وفاقی وزیرقومی غذائی تحفظ و تحقیق رانا تنویر حسین روم اچ ایف اے او (FAO) دے اعلیٰ سطحی اجلاس نال خطاب

روم۔25 ستمبر (اے پی پی) وفاقی وزیرقومی غذائی تحفظ و تحقیق رانا تنویر حسین روم اچ ایف اے او (FAO) دے اعلیٰ سطحی اجلاس نال خطاب کریندے مستقبل اچ وبائی بیماریاں دے کھڈݨ کوں روکݨ کیتے حیوانی صحت، بیماریاں دی نگرانی تے ’’ون ہیلتھ‘‘ (One Health) نظام اچ عالمی سطح تے مزید سرمایہ کاری تے زور ݙتے۔ انہاں واضح کیتا جو پاکستان اچ وݙے پیمانے تے موجود مال ڈھور، آبادی دی نقل و حرکت تے موسمیاتی تبدیلیاں پاروں حیوانی و ماحولیاتی صحت اچ وقتی سرمایہ کاری انساناں، غذا تے دیہی معیشت دے تحفظ کیتے بنیادی حیثیت رکھیندی اے۔وفاقی وزیر ݙسایا جو پاکستان کوں پینڈیمک فنڈ دے تحت 18.7 ملین ڈالر ݙتے ڳئن جݙاں جو شریک مالی معاونت تے مشترکہ سرمایہ کاری دے ذریعے کل 49.7 ملین ڈالر متحرک کیتے ڳئن۔ ایں رقم دی مدد نال 18 مہینے توں وی گھٹ عرصے اچ نیشنل ون ہیلتھ سیکریٹریٹ فعال کیتا ڳیا تے پنج علاقیں اچ ون ہیلتھ یونٹس بݨائے ڳئن۔ ایں توں انڄ ،ویٹرنری لیبارٹری نیٹ ورک کوں تکڑا بݨاوݨ دا 75 فیصد کم مکمل تھی چکیے تے پہلی قومی پولٹری لیبارٹری کوں بین الاقوامی معیار دے جانچ پروگرام اچ شامل کر ڳھدا ڳئے۔انہاں مزید ݙسایا جو بیماریاں دی نگرانی کیتے الیکٹرانک اینیمل ڈیزیز رپورٹنگ سسٹم کوں اپ گریڈ کیتا ویندا پئے، جیندے تحت صوبائی و ضلعی سطح تے فوری ردِ عمل ٹیماں دی تربیت دے نال پہلی واری جنگلی حیات تے آبی حیوانات کوں وی نگرانی دے دائرہ کار اچ شامل کیتا ڳئے۔ رانا تنویر حسین زور ݙتا جو پاکستان ہک اوکھے وفاقی نظام اچ ایں نظام دے عملی نفاذ دے اپݨے تجربے عالمی برادری نال شیئر کرݨ کیتے تیار اے تے وبائیں نال نبڑݨ کیتے عالمی تعاون تے پائیدار مالی معاونت دا تسلسل ناگزیراے۔