وزیرِ اعلیٰ پنجاب مریم نواز شریف نال ڈیرہ غازی خان دے ارکانِ صوبائی اسمبلی دی ملاقات، عوامی مسائل سمیت مختلف معاملیاں تے ڳالھ مہاڑ

لاہور۔1ستمبر (اے پی پی) وزیرِ اعلیٰ پنجاب مریم نواز شریف نال ڈیرہ غازی خان دے ارکانِ صوبائی اسمبلی منگل کوں ملاقات کیتی جیندے اچ سیاسی صورتحال، امن و امان تے عوامی مسائل سمیت مختلف معاملیاں تے ڳالھ مہاڑ کیتی ڳئی۔ ترجمان وزیرِ اعلیٰ ہاؤس دے مطابق ملاقات کرݨ آلیاں اچ احمد خان لغاری، علی احمد لغاری، اسامہ عبدالکریم، حنیف پتافی، اسامہ لغاری تے صلاح الدین خان شامل ہن۔ وزیرِ اعلیٰ مریم نواز شریف ارکانِ اسمبلی کوں آپݨے آپݨے حلقیاں اچ جاری ترقیاتی منصوبیاں دی موثر مانیٹرنگ یقینی بݨاوݨ دی ہدایت کیتی۔ ارکانِ صوبائی اسمبلی وزیرِ اعلیٰ مریم نواز شریف کوں کامیاب دورہِ چین تے مبارکباد پیش کریندیں ہوئیں ڈی جی خان اچ الیکٹرو بس سروس شروع کرواوݨ تے انھاں کوں خراجِ تحسین پیش کیتا۔ ارکانِ اسمبلی اکھیا جو ڈی جی خان اچ الیکٹرو بس سروس گیم چینجر منصوبہ اے، ڈیرہ غازی خان دی عوام الیکٹرو بس سروس دے اجرا تے وزیرِ اعلیٰ مریم نواز شریف دے ممنون ہن۔ انھاں اکھیا جو وزیرِ اعلیٰ مریم نواز شریف دی موثر پالیسیاں دے تحت ڈی جی خان اچ امن و امان دی صورتحال بہتر توں بہتر تھیندی پئی اے۔ کچے دے علاقے اچ پہلی واری امن و امان دی صورتحال اچ بہتری پنجاب اچ گڈ گورننس دا منہ بولیندا ثبوت اے۔