وزیرِ اعظم نال سعودی وفد دی ملاقات، پراݨے تعلقات کوں مضبوط تجارتی تے سرمایہ کاری شراکت اچ تبدیل کریسوں، محمد شہباز شریف

اسلام آباد۔28اگست (اے پی پی) وزیرِ اعظم محمد شہباز شریف پاکستان تے سعودی عرب وچال برادرانہ تعلقات کوں اجاگر کریندیں ہوئیں آکھیا جو ݙوہیں ملک تزویراتی شراکت دار ہن، دیرینہ تعلقات کوں مضبوط تجارتی تے سرمایہ کاری شراکت اچ تبدیل کریسوں، مکہ مکرمہ مشترکہ دفاعی معاہدے نال پاکستان، سعودی عرب تے ترکیہ ٻیا نیڑے آڳئن، معاہدے پورے خطے اچ اتحاد تے امن دا سنیھا ݙتے۔ اے ڳالھیں انہاں سعودی عرب دے وزیرِ ماحولیات، پاݨی تے زراعت انجینئر عبدالرحمٰن بن عبدالمحسن الفضلی نال ڳالھ مہاڑ اچ کیتا جنھاں جمعے کوں اتھاں پی ایم ہاؤس اچ انہاں نال ملاقات کیتی۔ پی ایم آفس دے میڈیا ونگ دے مطابق وزیرِ اعظم سعودی وزیر تے انہاں دے وفد دا خیرمقدم کریندیں ہوئیں آکھیا جو ݙوہائیں ملکاں وچال برادرانہ تعلقات قائم ہن۔ انہاں خادم الحرمین الشریفین شاہ سلمان بن عبدالعزیز آل سعود تے ولی عہد شہزادہ محمد بن سلمان بن عبدالعزیز آل سعود کیتے نیک تمناواں دا اظہار کریندیں ہوئیں اکھیا جو سعودی عرب، ترکیہ تے پاکستان وچال حال اچ طے تھیوݨ آلے مکہ مشترکہ دفاعی معاہدے نال ترائیں ملک ٻئے نیڑے آڳئن وزیرِ اعظم ݙوہائیں ممالک وچال خصوصاً پاکستان توں سعودی عرب کوں زرعی مصنوعات دی برآمد دے حوالے نال جاری مثبت تعاون تے اطمینان دا اظہار کیتا۔ ملاقات اچ پاکستان اچ زرعی پیداوار ودھاوݨ کیتے ٹیکنالوجی، تحقیق تے ترقی تے پاݨی دے وسائل دے زیادہ مؤثر استعمال دے ذریعے تعاون ودھاوݨ تے وی ڳالھ مہاڑ تھئی۔ سعودی وزیر پرُتپاک استقبال تے مہمان نوازی تے وزیرِ اعظم دا شکریہ ادا کیتا۔ انہاں زراعت، پاݨی تے غذائی تحفظ دے شعبیاں اچ پاکستان دے نال تعاون ٻیا ودھاوݨ دے سعودی عرب دے عزم دا اعادہ کیتا۔ ملاقات اچ وفاقی وزراء رانا تنویر حسین، محمد اورنگزیب، عطاء تارڑ، جام کمال خان، ڈاکٹر مصدق ملک، جنید انوار چوہدری، بلال اظہر کیانی، وزیرِ اعظم دے معاونِ خصوصی طارق فاطمی تے ڈاکٹر سید توقیر شاہ سمیت ٻئے اعلیٰ حکام شرکت کیتی۔