پمز ہسپتال دے واقعہ دی تحقیقات مکمل شفاف انداز اچ کیتیاں ویسن، ہک آدمی وی سپیئر نہ تھیسی ، وفاقی وزیرِ صحت سید مصطفیٰ کمال

اسلام آباد۔28اگست (اے پی پی) وفاقی وزیرقومی صحت، خدمات، ضوابط و رابطہ سید مصطفیٰ کمال پمز ہسپتال اچ نومولود ٻالاں دے جاں بحق تھیوݨ دے واقعہ تے ݙکھ تے افسوس کریندے آکھیے جو کہیں وی فرد کوں بچایا نہ ویسی، واقعہ دی تحقیقات مکمل شفاف انداز اچ کیتیاں ویسن تے ذمہ واراں دے خلاف کارروائی تھیسی۔ سینیٹ اجلاس اچ پمز واقعہ تے ڳالھ کریندے وفاقی وزیرآکھیا جو ایں توں ودھ اندوہناک تے دل خراش واقعہ نی تھی سڳدا، نشوم ٻال آپݨیاں جاناں توں چلئے ڳئن تے ایں تے کوئی تسلی بخش وضاحت موجود کائںی۔ انہاں آکھیا جو او وفاقی وزیرِ صحت دی حیثیت نال ایں معاملے دی ذمہ داری قبول کریندن تے پارلیمان دے سامنے جوابدہ ہن۔ انہاں آکھیا جو واقعہ دی تحقیقات کیتے وزیرِاعظم دی طرفوں کمیٹی بݨائی ڳئی اے تے ایں دی رپورٹ 24 گھنٹے اچ متوقع اے، جے رپورٹ اچ کوئی پہلو تشنہ رہ ڳئے تاں ارکان دیاں تجویزاں کوں ضرور مدِ نظر رکھیا ویسی۔ انہاں واضح کیتا جو وزیرِاعظم تے حکومت دی طرفوں کہیں شخص کوں بچاوݨ یا رپورٹ لکاوݨ دا سوال ہی پیدا نی تھیندا، “ہک آدمی وی سپیئر نہ تھیسی ۔ وفاقی وزیر کمیٹی دی مدت کوں صرف 40 ݙینہاں تئیں محدود رکھݨ دے بجائے ایں کوں کھلا رکھݨ دی تجویز دی حمایت کریندے آکھیا جو تحقیقات کوں کجھ ݙینہاں دی کارروائی تئیں محدود نی کیتا ونڄݨا چاہیدا، کمیٹی کوں ایں ویلھے تئیں کم جاری رکھݨا چاہیدے ڄݙاں تئیں سارے متعلقہ ادارے تے ماہرین اڳوں ایہو جیھے واقعات روکݨ کیتے قابلِ عمل لائحہ عمل تے متفق نہ تھی ونڄن۔ انہاں آکھیا جو وزارتِ صحت کنے پچھلے 14 مہینے دی متعلقہ معلومات تے ریکارڈ موجود اے تے او تحقیقات کرݨ آلی کمیٹی کوں ساری معلومات ݙیوݨ کیتے تیار ہن۔ انہاں آکھیا جو سارے متعلقہ افسران کوں کمیٹی دے سامݨے پیش کیتا ویسی تاں جو حقائق سامݨے آسڳن تے مستقبل اچ ایہو جیھے سانحات توں بچیا ونڄ سڳے۔ سید مصطفیٰ کمال آکھیا جو پمز دا واقعہ نظام اچ موجود خامیاں دی نشاندہی دا ہک موقع وی اے تے اساکوں ایں سانحے کوں صرف ہک ہسپتال تئیں محدود نی رکھݨا چاہیدا۔ انہاں ماہرین کوں تحقیقات تے اصلاحات دے عمل اچ شامل کرݨ دی حمایت کریندے آکھیا جو وزارت ماہرین دی رہنمائی تے تجویزاں تے عمل کریسی۔ انہاں آکھیا جو ملک اچ ہر سال ٻہوں وݙی تعداد اچ ایہو جیھے ٻال تے ماواں وی جاں بحق تھیندن جنھاں دیاں جاناں بچائیاں ونڄ سڳدن۔ انہاں اعداد و شمار دا حوالہ ݙیندے آکھیا جو ہک سال دے دوران پنج سال تئیں دی عمر دے تقریباً چار لکھ ٻال جاں بحق تھیندن جݙاں جو حمل تے زچگی دے دوران ہزاراں ماواں دیاں جاناں ضائع تھی ویندن۔ انھاں دا آکھݨ ہئی جو اِنھاں اموات کوں روکݨ کیتے وی مؤثر اقدامات دی لوڑھ اے۔ وفاقی وزیر آکھیا جو حکومت دا مقصد صرف پمز دے موجودہ واقعہ دے ذمہ واراں دا تعین کرݨ نی بلکہ پورے نظام اچ بنیادی تے مؤثر اصلاحات گھن آوݨا اے تاں جو اڳوں کہیں ٻال دی جان غفلت یا انتظامی کمزوری پاروں ضائع نہ تھیوے۔ انہاں آکھیا جو او آپݨی وزارت دی ساری متعلقہ معلومات تے ریکارڈ پارلیمانی کمیٹی دے سامݨے رکھݨ کیتے تیار ہن تے تحقیقات دے عمل اچ مکمل تعاون کریسن۔ انہاں آکھیا جو حکومت ایں معاملے کوں دٻاوݨ دے بجائے ذمہ واراں دا تعین کریسی تے مستقبل اچ ایہو جیھے واقعات روکݨ کیتے عملی اقدامات چاتے ویسن۔ وفاقی وزیر سینیٹ ارکان دی طرفوں واقعہ تے تشویش تے تجویزاں تے اِنھاں دا شکریہ ادا کریندے آکھیا جو ایں سانحے کوں کجھ ݙینھاں دی بحث تئیں محدود نی تھیوݨا چاہیدا بلکہ ایں کوں مستقبل کیتے جامع اصلاحات دی بنیاد بݨاوݨا چاہیدے۔