امن، مزاکرات اتے سفارتکاری ہی آندیاں نسلاں دے محفوط مستقبل دی ضمانت، ڄڳ اچ امن و استحکام اتے خوشحالی کیتے انسانیت کوں ہک ٻئے دا ہتھ ونݙاوݨا ہوسی، وزیر اعظم شہباز شریف دا اقوام متحدہ دی جنرل اسمبلی دے 81 ویں اجلاس نال خطاب

نیویارک۔25 ستمبر(اے پی پی) وزیر اعظم شہباز شریف ڄڳ اچ امن و استحکام اتے خوشحالی کوں ودھاوݨ کیتے انسانیت کوں ہک ٻئے دا ہتھ ونݙاوݨ دی صلاح ݙیندے آکھیے جو جنگ دی بجائے امن، مزاکرات اتے سفارتکاری ودھاوݨ ہی ساݙیاں نسلاں دے محفوط مستقبل دی ضمانت تھی سڳدے۔ وزیر اعظم شہباز شریف نیویارک اچ اقوام متحدہ دی جنرل اسمبلی دے 81 ویں اجلاس نال اپݨا خطاب تلاوت کلام پاک نال شروع کریندے ماݨ کیتے جو اتھاں 24 کروڑ پاکستانیاں دی نمائندگی کریندا پیاں، ہک واری ول جنرل اسمبلی نال خطاب اعزاز اے، اے میݙا جنرل اسمبلی نال چوتھا خطاب اے، سیکرٹری جنرل انتونیو گوئترس دی خدمات کوں خراج تحسین پیش کرینداں۔ انہاں اجلاس اچ امن، سفارتکاری، کشمیر، فلسطین، دہشت گردی اتے مشرق وسطیٰ دی صورتحال سودھا اہم عالمی معاملات تے اپݨا تکڑا مؤقف پیش کیتے۔ وزیر اعظم خطے اچ امریکا اتے ایران وچال کشیدگی تے چنتا کریندے معاملات سفارتکار نال حل کرݨ تے زور ݙتے اتے آکھیے جو امن کوں اڳونہا کرݨ انسانیت کیلئے ہک عظیم کم اے، پاکستان ہمیشہ جنگ دی بجائے امن کوں اڳونہا رکھیے اتے سفارتکاری تے مذاکرات نال معاملیاں دا حل کݙھݨ کوں اپنائے۔ انہاں آکھیے جو مشرق وسطیٰ دی جنگ پاروں خطے ہی نئیں پورے ڄڳ دی معیشت متاثر تھئی اے، کئی قیمتی جاناں ضائع تھئن، ٻہوں وݙا معاشی نقصان تھئے جیندے توں ہر صورت بچݨ دی راہ کݙھݨی ہوسی۔انہاں خطے اچ امن اتے معاشی سرگرمیاں سانڳے باب المند اتے آبنائے ہرمز ہر صورت کھولݨ تے زور ݙیندے آکھیے جو پاکستان ایران اتے امریکا کوں مذاکرات دی میز تے کامیابی نال ڳھن تے آئے، ایں سانڳے اسلام آباد مفاہمت دی یادداشت تے دستخط ہک اہم کامیابی اے، خطے اچ کشیدگی مکاوݨ کیتے فیلڈ مارشل سید عاصم منیر دی سفارتکاری امن دی راہ کݙھݨ اچ گنجائش پیدا کیتی اے، امریکی صدر ڈونلڈ ٹرمپ وی صورتحال تے ݙاݙھی سنجیدگی اتے ذمہ داری ݙکھائی اے، سفارتکار دا مطالبہ ہݨ وی اڳو تے ودھݨا چاہیدے۔ سعودی عرب تے حملیاں دی شدید مذمت کریندے آکھیے جو پاکستان سعودی عرب نال مکمل یکجہتی کریندے، مکہ مکرمہ تے ڈرون حملے پوری امت کو غم و غصے اچ ولھیٹ ڳھدے۔ وزیر اعظم زور ݙتے جو حرمین شریفین دی سلامتی ساݙے کیتے ریڈلائن اے جیندے تے سمجھوتہ کیتا ویسی نا اے ریڈ لائن کوں کہیں صورت پار کرݨ دی اجازت ݙتی ویسی، پاکستان حرمین شریفین دی حفاظت کیلئے ٻھرا سعودی عرب اتے ایندے عوام دے نال کھڑے، مکہ دفاعی معاہدہ کہیں دے خلاف نئیں ٻھل اے خطے اچ امن اتے استحکا دا ضامن معاہدہ اے، پاکستان اتے ٻئے ملکاں وی سعودی عرب دے دفاع اتے محفوظ بحری رستیاں دی اہمیت تے زور ݙتے، ایں سانڳے مشترکہ کوششاں جاری رکھیاں ویسن، اتے حرمین شریف دی حرمت تے کوئی حرف نا آوݨ ݙتا ویسی۔ وزیر اعظم بھارت نال تعلقات تے وی کھل تے الائے اتے آکھیے جو بھارت عالمی قوانین اتے باہمی معاہدیاں دا پاس کرے، پاݨی کوں ہتھیار نئیں ٻݨاوݨا چاہیدا، سندھ طاس معاہدے کوں خراب کرݨ نال سنگین مسائل پیدا تھی سڳدن، عالمی برادری ٻھارت کوں پابند ٻݨاوے جو او عالمی قوانین دیاں دھڄیاں اݙاوݨ توں گریز کرے۔ انہاں کشمیر بارے پاکستان دا تکڑا موقف ول اڳونہا کریندے آکھیے جو کشمیر پاکستان دی شہ رگ اے، اے معاملہ اقوام متحدہ دیاں قرارداداں دے مطابق حل کیتا ونڄے۔ انہاں آکھیا جو ٻھارت کوں نئیں ٻھلݨا چاہیدا جو پاکستان فیلڈ مارشل دی اڳواݨی اچ اوکوں پہلے وی سبق سکھائے اتے ݙاݙھا مقابلہ کیتے ڄیکوں پورا ڄڳ منیندے جو بھارت کوڑا بیانیہ ٻݨا تے پاکستان تے حملہ کیتے اتے جنگ مسلط کرݨ دی کوشش کیتی ٻھل اوکوں ساݙے فوری اتے تکڑے جواب نال منہ دی کھاوݨی پئی اے، بھارت دی جارحیت دے ولدے اچ پاکستان اقوام متحدہ دے آرٹیکل 51 دے تحت مقابلہ کیتے اتے سبق سکھائے، اے او لمحہ ہا ڄݙاں ݙو ایٹمی ملک “آل آئوٹ جنگ” دی کندھی تے پڄ ڳئے ہن خطے کوں تباہی توں بچاوݨ کیتے امریکی صدر ڈونلڈ ٹرمپ ذمہ دارانہ اتے قابل تحسین کردار ادا کیتے، ہݨ وی لازمی ٻݨاوݨا ہوسی جو وݙی تباہی روکݨ کیتے مسئلہ کشمیر فوری طور تے حل کیتا ونڄے۔ اپݨے خطاب اچ انہاں دہشتگردی دا زکر کریندے فتنۃ الخوارج، فتنۃ الہندوستان اتے بی ایل اے کوں بیرونی فنڈنگ نال چلݨ آلے دہشتگرد گروپ قرار ݙتے اتے دہشتگردی دے خلاف پاکستان دیاں قربانیاں اتے مؤقف کوں عالمی برادری دے اڳو رکھیے، اسلاموفوبیا اتے خطے اچ ودھدی دہشتگردی دے خلاف مؤثر عالمی اقدامات تے وی زور ݙتے۔ انہاں آکھیا جو دہشتگردی دے خلاف جنگ اچ پاکستان ہزاراں جاناں قربان کیتن اتے 150 ارب ڈالر دا ودھ دا نقصان چاوݨا پئے، امن دی داعی ڄڳ کوں اے ڳالھ نئیں ٻھلݨی چاہیدی جو فتنہ الخوارج، فتنہ الھندوستان اتے بی ایل اے پاکستان کوں غیر مستحکم کرݨ اچ مصروف ہین، افغان سرزمین پاکستان یا کہیں وی ملک دے خلاف استعمال نئیں تھیوݨی چاہیدی۔ غزہ دی صورتحال تے چنتا کریندے اتھاں اسرائیلی جارحیت کوں ڄڳ کیتے ہک چیلنج قرار ݙتے جو غزہ اچ کئی نسلاں توں ٻال، تریمتیں، ٻݙھڑے اتے معصوم اسرائیلی بربریت دا شکار ہین، اسرائیلی بمباری اتے مظالم نال انسانیت وی شرما ڳئی اے جتھاں کہیں وی قانونی، اخلاقی اتے عالمی اقدار دا ماݨ نئیں رکھیا ڳیا، پاکستان یقین رکھدے جو فلسطینیاں کوں انہاں دا حق ݙیواوݨ کیتے اقوام متحدہ اتے عالمی برادری اپݨا کرادار ادا کریسی۔ انہاں لبنان اتے شام اچ وی اسرائیلی کارروائیاں دی مذمت کریندے آکھیے جو اسرائیل دا وسعت پسندانہ اتے جنگی جنون خطے ہی نئیں عالمی امن و سلامتی کیتے وݙا خطرہ ہین۔ چھیکڑ تے عالمی برادری کوں مخاطب کریندے وزیر اعظنم شہباز شریف زور ݙتے جو اپݨیاں آوݨ آلیاں نسلاں کوں ہک مضبوط، خوشحال اتے پائیدار مستقبل ݙیوݨ کیتے مسلیاں دا حل جنگاں دی بجائے، امن ، مذاکرات اتے سفارتکاری نال کݙھݨا ہوسی، ایں سانڳے انسانیت کوں جھیڑے مکا تے ہک ٻئے دے نال کھڑا تھیوݨا ہوسی۔