صدر آصف زرداری دا عالمی یومِ سیاحت تے پیغام

اسلام آباد۔27 ستمبر (اے پی پی) صدرِ مملکت آصف علی زرداری دنیا بھر دے سیاحواں کوں پاکستان دا دورہ کرݨ، پاکستانیاں دی مہمان نوازی توں لطف اندوز تھیوݨ تے اساݙے ملک دی متنوع خوبصورتی دا خود مشاہدہ کرݨ دی دعوت ݙیندے آکھیے جو سیاحتی شعبہ مہمان نوازی، احترام تے ذمہ واری دیاں حامل پراݨی اقدار نال ڳنڈھیے رہندے جدت کوں اپناوے، سیاحت روزگار دے حصول، معاشی سرگرمیاں دے ودھارے تے بالخصوص نوجواناں تے تریمتاں کیتے نویں موقع پیدا کرݨ اچ اہم کردار ادا کر سڳدی اے تاں جو اساکوں آوݨ آلی نسلاں کیتے اپݨے قدرتی ماحول، ثقافتی ورثے تے روایات دے تحفظ کوں وی یقینی بݨاوݨا ہوسی۔ انہاں اے ڳالھ عالمی یومِ سیاحت دے موقع تے اپݨے پیغام اچ آکھی جیڑھا پاکستان سودھے دنیا بھر اچ اڄ منایا ویندا پئے۔ صدرِ مملکت عالمی یومِ سیاحت تے پاکستان دے عوام، عالمی سیاحتی برادری تے انہاں سارے لوکاں کوں مبارخ ݙتی جیڑھے نویاں جہیں ، ثقافتاں تے معاشریں کوں دریافت کرݨ کیتے سفر کریندن۔ صدرِ مملکت آکھیا جو ایں سال عالمی یومِ سیاحت دا موضوع “سیاحت دی تشکیلِ نو کیتے ڈیجیٹل ایجنڈا تے مصنوعی ذہانت” ایں امر دی طرف توجہ مبذول کرویندے جو ٹیکنالوجی تے مصنوعی ذہانت لوکاں دے سفر دی منصوبہ بندی، سیاحتی مقامات دی تلاش تے مختلف ثقافتاں دا تجربہ کرݨ دے طریقیں اچ کیویں تبدیلیاں گھن آندیاں پئن۔ اساکوں ایں امر کوں یقینی بݨاوݨا ہوسی جو اے تبدیلیاں عوام تے معاشریں کیتے ذمہ دارانہ، جامع تے مفید رہن۔ صدرِ مملکت آکھیا جو پاکستان اچ دلکش مناظر تے سیاحتی تجربات دا بے مثال تنوع موجود اے جتھاں شمال دے پہاڑی سلسلیں تے وادی سندھ دی قدیم تہذیباں توں گھن تے اسلامی تے گندھارا ورثے، شہراں، صحراواں تے ساحلی علاقیں تئیں مختلف سیاحتی مقامات موجود ہن تاں جوپاکستان دی ساریں توں وݙی طاقت اونداں عوام دی گرمجوشی تے مہمان نوازی اے۔ انہاں آکھیا جو سیاحت روزگار دے حصول، مقامی کاروباراں دی معاونت تے نوجواناں تے خواتین کیتے نویں موقع پیدا کرݨ اچ اہم کردار ادا کر سڳدی اے۔ ایں توں انڄ سیاحت ملک دی کمیونٹیز اچ معاشی سرگرمیاں کوں ودھارا ݙے سڳدی اے۔ صدرِ مملکت ایں ڳالھ تے زور ݙتا جو ایں دے نال نال اساکوں آوݨ آلی نسلاں کیتے اپݨے قدرتی ماحول، ثقافتی ورثے تے روایات دے تحفظ کوں وی یقینی بݨاوݨا ہوسی۔ صدر آصف علی زرداری عالمی یومِ سیاحت دے موقع تے دنیا دے سیاحواں کوں پاکستان دا دورہ کرݨ، پاکستانیاں دی مہمان نوازی توں لطف اندوز تھیوݨ تے اساݙے ملک دی خوبصورتی تے تنوع دا خود مشاہدہ کرݨ دی دعوت ݙتی۔ انہاں آکھیا جو آؤ، اساں ایہو جیھا سیاحتی شعبہ تشکیل ݙیوں جیڑھا مہمان نوازی، احترام تے ذمہ واری دیاں حامل اساݙیاں اقدار نال ڳنڈھیے رہندے جدت کوں اپناوے۔ صدرِ مملکت آکھیا جو پاکستان دنیا کوں کھلے دل دے نال خوش آمدید آہدے