نائب وزیراعظم محمد اسحاق ڈار دی صارفین اتے پٹرول پمپاں دیاں شکایتاں نمٹاوݨ اتے تکنیکی معاونت کیتے 24 گھنٹے فعال خصوصی نظام ٻݨاوݨ دی ہدایت

اسلام آباد۔17 ستمبر(اے پی پی)نائب وزیراعظم تے وزیرِ خارجہ سینیٹر محمد اسحاق ڈار صارفین اتے پٹرول پمپاں دیاں شکایتاں دے ازالے اتے تکنیکی معاونت کیتے 24 گھنٹے فعال ہک خصوصی نظام قائم کرݨ دی ہدایت کریندے زور ݙتے جو درست اتے قابلِ قبول ٹوکن پیش کرݨ والے کہیں وی شہری کوں ولا نا ٻھڄیا ونڄے اتے ریلیف بلاجواز رکاوٹاں دے بغیر مستحق افراد تئیں پہنچݨا چاہیدے۔ نائب وزیراعظم تے وزیرِ خارجہ سینیٹر محمد اسحاق ڈار دی صدارت اچ ایندھن سبسڈی بارے قومی سٹیئرنگ کمیٹی دا اجلاس تھئے ڄیندے اچ وزیراعظم ولوں پورے ملک اچ خصوصی ریلیف سکیم شروع تھیوݨ دے بعد ایںدے تے عملدرآمد دا جائزہ گھدا ڳیا۔ کمیٹی ملک بھر اچ رجسٹریشن، ٹوکن نال ریلیف ڳھنݨ اتے پٹرول پمپاں کوں ادائیگیاں دے حوالے نال پیش رفت دا جائزہ گھدا۔ نائب وزیراعظم تے وزیرِ خارجہ زور ݙتا جو ریلیف پیکج لوکاں کوں درست طریقے نال پڄݨا چاہیدے۔ اجلاس اچ وزیرِ پٹرولیم، وزیرِ اقتصادی امور، وزیرِ اطلاعات تے نشریات تے وزیرِ آئی ٹی تے ٹیلی کمیونیکیشن، معاونِ خصوصی برائے وزیراعظم طارق باجوہ، سٹیٹ بینک آف پاکستان دے ڈپٹی گورنر، چیئرمین اوگرا، سیکریٹری پٹرولیم، پنجاب اتے سندھ دے ایڈیشنل چیف سیکریٹریز، آزاد جموں اتے کشمیر، گلگت بلتستان، اسلام آباد کیپیٹل ٹیریٹری اتے متعلقہ وفاقی تے صوبائی محکمیاں دے سینئر حکام شرکت کیتی۔