معروف براڈکاسٹر تے سابق اسٹیشن ڈائریکٹر ریڈیو پاکستان بہاولپور اکرم شاد دی اڄ پہلی برسی اے

اسلام آباد۔20 ستمبر (اے پی پی) اکرم شاد ریڈیو پاکستان اچ ملازمت دا آغاز ڈیوٹی افسر دے طور تے کوئٹہ توں کیتا ہئی۔ او بہاولپور اچ ساریں توں پہلے براڈکاسٹر دی حیثیت نال 1969ء اچ سامݨے آئے، انہاں دے معاصرین اچ عقیل اشرف تے افتخار احمد غازی وی معروف تھئے۔ اکرم شاد ھک محنتی تے پرلگن پروگرامر ہن، انہاں زندگی اچ جملہ اصنافِ نشریات اچ ھک ذہین تے پرعزم پروڈیوسر بݨ تے ٻہوں سارے عمدہ فنکاراں کوں متعارف کروایا۔ او کوئٹہ دے علاوہ ملتان تے بہاولپوردیاں نشرگاہواں اچ تندہی نال ڈراما، موسیقی، دستاویزی پروگرامز، انٹرویوز تے ٻالاں کیتے موثر انداز اچ پروگرام کریندے ریہے۔ اکرم شاد کوں سرائیکی کلچر، زبان تے تہذیب کوں صداکاری دی صورت اچ ڈھالݨ اچ ملکہ حاصل ہئی کیوں جو او سرائیکی تے اردو ادب دے شائق ہن، اساتذہ دے کلام تے نظر ہئی، ول ملتان تے بالخصوص بہاولپور اچ شعراء نال ریڈیو اسٹیشن اچ میل جول دی وجہ توں انہاں کوں احساس ہئی جو ایں دھرتی دی ثقافت تے فن کوں نویں نسل تئیں پڄاوݨ اچ ریڈیو دا رول ساریں توں موثر اے۔ انہاں دی سرائیکی لوک موسیقی دی پیشکش وی مقبول رہی۔ ول 70 توں 2000ء تئیں دا زمانہ ریڈیو پاکستان دا درخشاں عہد ہئی تے سرائیکی خطے اچ عوام الناس صوت و صدا کیتے ہمہ تن تیار رہندے ہن۔ اکرم شاد خوش قسمتی نال بہترین براڈکاسٹرز توں سکھیا ہئی جنہاں اچ سجاد ترمذی، حمید اصغر شاہ، شمس الدین بٹ، الیاس عشقی جیھے یادگار اساتذہ شامل ہن، او پروگرام دی ترتیب و تدوین اپݨے حلقہٴ سماعت دے معیار موجب وضع آفرینی کریندے ریہے۔ اکرم شاد ملنسار، ہنس مکھ تے نشریاتی دنیا دے ایں دور دی یادگار ہن جنہاں ݙو نسلاں دی علمی، ثقافتی تے سماجی شعبیں دے میدان اچ بے لوث خدمت کیتی۔