نبی کریم ﷺ دی سیرتِ طیبہ اساݙے کیتے مکمل ضابطہ حیات اے، انہاں دی پوری زندگی رحمت، محبت، عدل، برداشت، عفو و درگزر تے حسنِ اخلاق دا عملی نمونہ اے، سردار محمد یوسف

اسلام آباد۔26اگست (اے پی پی) وفاقی وزیر مذہبی امور سردار محمد یوسف آکھیا جو نبی کریم ﷺ دی سیرتِ طیبہ اساݙے کیتے مکمل ضابطہ حیات اے، انہاں دی پوری زندگی رحمت، محبت، عدل، برداشت، عفو و درگزر تے حسنِ اخلاق دا عملی نمونہ اے، اج اساݙی نوجوان نسل ایجھے دور توں گزردی پئی اے جتھاں اونکوں مختلف فکری، اخلاقی، معاشرتی تے ڈیجیٹل چیلنجز دا سامݨا اے، سوشل میڈیا، بے مقصد مواد، عدم برداشت، مادہ پرستی تے مختلف منفی رجحانات اساݙی نویں نسل دی شخصیت تے سوچ تے اثر انداز تھیندے پئن، سیرتِ طیبہﷺ ایجھے ماحول اچ اساݙے نوجواناں کیتے سب توں بہترین رہنمائی فراہم کریندی اے، اڄ دے ݙینہہ اساکوں اے عہد کرݨا چاہیدے جو اساں آپݨی زندگیاں کوں اسوہِ رسولﷺ دے مطابق ڈھالݨ دی بھرپور کوشش کریسوں۔ او بدھ کوں کنونشن سنٹر اسلام آباد اچ وزارتِ مذہبی امور ولوں میلاد النبیﷺ دی مناسبت نال بین الاقوامی سیرت النبیﷺ کانفرنس توں خطاب کریندے پئے ہن جیندا موضوع ’’نسل نو دا تحفظ، تعمیر تے کردار سیرت النبیﷺ دی روشنی اچ‘‘ ہئی۔ ایں موقع تے ملک بھر توں معروف نعت خواں حضرات ہدیہِ نعت پیش کیتا۔ وفاقی وزیر مذہبی امور خطبہِ استقبالیہ پیش کریندیں ہوئیں آکھیا جو ایں پرنور محفل اچ شرکاء دا شکریہ ادا کریندن، ربیع الاول مسلماناں کیتے مبارک مہینہ ہے، ایں ماہِ مبارک اچ حضور سرورِ کائنات دی ولادت تھئی، ہر سال وزارت ولوں سیرت النبی کانفرنس دا انعقاد کیتا ویندے جو ایں ماہِ مبارک دی اہمیت کوں اجاگر کرݨ دی ہک کاوش اے۔