ایف جی ای ایچ اے دے منصوبیں کوں تکھے اڳوں ودھایا ویسے، وفاقی وزیر میاں ریاض حسین پیرزادہ

اسلام آباد۔18 ستمبر(اے پی پی) وفاقی وزیرِ ہاؤسنگ و تعمیرات میاں ریاض حسین پیرزادہ آکھیے جو ایف جی ای ایچ اے دے مختلف ہاؤسنگ منصوبیں کوں تکھے اڳوں ودھاوݨ، الاٹیز کوں پلاٹاں دا قبضہ ݙیوݨ تے زیرِ التواء منصوبیں دی تکمیل کیتے سارے ممکنہ اقدامات کیتے ویسن، ویٹنگ لسٹ اچ موجود الاٹیز کیتے نویں ہاؤسنگ سکیمیاں متعارف کراوݨ تے وی کم جاری اے۔ انہاں اے ڳالھ وزارتِ ہاؤسنگ و تعمیرات اچ فیڈرل گورنمنٹ ایمپلائز ہاؤسنگ اتھارٹی (ایف جی ای ایچ اے) دے ایگزیکٹو بورڈ دے 52ویں اجلاس دی صدارت کریندے آکھی۔ اجلاس اچ سیکرٹری ہاؤسنگ و تعمیرات کیپٹن (ریٹائرڈ) محمد محمود، ڈائریکٹر جنرل ایف جی ای ایچ اے کیپٹن (ریٹائرڈ) ظفر اقبال تے بورڈ دے ٻئے ارکان شرکت کیتی۔ اجلاس اچ ایف جی ای ایچ اے دے جاری ہاؤسنگ منصوبیں، اڄوکی پیش رفت، اڄوکی کامیاب نیلامی تے مستقبل دے لائحہ عمل دا تفصیلی جائزہ ڳھدا ڳیا۔ وفاقی وزیر ایف جی ای ایچ اے دی اڄوکی کامیاب نیلامی تے اطمینان دا اظہار کریندے آکھیا جو اتھارٹی دی مسلسل محنت دے مثبت نتیجے سامݨے آندے پئن تے سرمایہ کاراں دی طرفوں ایف جی ای ایچ اے تے اعتماد دا اظہار خوش آئند اے۔ انہاں وزیراعظم پاکستان دے وژن موجب وزارتِ ہاؤسنگ و تعمیرات تے ایف جی ای ایچ اے دیاں کوششاں دی تعریف کریندے سیکرٹری ہاؤسنگ و تعمیرات تے ڈائریکٹر جنرل ایف جی ای ایچ اے کوں اڄوکی کامیاب نیلامی تے مبارخ ݙتی۔ میاں ریاض حسین پیرزادہ آکھیا جو ایف جی ای ایچ اے دے مختلف منصوبے تکھےاڳوں ودھدے پئن جنہاں اچ سیکٹر ایف-14، ایف-15، ڈی ایچ اے دے نال مشترکہ منصوبہ مارگلہ آرچرڈ تے ٻئے ہاؤسنگ منصوبے شامل ہن۔ انہاں منصوبیں کوں مزید موثر انداز اچ اڳوں ودھاوݨ کیتے سارے ممکنہ اقدامات کیتے ویسن۔