نجی شعبے کوں کاروباری سرگرمیاں، جدت تے مسابقتی سرمایہ کاری اچ قائدانہ کردار ادا کرݨا ہوسی، احسن اقبال دی ہارورڈ بزنس سکول دے طلبہ نال ملاقات اچ ڳالھ مہاڑ

اسلام آباد۔28اگست (اے پی پی) وفاقی وزیرمنصوبہ بندی، ترقی و خصوصی اقدامات احسن اقبال آکھیے جو پاکستان کوں معاشی استحکام، پائیدار اقتصادی ترقی، پیداواریت اچ ودھارے، برآمدات دے ودھارے، سرمایہ کاری تے روزگار دے وسیع موقع اچ تبدیل کرݨا ہوسی۔ پاکستان دا بنیادی معاشی چیلنج ہݨ استحکام توں اڳونہاں تھی تے معیشت اچ بنیادی تے پائیدار تبدیلی گھن آوݨا اے۔ وفاقی وزیر احسن اقبال وزارتِ منصوبہ بندی و ترقی اچ ہارورڈ بزنس سکول دے ایم بی اے طلبہ دے ہک وفد نال ملاقات کیتی۔ انہاں ہارورڈ بزنس سکول دے طلبہ دا وزارتِ منصوبہ بندی اچ خیرمقدم کریندے آکھیا جو پاکستان کوں صرف آپݨے مسئلیں تے مشکلات دے تناظراچ نی بلکہ ایں دی وسیع صلاحیتیاں تے امکانات دے تناظر اچ وی ݙٹھا ونڄݨا چاہیدے۔ انہاں آکھیا جو تقریباً 26 کروڑ آبادی، ٻہوں وݙی جوان افرادی قوت، اہم جغرافیائی محلِ وقوع، زرعی تے معدنی وسائل، تکھے وسعت پزیر ڈیجیٹل معیشت تے دنیا بھر اچ موجود پاکستانیاں دی مضبوط برادری پاکستان کوں طویل المدت معاشی تبدیلی کیتے مضبوط بنیاد ݙیندی اے۔ پروفیسر احسن اقبال آکھیا جو پاکستان کوں ول ول آوݨ آلے ایں چکر توں نکلݨا ہوسی جیندے اچ معاشی تیزی، ٻاہرلے کھاتیں تے دٻاؤ، استحکام دے اقدامات تے ول معاشی سست روی دا سامنا کرݨا پوندے۔ ایں مقصد کیتے معیشت دی بنیاد پیداواریت تے برآمدات دے ودھارے تے استوار کرݨی ہوسی۔ وفاقی وزیر طلبہ کوں اڑان پاکستان دے بارے اچ بریفنگ ݙیندے آکھیا جو اے حکومت دا قومی تبدیلی دا جامع لائحہ عمل اے، جیندے دی بنیاد فائیو ایز (5Es) تے رکھی ڳئی اے۔ اِنھاں اچ برآمدات، کاروبار تے روزگار؛ ڈیجیٹل پاکستان تے ڈیجیٹل معیشت، ماحولیات، موسمیاتی تبدیلی، خوراک تے آبی تحفظ، توانائیت تے بنیادی ڈھانچہ، جݙاں جو مساوات، اخلاقیات تے بااختیار بݨاوݨ شامل ہن۔ انہاں آکھیا جو پاکستان 2035 تئیں ہک کھرب ڈالر دی معیشت بݨݨ دا ہدف مقرر کیتے، تاں جو ایں دا مقصد محض مجموعی قومی پیداوار دے ہک عدد تئیں پڄݨ نی بلکہ قومی پیداواری صلاحیتیاں کوں ایں سطح تئیں گھن ونڄݨا اے جیڑھا پاکستان 2035 اچ ایہو جیھاں مصنوعات تے خدمات عالمی منڈی اچ مسابقتی بنیاداں تے پیدا تے فروخت کرسڳے۔ انسانی وسائل دی اہمیت اجاگر کریندے وفاقی وزیر آکھیا جو پاکستان دا ساریں توں وݙا سرمایہ ایں دے عوام ہن۔ انہاں خبردار کیتا جے جوان آبادی کوں معیاری تعلیم، بہتر غذائیت، صحت، فنی مہارتاں تے روزگار دے موقع نہ ݙتے ڳئے تاں ایہا آبادی معاشی ٻوجھ اچ تبدیل تھی سڳدی اے۔ مصنوعی ذہانت دے حوالے نال وفاقی وزیر آکھیا جو اے ترقی پذیر معیشتاں کیتے تاریخ ساز موقع اے، تاں جو ملک تکنیکی صلاحیتیاں پیدا کرݨ اچ ناکام رہسن او ہک نویں عالمی ذہانت دی تقسیم اچ پچھوں رہ سڳدن۔ انہاں آکھیا جو پاکستان کوں ابھردی ہوئی ٹیکنالوجیز دا محض صارف بݨݨ دے بجائے اِنھاں دا تخلیق کار تے مقامی ضرورتاں موجب اِنھاں کوں ڈھالݨ آلا ملک بݨݨا ہوسی۔ انہاں طلبہ کوں اے وی دعوت ݙتی جو او ہک سال پاکستان اچ گذار تے آپݨی علمی تے پیشہ ورانہ صلاحیتیاں کوں ملک دی معاشی تبدیلی کیتے بروئے کار گھن آون۔