صدرِ مملکت دا کیٹی بندر پورٹ دی ترقی کیتے مربوط حکمتِ عملی تے زور، منصوبے کوں ضروری سہولتاں نال منسلک کیتا ونڄݨا چاہیدے: آصف علی زرداری

اسلام آباد۔24اگست (اے پی پی) صدرِ مملکت آصف علی زرداری کیٹی بندر پورٹ دی ترقی کیتے مربوط حکمتِ عملی اختیار کرݨ تے زور ݙیندیں ہوئیں آکھیا جو منصوبے کوں قابلِ اعتماد سڑکاں دے رابطے، بجلی تے پاݨی دی فراہمی، صنعتی بنیادی ڈھانچے تے ٻیاں ضروری سہولتاں نال منسلک کیتا ونڄݨا چاہیدے۔ سنوار کوں ایوانِ صدر دے پریس ونگ توں جاری بیان دے مطابق صدرِ مملکت اے ڳالھیں چائنا ہاربر انجینئرنگ کمپنی (سی ایچ ای سی) ولوں کیٹی بندر پورٹ دی مجوزہ ترقی دے حوالے نال ݙتی ڳئی بریفنگ دے دوران کیتا۔ انہاں چینی وفد دا خیرمقدم کریندیں ہوئیں پاکستان دے بنیادی ڈھانچے تے بحری ترقی اچ تعاون کیتے چین دی مسلسل دلچسپی کوں سراہیا۔ صدرِ مملکت آکھیا جو کیٹی بندر اچ ہک اضافی بحری گیٹ وے دے طور تے نمایاں صلاحیت موجود اے جو پاکستان دے پورٹ تے لاجسٹکس نیٹ ورک کوں مضبوط بݨاوݨ، رابطہ کاری تے تجارت کوں فروغ ݙیوݨ اچ معاون ثابت تھی سڳدی اے۔ انہاں چینی فریق تے متعلقہ پاکستانی اداریاں وچال قریبی تکنیکی رابطہ کاری دی لوڑھ تے زور ݙتا۔ انہاں ایں ڳالھ تے وی زور ݙتا جو ماحولیاتی پائیداری کوں بنیادی اہمیت حاصل ہووݨی چاہیدی اے بالخصوص دریائے سندھ دے ڈیلٹا دے نازک ماحولیاتی نظام دے تحفظ تے مقامی ماہی گیر برادریاں دے مفادات تے روزگار کوں مدِنظر رکھیا ونڄے۔ صدرِ مملکت ماسٹر پلان کوں ٻیا بہتر بݨاوݨ تے ایں تے عملدرآمد تے مالی معاونت دے مناسب طریقہ کار دی نشاندہی کیتے مسلسل تکنیکی مشاورت دی حوصلہ افزائی کیتی۔ چینی وفد کیٹی بندر پورٹ دے تصوراتی ماسٹر پلان تے بریفنگ ݙتی جئیں اچ متعدد ٹرمینلز، لاجسٹکس تے معاون بنیادی ڈھانچے دے نال ہک نویں ڈیپ واٹر میری ٹائم گیٹ وے دا تصور پیش کیتا ڳئے۔ پہلے مرحلے اچ 500 میٹر طویل کوے تے مشتمل کثیر المقاصد ٹرمینل شامل اے جݙاں جو ابتدائی انجینئرنگ لاگت دا تخمینہ تقریباً 522.34 ملین امریکی ڈالر لاتا ڳئے۔ چینی وفد اچ پاکستان وچ سی ایچ ای سی دے چیف نمائندے وو پنگ، مارکیٹنگ ڈیپارٹمنٹ دے سربراہ وانگ زونگ ڈے تے انجینئر شو تیے لِن دے علاوہ سٹریٹجی اینڈ مارکیٹنگ دے جنرل منیجر علی رضا شامل ہن۔ اجلاس اچ وزیراعلیٰ سندھ سید مراد علی شاہ، سینیٹرز سلیم مانڈوی والا تے شیری رحمان، سندھ دے وزیر برائے توانائی، منصوبہ بندی تے ترقی ناصر حسین شاہ، وزیراعلیٰ سندھ دے سرمایہ کاری تے پبلک پرائیویٹ پارٹنرشپ کیتے معاونِ خصوصی سید قاسم نوید قمر تے چیف سیکرٹری سندھ سید آصف حیدر شاہ وی شرکت کیتی۔