جماعتِ اسلامی اتے پی ٹی آئی دے احتجاجاں اچ فرق اے، پی ٹی آئی دی تاریخ پرامن رہوݨ دی نئیں، ہک ݙینھ دے دھرنے نال 120 ارب روپے دا نقصان تھیندے، وفاقی وزیر عطاء اللہ تارڑ دی پریس کانفرنس

پشاور۔22 ستمبر(اے پی پی)وفاقی وزیرِ اطلاعات و نشریات عطاء اللہ تارڑ آکھیے جو جماعتِ اسلامی اتے پی ٹی آئی دے احتجاجاں اچ فرق اے، پی ٹی آئی دی تاریخ پرامن رہوݨ دی نئیں، ہک ݙینھ دے دھرنے نال 120 ارب روپے دا نقصان تھیندے، کہیں کوں وی فساد کھنݙاوݨ، جلائو ڳھیرائو دی اجازت نئیں ڈتی ونڄ سڳدی۔ پشاور اچ پریس کانفرنس کریندے انہاں آکھیا جو دھرنیاں نال تاجر، دکاندار، تنخواہ دار طبقہ، ایکسپورٹرز اتے صنعتکار متاثر تھیندن، سیاسی مقاصد کیتے سڑکاں بند کرݨ اتے جلائو گھراؤ دی اجازت نئیں ݙتی ونڄ سڳدی، ڄیکر احتجاج کرݨے تاں پشاور اچ کرو اتے مطالبات عوام کوں ݙسائو، ایندے کیتے اسلام آباد آوݨ ضروری نئیں، پی ٹی آئی دی صوبائی حکومت کوں صوبے دی ترقی تے توجہ ݙیوݨی چاہیدی اے، پچھلے 13 سال توں صوبے اچ انہاں دی حکومت اے ٻھل کوئی ترقیاتی کم نئیں ݙسدا، صوبے دے وسائل احتجاجی جلسیاں جلوساں اتے اُݙائے ویندن، فرانزک لیبارٹریز کیتے وی خیبر پختونخوا کوں پنجاب دی مدد گھنݨی پوندی اے، وفاق نیشنل ایکشن پلان کیتے خیبر پختونخوا حکومت کوں این ایف سی دی مد اچ ساݙھے اٹھ سو ارب روپے ݙتن جیندا کوئی ریکارڈ کائنی۔ انہان اپݨے دورہ خیبر پختونخوا دا ݙسای جتھاں او کوہاٹ واقعے دے زخمیاں نال ملین، سی ایم ایچ دا دورہ کیتے، شہدا دے ٹٻراں نال ملین اتے انہاں دے حوصلے کوں سراہے۔ او کوہاٹ دے سیاسی و سماجی عمائدین، چیمبر آف کامرس اتے لائرز ایسوسی ایشن دے نمائندیاں نال وی ملین۔ دہشتگردی دے خلاف جنگ اچ پشاور پریس کلب اتے صحافیان دے جذبے دی تعریف کریندے آکھیے جو دورانِ سروس شہید یا وفات پاوݨ والے ورکنگ جرنلسٹس اتے میڈیا ورکرز دی فہرست ݙتی ونڄے تاں جو انہاں دی ݙیکھ ٻھال دا انتظام کروں، ایں سانڳے میڈیا اداریاں دے تعاون نال شہداء دے خانداناں دی کفالت کیتے پیکیج ٻݨایا ویسی، صحافیاں دی ہیلتھ انشورنس تے وی فوری طور تے کم کیتا ویسی۔ عطاء اللہ تارڑ آکھیا جو ریڈیو پاکستان پشاور دی عمارت وزیرِ اعظم دی ہدایات تے چھی مہینے اچ مکمل کر تے ولا فعال کر ݙتی ڳئی اے۔ عطاء اللہ تارڑ آکھیا جو خیبر پختونخوا اچ تعمیر و ترقی تے توجہ ݙیوݨ دی لوڑھ اے۔ وزیر اعظم دی ہدایت تے موٹرسائیکل، رکشے اتے عوامی چھوٹی سواری کیتے پٹرول دی قیمت اچ سکھ کیتے وݙا ریلیف ݙتا ویندا پئے، ایں سانڳے تیکھے ریلیف دی یقین دہانی تے امیر جماعت اسلامی حافظ نعیم الرحمن لانگ مارچ موخر کرݨ کیتے مشاورت دی ڳالھ کیتی اے، وزیرِ اعظم دی وطن واپسی تے جماعتِ اسلامی دی قیادت دی انہاں نال ملاقات وی تھیسی، خیبر پختونخوا دے سرکاری وسائل عوام دے وسائل ہن ڄیکوں سیاسی احتجاج کیتے استعمال نئیں کیتا ونڄݨاں چاہیدا۔ انہاں آکھیا جو مسئلہ وسائل دا نئیں نیت دا اے، اے آھدن جو امن و امان اساݙی ذمہ داری نئیں حالانکہ وفاق توں فنڈز وی آندے پئن، تعلیم، صحت، ترقیاتی منصوبے انہاں دی ذمہ داری نئیں ہن تاں ول اے کیوں ٻیٹھن؟ خیبر پختونخوا دے عوام کون انہان دا حق ملݨا چاہیدے، ڄیکر انہاں دا مینڈیٹ قیدی دی رہائی اے تاں قانونی راستہ اختیار کرن، عدالت ونڄن، اپیل کرن، نظرثانی دی اپیل دائر کرن، اسلام آباد اچ احتجاج بارے اسلام آباد ہائی کورٹ دا قانونی حکم موجود اے جیندے تے عمل کریسوں۔ وفاق اے نئیں آہدا جو امن و امان دی مکمل ذمہ داری صوبائی حکومت تے اے ٻھل اے آہدے جیڑھی ذمہ داری صوبائی حکومت دی ٻݨدی اے او پوری کیتی ونڄے، دہشتگردی بارے صوبائی حکومت دا ہتھ ونݙاوݨ کوں تیار ہیں، ٻھل صوبائی حکومت وی سنجیدگی ݙکھاوے۔