چیئرمین این ڈی ایم اے دا اربن فلڈنگ دے انتظام کیتے پیشگی تے مربوط حکمتِ عملی دی لوڑھ تے زور

اسلام آباد۔18 ستمبر (اے پی پی) چیئرمین نیشنل ڈیزاسٹر مینجمنٹ اتھارٹی (این ڈی ایم اے) لیفٹیننٹ جنرل انعام حیدر ملک اربن فلڈنگ دے انتظام کیتے پیشگی تے مربوط حکمتِ عملی دی لوڑھ تے زور ݙیندے آکھیے جو مینھ تے چھل دے بعد روایتی ردِعمل توں نکھر تے پائیدار تے طویل مدتی شہری تحفظ دی منصوبہ بندی دی پاسے ودھݨا ہوسی۔ او این ڈی ایم اے دے زیرِ اہتمام “اربن فلڈنگ نال نبڑݨ کیتے پائیدار اقدامات، وژن 2027 مینھ تے سیلاب توں اڳوں” دے عنوان نال منعقدہ سیمینار دی اختتامی تقریب نال خطاب کریندے پئے ہن۔ سیمینار اچ متعلقہ سرکاری محکمیں، ترقیاتی اداریں دے نمائندیں، اربن پلاننگ دے ماہرین، آبی امور دے ماہرین تے ٻئے سٹیک ہولڈرز شرکت کیتی تاں جو ول ول پیش آوݨ آلے اربن فلڈنگ تے ایں توں بچݨ دی صلاحیت کوں تکڑا بݨاوݨ دے ضروری اقدامات تے غور کیتا ونڄ سڳے۔ شرکاء ایں ڳالھ تے روشنی پاتی جو اربن فلڈنگ دے مسئلے کوں صرف مینھ دے انتظام دے ذریعے حل نی کیتا ونڄ سڳدا، بلکہ ایں کیتے ھک جامع حکمتِ عملی درکار اے جیندے اچ نکاسیِ آب دی استعداد، شہری ترقی، بنیادی ڈھانچے دی ݙیکھ بھال، برساتی پانی دا انتظام تے ادارہ جاتی ہم آہنگی شامل ہووے۔ شرکاء سال 2025–26ء دے دوران پیش آوݨ آلے اربن فلڈنگ دے تجربیں، چھل دے زیادہ خطرے توں ݙوچار تے حساس علاقیں، خطرات توں ݙوچار انفراسٹرکچر تے نکاسیِ آب دے موجودہ نظام دا تفصیلی جائزہ ڳھدا۔ ایں توں علاوہ برساتی پاݨی دے وہݨ، نکاسیِ آب دے نیٹ ورک دی استعداد تے ایں دی خستہ حالی، پاݨی دے ذخیرے تے پمپنگ دے انتظامات، قدرتی آبی گزرگاہواں دی بحالی تے ادارہ جاتی ہم آہنگی تے ہنگامی ردِعمل دے نقائص تے وی تفصیلی غور کیتا ڳئے۔ شرکاء جون 2027ء توں پہلے کیتے ونڄݨ آلے ترجیحی اقدامات تے مشاورت کیتی جنہاں اچ انتظامی تے حفاظتی تدابیر، نکاسیِ آب دی بہتر ݙیکھ بھال تے تیاری، برساتی پاݨی دے انتظام تے ڈرینیج دی صلاحیت اچ ودھارا، قدرتی آبی گزرگاہواں دا تحفظ تے شہری منصوبہ بندی تے ترقی اچ چھل توں تحفظ دے عوامل کوں لازمی شامل کرݨ شامل اے۔ سیمینار سی ڈی اے، واسا، آر ڈی اے، ایل ڈی اے تے ٻئے ترقیاتی اداریں تے شراکت داراں کوں اربن فلڈنگ دے خطرات گھٹ کرݨ تے پائیدار شہری انفراسٹرکچر دی تعمیر کیتے ادارہ جاتی ذمہ واریاں تے سانجھے مربوط اقدامات دی نشاندہی کیتے ھک پلیٹ فارم وی ݙتا۔ اپݨے اختتامی خطاب اچ چیئرمین این ڈی ایم اے لیفٹیننٹ جنرل انعام حیدر ملک اربن فلڈنگ دے انتظام کیتے پیشگی تے مربوط حکمتِ عملی دی لوڑھ تے زور ݙتا جیندے اچ تیاری، بنیادی ڈھانچے دی مضبوطی، ادارہ جاتی شمولیت تے نشاندہی کیتے ڳئے اقدامات تے وقتی عملدرآمد تے خصوصی توجہ ݙتی ونڄے۔