وزیرِریلوے حنیف عباسی دا ٹریکس دی بہتری، تجاوزات مکاوݨ تے آمدݨ ودھاوݨ دے اہداف تے سختی نال عملدرآمد دا حکم

لاہور۔27 ستمبر(اے پی پی) وفاقی وزیرِ ریلوے محمد حنیف عباسی ریلوے ٹریکس دی حفاظت و بہتری، جاری ترقیاتی منصوبیں دی وقتی تکمیل، تجاوزات مکاوݨ، سکریپ دی تلفی تے آمدݨ اچ مزید ودھارے کیتے مقررہ اہداف تے سختی نال عملدرآمد دی ہدایت کریندے آکھیے جو ریلوے دی کارکردگی بہتر بݨاوݨ کیتے سارے متعلقہ افسران اپݨے اپݨے فرض وقتی مکمل کرن۔ اے ہدایات انہاں اتوار کوں پاکستان ریلویز ہیڈکوارٹرز لاہور اچ منعقدہ اجلاس دی صدارت کریندے جاریاں کیتیاں۔ اجلاس اچ فیڈرل گورنمنٹ انسپکٹر ریلوے ٹریک متعلق تفصیلی بریفنگ ݙیندے مختلف تجویزاں پیش کیتیاں۔ وفاقی وزیرسارے ڈویژنل سپرنٹنڈنٹس کوں ہدایت کیتی جو فیڈرل گورنمنٹ انسپکٹر دیاں تجویزاں تے 20 اکتوبر تئیں عملدرآمد یقینی بݨایا ونڄے۔ اجلاس اچ روہڑی جنکشن دی اپ گریڈیشن دے منصوبے دا وی جائزہ ڳھدا ڳیا تے فیصلہ کیتا ڳیا جو روہڑی جنکشن دی اپ گریڈیشن دا کم 25 دسمبر تئیں مکمل کر ڳھدا ونڄے۔ وزیرِ ریلوے منصوبے دی وقتی تکمیل کیتے متعلقہ حکام کوں ضروری اقدامات چاوݨ دی ہدایت کیتی۔ محمد حنیف عباسی ریلوے نظام اچ موجود سکریپ کوں وی وقتی چاوݨ دی ہدایت کریندے آکھیا جو 31 دسمبر تئیں ریلوے سسٹم اچ موجود سارے سکریپ کوں ڈسپوز کیتا ونڄے۔ انہاں وے برجز تے اوورلوڈنگ دا سخت نوٹس گھندے ہدایت کیتی جو ایں حوالے نال موصول تھیوݨ آلی ہر شکایت تے فوری کارروائی کیتی ونڄے تے مقررہ وزن توں ودھ سامان دی ترسیل روکݨ یقینی بݨائی ونڄے۔ وفاقی وزیر ڈویژناں اچ جاری منصوبیں دی وقتی تکمیل کیتے وی اہم فیصلے کریندے ہوئیں آکھیا جو ہیڈکوارٹرز آفس ڈویژناں دی طرفوں بھیجی ونڄݨ آلی ڈیمانڈ دا 72 گھنٹیں دے اندر اندر جواب ݙیوݨ دا پابند ہوسی تاں جو منصوبیں تے ٻئے ضروری امور اچ غیر ضروری تاخیر دا خاتمہ کیتا ونڄ سڳے۔ انہاں ریلوے زمین تے قائم تجاوزات دے خلاف جاری کارروائیاں دا وی جائزہ ڳھدا تے واضح کیتا جو تجاوزات دے خلاف آپریشن اچ او ریلوے عملے دے نال کھڑن، ایں سلسلے اچ کہیں قسم دے دٻاؤ کوں خاطر اچ نہ آندا ونڄے۔ انہاں آکھیا جو تجاوزات دے خلاف کارروائی کوں کامیاب بݨاوݨ کیتے نیب تے ٻئے قانون نافذ کرݨ آلے اداریں دی معاونت وی حاصل کیتی ویندی پئی اے۔ محمد حنیف عباسی اپ گریڈ تھیوݨ آلی ٹریناں دے ریک دے حوالے نال وی ہدایات جاری کریندے آکھیا جو جئیں ریل گاݙی دا ریک اپ گریڈ کیتا ونڄے، اونکوں کہیں صورت تبدیل نہ کیتا ونڄے تاں جو مسافراں کوں ݙتیاں ونڄݨ آلیاں سہولتاں تے سروس دے معیار کوں برقرار رکھیا ونڄ سڳے۔ اجلاس اچ پاکستان ریلویز دی مالی کارکردگی دا وی جائزہ ڳھدا ڳیا۔ وفاقی وزیر مالی سال دی پہلی سہ ماہی اچ 26 ارب روپے دی آمدݨ حاصل کرݨ تے اطمینان دا اظہار کریندے ریلوے انتظامیہ کوں شاباش ݙتی تے ہدایت کیتی جو آمدݨ اچ مزید ودھارے، خرچے اچ گھٹکی تے تے مسافراں کوں بہتر سہولتاں ݙیوݨ کیتے اقدامات جاری رکھیے ونڄن۔