وزیراعظم دا پاکستان دے زرمبادلہ دے ذخائر تاریخ دی بلند ترین سطح 21.4 ارب ڈالر تائیں پڄݨ تے اظہارِ تشکر، اے اہم کامیابی معاشی استحکام آلے پاسے ہک ٻیا تاریخی سنگِ میل اے، شہباز شریف

اسلام آباد۔18 ستمبر (اے پی پی) وزیراعظم محمد شہباز شریف اسٹیٹ بینک آف پاکستان دے زرمبادلہ دے ذخائر 21.4 ارب ڈالر دی تاریخ دی بلند ترین سطح تے پجݨ تے اللہ تعالیٰ دا شکر ادا کریندے ہوئیں ایں کوں معاشی استحکام آلے پاسے ایک ٻیا تاریخی سنگِ میل قرار ݙتے۔ وزیراعظم آفس دے میڈیا ونگ توں جمعہ کوں جاری بیان موجب وزیراعظم آکھیا جو ملک دے مجموعی زرمبادلہ دے ذخائر 21.4 ارب ڈالر تائیں پڄݨ معاشی ٹیم دی ڈینھ رات محنت تے درست سمت اچ کیتے ڳئے اقدامات دا ثبوت اے، ترسیلاتِ زر تے خدمات دی برآمدات اچ نمایاں بہتری، کرنٹ اکاؤنٹ دی بہتر صورتحال تے مالیاتی نظم و ضبط زرمبادلہ دے ذخائر اچ ودھارے اچ اہم کردار ادا کیتے۔ وزیراعظم آکھیا جو بین الاقوامی کیپٹل مارکیٹس تائیں پاکستان دی ولا کامیاب رسائی وی ملکی معیشت تے عالمی اعتماد دی بحالی دا مظہر اے، زرمبادلہ دے ذخائر اچ اضافہ نہ صرف ملکی بیرونی ادائیگیاں دی صلاحیت کوں مضبوط بݨیسی بلکہ عالمی معاشی مشکلات دا مقابلہ کرݨ دی اساݙی استعداد وی کئی گنا ودھیسی۔ وزیراعظم وزیرِ خزانہ محمد اورنگزیب، گورنر اسٹیٹ بینک، حکومت دی معاشی ٹیم تے بالخصوص بیرونِ ملک پاکستانی عوام کوں ایں اہم کامیابی تے خراجِ تحسین پیش کیتے۔ اتھاں اے ڳالھ قابلِ ذکر اے جو ماضی دے برعکس، زرمبادلہ دے انہاں ذخائر اچ اضافہ بیرونی قرضیاں اچ ودھارے دے ذریعے نئی بلکہ بنیادی طور تے اسٹیٹ بینک آف پاکستان دی جانب توں زرمبادلہ دی خریداری پاروں تھیے۔ ایں توں علاوہ اسٹیٹ بینک آپݨی زرمبادلہ نال متعلق واجبات اچ وی نمایاں ڳھٹکی کیتی اے۔