تے بل دی ایوان توں سپیکر شق وار منظوری ڳھدی جیںدے بعد خواجہ محمد آصف بل منظوری کیتے پیش کیتا جیکوں کثرتِ رائے نال منظور کر گھدا ڳیا۔ ایں بل دے مطابق اے ایکٹ ٻئے قوانین تے غالب ہوسی، ایں ایکٹ دے احکام، وضع کیتے ڳئے قواعد و ضوابط اتے ایںدے تحت جاری کیتے ڳئے ہدایات اتے احکام، اعلامیے اتے ٻئے کہیں وی قانون، قواعد و ضوابط، ہدایات، اعلامیاں یا احکام دے برعکس ہووݨ دے باوجود نافذ العمل راہسن اتے مذکورہ قوانین، قواعد، ضابطے، ہدایات، اعلامیے اتے احکام ایں حد تک غیر موثر تھی ویسن جیکر او ایںدے منافی ہوون۔ مذکورہ بالا دی عمومیت کوں نقصان پچائے بغیر افواجِ پاکستان ایکٹ 1952ء، پاکستان فضائیہ ایکٹ 1953ء، بحری افواجِ پاکستان آرڈیننس 1976ء، کنٹونمنٹس ایکٹ 1924ء یا ٻیا کوئی قانون جیڑھا مسلح افواج دے اراکین بارے ہووے، اینڄھے طریقہ کار اچ تعبیر نا کیتا ویسی جیڑھا ایں ایکٹ دے احکام دے منافی ہووے۔ ایں بل دے تحت دفاعی افواج دا ایک ہیڈکوارٹر قائم کیتا ویسی جیڑھا مسلح افواج دا ہیڈ کوارٹر ہوسی، دفاعی افواج دا ہیڈ کوارٹر، چیف آف ڈیفنس فورسز دی کمان اتے اختیار دے تحت کارہائے منصبی انجام ݙیسی جیڑھا قومی سلامتی، دفاع اتے مسلح افواج دے سارے معملیاں بارے وزیرِ اعظم دا اعلیٰ فوجی مشیر ہوسی۔ چیف آف ڈیفنس فورسز کوں مسلح افواج دی عملی کمانڈ اتے کنٹرول دا اختیار ہوسی اتے او مذکورہ کمانڈ اتے کنٹرول دے ضمن اچ متعلقہ جملہ امور کیتے وفاقی حکومت کوں جوابدہ ہوسی۔ ایں بل دے تحت چیف آف ڈیفنس فورسز اینڄھے اختیارات استعمال کریسی اتے کردار نٻھیسی جیڑھا کثیر الجہتی انضمام، عملی آہنگی، رابطہ کاری اتے سارے مشترکہ امور دی نگرانی کیتے ضروری ہوون، جیندے اچ مسلح افواج اتے پاکستان دی قومی سلامتی تریے افواج کیتے اتے تزویراتی مضمرات ہوون۔ چیف آف ڈیفنس فورسز مسلح افواج بارے قانوناں دے مطابق کہیں بندے جیڑھا آئین دے آرٹیکل 243 دے تحت تقرر کیتے ڳئے اشخاص دے علاوہ ہووے، کوں ملازمت توں ریٹائر، فارغ یا سبکدوش کر سڳسی یا ایںدے استعفے کوں منظور یا مسترد کر سڳسی یا ایکوں ملازمت اچ برقرار رکھ سڳسی یا کہیں بندے دی ریٹائرمنٹ دی عمر یا ملازمت دی مدت دی حد اچ کمی کر سڳسی۔ مذکورہ بالا اختیارات دی عمومیت توں متناقص تھئے بغیر چیف آف ڈیفنس فورسز اینڄھے ٻئے اختیارات استعمال کر سڳسی اتے اینڄھے ٻئے فرائضِ منصبی انجام ݙے سڳسی جیندی وفاقی حکومت صراحت کرے۔ قانون دے مطابق وفاقی حکومت وقتاً فوقتاً ایں ایکٹ دے احکام کوں موثر بݨاوݨ سانڳے قواعد و ضوابط وضع کر سڳسی۔ چیف آف ڈیفنس فورسز وقتاً فوقتاً ایں ایکٹ دے احکام تے ایںدے تحت وضع کیتے ڳئے قواعد و ضوابط کوں موثر بݨاوݨ کیتے ہدایات اتے احکامات ݙے سڳسی۔ ایکٹ دے مطابق ڄیکر ایں ایکٹ کوں موثر ٻݨاوݨ اچ کوئی اوکھ ہووے یا فی الوقت نافذ العمل کہیں وی ٻئے قانون اتے ایں ایکٹ وچال کوئی عدم مطابقت ختم کرݨی ضروری ہووے تاں صدرِ مملکت حکم دے ذریعے اینڄھی رکاوٹ یا اوکھ دا ازالہ کر سڳسن۔ ایں ایکٹ دے نفاذ توں پہلے ٻݨائے ڳئے یا جاری کیتے ڳئے کوئی وی قواعد، ضوابط، ہدایات، اعلامیے، احکام جتھو تئیں او ایں ایکٹ دے احکام توں متناقص نہ ہوون او بدستور نافذ العمل راہسن۔ او قانونی طور تے وضع، جاری یا گھدے ڳئے متصور تھیسن اتے 13 نومبر 2025ء توں موثر ہوسن۔