فتنہ الخوارج تے فتنہ الہندوستان دے ٻہوں سارے ٹھکاݨے تباہ، 71 دہشت گرد ہلاک، اسلحہ، گولہ بارود تے دھماکہ خیز مواد برآمد کر ڳھدا ڳیا، آئی ایس پی آر

راولپنڈی۔27ستمبر(اے پی پی) افغان طالبان حکومت بھارت دی حمایت تے سرپرستی اچ پاکستان اچ دہشت گردانہ سرگرمیاں اچ ملوث اے جیڑھی قیمتی جاناں دے مسلسل ضیان تے امن و استحکام کیتے خطرے دا باعث بݨدی پئی اے، پاکستانی خفیہ اداریں کوئٹہ دے ضلع شابان دے علاقے اچ فتنہ الخوارج تے فتنہ الہندوستان دے ٻہوں ٹھکاݨیں دی نشاندہی کیتی جیڑھے مقامی آبادی کیتے خطرہ بݨے ہوئن۔ پاک فوج دے شعبہ تعلقاتِ عامہ (آئی ایس پی آر) دی طرفوں جاری پریس ریلیز دے مطابق پاکستان دیاں سکیورٹی فورسز مصدقہ انٹیلی جنس معلومات دی بنیاد تے 21 ستمبر 2026ء کوں زیارت تے گردونواح دے علاقیں اچ دہشت گرداں دے خلاف تکھی رفتار آپریشن دا آغاز کیتے۔ آپریشن شابان دے دوران سکیورٹی فورسز دا دہشت گرداں نال آمݨا سامݨا تھئے انہاں ٻہوں سارے ٹھکاݨیں کوں تباہ کرݙتا۔ شدید فائرنگ دے تبادلے اچ ہݨ تئیں بھارت دے حمایت یافتہ 33 دہشت گرد ہلاک تھی چکئن جݙاں جو اسلحہ، گولہ بارود تے دھماکہ خیز مواد وی برآمد کیتا ڳئے۔ آئی ایس پی آر موجب گزریل 72 گھنٹے دے دوران آپریشن اچ تیزی آندی ڳئی جیندے نتیجے اچ مزید 23 دہشت گرد ہلاک کر ݙتے ڳئن۔ سکیورٹی فورسز ہک وسیع علاقے کوں کلیئر کروایا تے مقامی آبادی کوں فتنہ الخوارج تے فتنہ الہندوستان دے خطرے توں نجات ݙیوائی اے۔ اے کلیئرنس آپریشن خطرے دے مکمل خاتمے تئیں جاری رہسی۔ آئی ایس پی آر موجب 25 ستمبر 2026ء کوں ضلع نوشکی اچ انٹیلی جنس دی بنیاد تے کیتے ڳئے ہک ٻئے آپریشن اچ سکیورٹی فورسز دہشت گرداں دے ہک ٹھکاݨے کوں مؤثر طریقے نال نشانہ بݨایا تے بھارت دے حمایت یافتہ 11 دہشت گرداں کوں ہلاک کیتا۔ ایویں مند دے علاقے اچ سکیورٹی فورسز فتنہ الہند دے 6 دہشت گرداں کوں کامیابی نال ہلاک تے وݙی مقدار اچ اسلحہ و گولہ بارود وی برآمد کیتا۔ پاک فوج دے جاری آپریشن دے تحت گزریل 96 گھنٹے دے دوران آپریشن شابان تے بلوچستان دے ٻئے علاقیں اچ 71 توں ودھ دہشت گرد ہلاک تھی چکن جیندے نال بھارت دے حمایت یافتہ افغان آلۂ کاراں کوں شدید دھچکا لڳیے۔ نیشنل ایکشن پلان تے وفاقی ایپکس کمیٹی دے منظور شدہ “عزمِ استحکام” دے وژن دے تحت دہشت گردی دے خلاف مہم پورے عزم دے نال جاری رہسی۔ سکیورٹی فورسز تے قانون نافذ کرݨ آلے ادارے ملک توں غیر ملکی سرپرستی تے حمایت یافتہ دہشت گردی مکاوݨ کیتے پرعزم ہن۔