وزیراعظم پٹرول ریلیف سکیم: 47 لکھ مستحق لوکاں کوں رعایتی پٹرول ݙتا ڳئے، 58 لکھ توں ودھ رجسٹریشن، انٹرنیٹ مسئلے آلے پمپاں تے ایس ایم ایس ایکٹیویشن کر ݙتی اے، شزا فاطمہ، بلال اظہر کیانی دی پریس کانفرنس

اسلام آباد۔25 ستمبر(اے پی پی) وفاقی حکومت وزیراعظم پٹرول ریلیف سکیم دے تازہ ترین اعدادوشمار جاری کریندے ݙسائے جو ہݨ تئیں ملک اچ 58 لکھ توں ودھ لوکاں دی رجسٹریشن مکمل تھی چکی اے جݙاں جو 61 لکھ ٹوکنز دے اجراء دے بعد 47 لکھ مستحق لوک پٹرول پمپاں توں رعایتی پٹرول حاصل کرچکئن۔ حکومت عوامی فیڈ بیک تے موٹر سائیکل سواراں کیتے ہکے ویلھے اچ 5 لیٹر پٹرول پوائے ونڄݨ دی شرط ختم کرݙتی اے جݙاں جو اوگرا دی نشاندہی تے انٹرنیٹ دی عدم دستیابی یا تکنیکی دقت دا سامݨا کرݨ آلے پٹرول پمپاں تے کل توں متبادل ایس ایم ایس بیسڈ ویریفکیشن دا باضابطہ نفاذ کر ݙتا ڳئے۔اے ڳالھ وفاقی وزیر آئی ٹی و ٹیلی کمیونیکیشن شزا فاطمہ خواجہ تے وزیرِ مملکت خزانہ بلال اظہر کیانی اسلام آباد اچ مشترکہ پریس کانفرنس توں خطاب کریندے آکھی۔ وفاقی وزیر آئی ٹی شزا فاطمہ خواجہ بریفنگ ݙیندے آکھیا جو خطے اچ کشیدگی تے عالمی سطح تے پٹرولیم مصنوعات دیاں قیمتاں اچ ودھارے دے اثرات توں کمزور طبقے کوں بچاوݨ کیتے وزیراعظم دی خصوصی فیول ریلیف سکیم چارے صوبیں، اسلام آباد، آزاد کشمیر تے گلگت بلتستان اچ کامیابی نال جاری اے۔ انہاں ݙسایا جو گزریل 8 ݙینھاں دے دوران 47 لکھ لوکاں ایں سکیم توں فیدہ چاتے جیندی لائیو جی آئی ایس تے ڈیش بورڈ دے ذریعے باقاعدہ مانیٹرنگ کیتی ویندی پئی اے جݙاں جو وزیراعظم ہر چار گھنٹے بعد خود رپورٹ گھندے پئن۔انہاں واضح کیتا جو عوامی سوکھ پاروں موٹر سائیکل، رکشہ تے چنگ چی کیتے اپݨی ملکیت دی شرط ختم کر ݙتی ڳئی اے، جے صارف اپݨے رجسٹرڈ شناختی کارڈ تے زیرِ استعمال سواری دے ایکسائز رجسٹریشن نمبر دے نال ون ٹائم رجسٹریشن کرگھنے تاں او ہفتہ وار 500 روپے دا ٹوکن حاصل کر سڳدے۔ ایں توں انڄ 800 سی سی تئیں دیاں گاݙیاں دے مالکان کیتے ہر10 ݙینھ بعد 10 لیٹر تے 100 روپے فی لیٹر رعایت ݙتی ویندی پئی اے۔ گاݙیاں تے موٹر سائیکلاں دی مدت دے حوالے نال انہاں ݙسایا جو ڈیٹا دے غلط استعمال کوں روکݨ کیتے رجسٹریشن دی حد 15 سال توں ودھا تے 20 سال توں ماڈلز تئیں وسیع کر ݙتی ڳئی اے۔ انٹرنیٹ مسئلے آلے پمپاں دے حوالے نال انہاں آکھیا جو اوگرا دی فہرست موجب سارے ایہو جیھے پمپاں تے ایس ایم ایس ایکٹیویشن ݙتی ڳئی اے تاں جو سپلائی اچ رکاوٹ نہ آوے۔ایں موقع تے وزیرِ مملکت خزانہ بلال اظہر کیانی آکھیا جو اے سکیم موٹر سائیکل، رکشہ، چنگ چی تے لوڈر چلاوݨ آلے محنت کشاں، طلبہ تے ملازمت پیشہ لوکاں کیتے عملاً ’’ہر ہفتے 500 روپے دا مفت پٹرول‘‘ تے ماہانہ 2 ہزار روپے دا براہِ راست ریلیف اے۔ انہاں آکھیا جو فیلڈ دوریں دے دوران اے ڳالھ سامݨے آئی جو شہری صرف اپݨا اصل شناختی کارڈ تے گاݙی دا رجسٹریشن کارڈ گھن تے پٹرول پمپ پڄ ونڄن تاں عملہ تے رضاکار موقع تے ہی چند منٹاں اچ تصدیق تے ٹوکن دا عمل مکمل کرݙیندن۔ انہاں مزید آکھیا جو پٹرولیم لیوی اچ چند روپے دی عمومی کمی دے بجائے مخصوص گھٹ آمدݨ آلے طبقے کوں 100 روپے فی لیٹر تئیں دا ٹارگٹڈ ریلیف ݙتا ڳئے جیڑھا جو فیول تے عائد سارے ٹیکساں دے خاتمے دے برابر بݨدے۔