پمز سانحے دے ذمہ واراں دا تعین کرتے اِنھاں کوں قرار واقعی سزا ݙتی ونڄے، وزیرِ دفاع خواجہ آصف

اسلام آباد۔28اگست (اے پی پی) وزیرِ دفاع خواجہ محمد آصف آکھیے جو پمز سانحے دے ذمہ واراں دا تعین کر تے اِنھاں کوں قرار واقعی سزا ݙتی ونڄے، اپوزیشن ایں سانحے تے قائمہ کمیٹی اجلاس اچ شرکت کرے، ایں اجلاس دی کارروائی براہِ راست قوم کوں ݙکھائی ونڄے۔ کمیٹیاں اچ کہیں معاملے دی تحقیقات اچ دانستہ تاخیر کیتی ویندی اے تاں جو معاملہ ہی نظراں توں اوجھل تھی ونڄے۔ قومی اسمبلی اچ پمز سانحے تے ڳالھ کریندے انہاں آکھیا جو وفاقی حکومت دی طرفوں پمز واقعہ اچ جاں بحق ٻالاں دے لواحقین کیتے 50 لکھ روپے فی کس معاوضے دا اعلان کیتا ڳئے۔ انہاں آکھیا جیڑھا واقعہ تھیے ایں دی تلافی نی تھی سڳدی۔ انہاں آکھیا جو قائمہ کمیٹی قومی صحت دا اجلاس سنوار کوں سݙیا ڳئے ایں اچ ایں سانحے تے وزارتِ داخلہ طرفوں رپورٹ پیش کیتی ویسی۔ اپوزیشن ایں کمیٹی دے اجلاس اچ شرکت کرے تے کجھ ݙینہاں کیتے آپݨا بائیکاٹ موخر کر ݙیوے۔ اتھاں ایں تے سیرحاصل بحث تھی ویسی تے ایہو جیھے واقعات دے سدِ باب دا مستقل حل وی ڳولیا ونڄ سڳسی۔ خواجہ آصف آکھیا جو اپوزیشن دی طرفوں کجھ چیزاں دی نشاندہی دے دوران چنڳے مشورے ݙتے ڳئن۔ ملک اچ گل پلازہ سودھے مختلف واقعات تھئے لیکن او کمیٹیاں اچ اڄاں تئیں انکوائریاں دی سطح تے ہی سرگرداں ہن، کہیں نتیجے تے نھیں پڄے، جے جوابدہی تھیوے تے ذمہ واراں کوں سزائیں ملن تاں اے سارے حادثے روکیے ونڄ سڳدن تاں جو ڄݙاں کوئی معاملہ انکوائریاں اچ سٹ ݙتا ویندے تاں ایہو جیھا نہ مکݨ آلا سلسلہ شروع تھی ویندے جتھاں دانستہ تاخیری حربے اختیار کیتے ویندن تاں جو لوک ایں سانحے کوں ہی بھل ونڄن، ایں اچ تھیوݨ آلے جانی تے مالی ضیان کوں ہی بھل ونڄن۔ انہاں آکھیا جو پمز اچ بھاہ لڳݨ ٻہوں وݙا سانحہ اے ایں دے ذمہ داراں دا تعین تھیوݨا چاہیدے، اِنھاں کوں سزا تھیوݨی چاہیدی اے، اے تحقیقات لمبی چوڑی نی ہفتہ ݙاہ ݙینہاں اچ مکمل تھیوݨی چاہیدی اے، اپوزیشن آپݨا نکتہِ اعتراض قائمہ کمیٹی اچ پیش کرے۔ ایں کیتے ایوان تے کمیٹیاں توں بہتر کوئی پلیٹ فارم کائنی، ساݙا کم جتھاں قانون سازی اے اتھاں احتساب کرݨ دی وی ذمہ واری اے۔ بھاویں اوحکومتی مشینری یا سیاسی کردار اچ جتھاں کوتاہی تھیندی اے اتھاں تے اے ہاؤس پلیٹ فارم مہیا کریندے اساکوں ایں کوں استعمال کرݨا چاہیدے، ایں اچ تاخیر نی تھیوݨی چاہیدی، گل پلازہ وانڳوں تاخیر نی تھیوݨی چاہیدی، ایں سارے حادثے کوں پہلے وانڳوں نہ پرکھیا ونڄے۔ انہاں آکھیا جو اپوزیشن دے سوالاں تے تجویزاں دا خیرمقدم کیتا ویسی۔ ایں کمیٹی دی کارروائی اوپن تھیوݨی چاہیدی اے عوام کوں پتہ لگݨا چاہیدے جو اے ہاؤس احتساب کریندا پئے۔ ڈپٹی سپیکر آکھیا جو کمیٹی ممبران کائنی او وی ایں اجلاس اچ شریک تھیون۔ خواجہ آصف آکھیا جو کمیٹی وی ایں ایوان دے ممبران دی اے، ایں دا ناں پارلیمانی کمیٹی رکھ گھنو۔