توانائی بحران: وزیراعظم پورے ملک اچ سادگی اتے کفایت شعاری مہم دی منظوری ݙے ݙتی

اسلام آباد۔17 ستمبر(اے پی پی)وزیراعظم محمد شہباز شریف مشرقِ وسطیٰ دی صورتحال پاروں عالمی منڈی اچ پٹرولیم مصنوعات دیاں قیمتاں ودھݨ سانڳے پورے ملک اچ سادگی اتے کفایت شعاری مہم دی منظوری ݙے ݙتی اے۔ اے فیصلہ اسلام آباد اچ وزیراعظم دی صدارت اچ تھیوݨ والے کفایت شعاری اتے توانائی دے تحفظ دے اقدامات بارے اہم اجلاس اچ کیتا ڳئے۔ وزیراعظم آکھیا جو عالمی منڈی اچ تیل دیاں قیمتاں ودھݨ نال پوری دنیا مہنگائی دی ولھیٹ اچ  اے، سب توں پہلے حکومت اتے اشرافیہ توں قربانی دی شروعات کیتی ویسی، معاشی طور تے کمزور اتے متوسط طبقے کیتے فیول سبسڈی شروع تھی چکی اے، موٹر سائیکل، رکشہ اتے 800 سی سی ڳاݙیاں کوں 100 روپے فی لیٹر دے حساب نال سبسڈی ݙتی ویندی پئی اے۔ وزیراعظم غیر ضروری سرکاری اخراجات اچ کمی اتے قومی وسائل دے دانشمندانہ استعمال اتے متعلقہ اداریاں کوں کفایت شعاری اقدامات تے موثر اتے فوری عملدرآمد دی ہدایت کیتی۔ اجلاس اچ حکومتی اخراجات اچ کمی، ایندھن دے تحفظ اتے سرکاری وسائل دے موثر استعمال کیتے اضافی کفایت شعاری اقدامات دا جائزہ گھدا ڳیا۔ اجلاس اچ سرکاری ڳاݙیاں کیتے ایندھن اچ ترائے مہینیاں کیتے 50 فیصد کمی دے اقدام تے عملدرآمد دی منظوری ݙتی ڳئی۔ ایمبولینسز، فائر بریگیڈ، قانون نافذ کرݨ والے اداریاں اتے ضروری خدمات دیاں ڳاݙیاں ایں اقدام توں مستثنیٰ ہوسن ڄݙاں جو انتظامی یا غیر آپریشنل نوعیت دیاں ڳاݙیاں کیتے استثنا دی اجازت نہ ہوسی۔ اجلاس اچ مالی سال 2026-27 دے نان ای آر ای بجٹ اچ 5 فیصد کمی، سرکاری سطح تے ہر قسم دیاں نویاں ڳاݙیاں دی خریداری تے مکمل پابندی اتے آئی ٹی بارے خریداری دے علاوہ سارے پائیدار شے دیاں خریداری تے وی پابندی لا ݙتی ڳئی۔ ترائے مہینیاں کیتے سرکاری دوریاں تے بیرونِ ملک سفری سرگرمیاں تے وی پابندی لا ݙتی ڳئی۔ ناگزیر بیرونِ ملک دوریاں دی صورت اچ وزراء، مشیران، وزرائے مملکت، معاونینِ خصوصی اتے سرکاری افسران اکانومی کلاس اچ سفر کریسن۔ اجلاس اچ سرکاری امور کیتے ویڈیو کانفرنسنگ اتے ٹیلی کانفرنسنگ دے ودھ توں ودھ استعمال، سرکاری عشائیاں تے پابندی، سوائے غیر ملکی وفود دے اعزاز اچ ضروری عشائیاں اتے حکومت ولوں سرکاری سیمینارز، تربیتی پروگراماں اتے کانفرنساں کراوݨ کیتے غیر ضروری اخراجات روکݨ دی وی منظوری ݙتی ڳئی۔ اجلاس اچ شادی بیاہ اتے ٻیاں تقریبات اچ سنگل ڈش دے اقدام تے وی عملدرآمد جاری رکھݨ دا فیصلہ کیتا ڳیا۔ دکاناں، مارکیٹاں، شاپنگ مالز، بازار اتے ٻئے عمومی کاروباری مراکز رات 9 وڄے ڄݙاں جو شادی ہالز اتے ٻیاں تقریبات دے مقامات رات 10 وڄے تئیں بند ہوسن۔ ریستوران، کیفے، کھاوݨ پیوݨ دے مراکز، پھل اتے سبزی دیاں دکاناں کیتے بندش دا ویلھا رات 11 وڄے کرݨ دا فیصلہ کیتا ڳیا۔ فارمیسیز، طبی مراکز، ہسپتال، بیکریاں، پٹرول اتے سی این جی سٹیشنز، الیکٹرک وہیکل چارجنگ سٹیشنز، جم، کھاݙیاں دیاں سہولیات، آئی ٹی کمپنیاں اتے کال سنٹرز کوں اوقاتِ کار دیاں پابندیاں توں استثنا ݙے ݙتا ڳیا۔ وزیراعظم کوں ݙسایا ڳیا جو کفایت شعاری اتے ایندھن دے تحفظ دے اقدامات دی نگرانی کیتے قائم کمیٹی وزارتاں، ڈویژنز، محکمیاں، سرکاری اداریاں اتے صوبائی دارالحکومتاں توں عملدرآمد رپورٹس ڳھنسی، عدم تعمیل اتے رکاوٹاں دی نشاندہی کر کے اصلاحی اقدامات تجویز کریسی اتے وزیراعظم کوں ہفتہ وار پیش رفت رپورٹ پیش کریسی۔ وزیراعظم محمد شہباز شریف ہدایت کیتی جو کفایت شعاری دے اقدامات تے بلا امتیاز عملدرآمد یقینی بݨایا ونڄے اتے حکومتی اخراجات اچ کمی دے نال نال توانائی اتے ایندھن دے تحفظ کیتے ممکنہ اقدامات کیتے ونڄن۔ وفاقی حکومت ولوں مالی سال 2026-27 اچ پہلے توں نافذ کفایت شعاری اقدامات کوں جاری رکھݨ دی منظوری وی تھی چکی اے۔اے اقدامات وفاقی حکومت دے منسلک محکمیاں، سرکاری ملکیتی اداریاں، قانونی اداریاں اتے ریگولیٹری اتھارٹیز تے وی لاگو تھیسن۔ اجلاس اچ نائب وزیراعظم اتے وزیرِ خارجہ سینیٹر محمد اسحاق ڈار، وفاقی وزراء احد خان چیمہ، علی پرویز ملک، عطاء اللہ تارڑ اتے متعلقہ اعلیٰ حکام شرکت کیتی۔