اقوامِ متحدہ اچ پاکستان دے مستقل مندوب دی سیکرٹری جنرل نال الوداعی ملاقات

اقوامِ متحدہ۔30 ستمبر(اے پی پی) اقوامِ متحدہ اچ پاکستان دے مستقل مندوب عاصم افتخار احمد یو این سیکرٹری جنرل انتونیو گوتریش نال الوداعی ملاقات کیتی، سیکرٹری جنرل عالمی ادارے تے ایں دے امن و ترقی دے ایجنڈے کیتے پاکستان دے قائدانہ کردار تے بھرپور حمایت دی تعریف کیتی، انہاں پاکستان دی ثالثی دیاں کوششاں تے اقوامِ متحدہ دی سلامتی کونسل دے موجودہ رکن دی حیثیت نال ایں دے کردار دی وی تعریف کیتی۔ اقوامِ متحدہ اچ پاکستانی مشن دی طرفوں جاری پریس ریلیز موجب انتونیو گوتریش سفیر عاصم افتخار احمد کوں پاکستان دا نواں سیکرٹری خارجہ مقرر تھیوݨ تے مبارخ ݙتی تے انہاں کیتے نیک خواہشات دا اظہار کیتا۔ سفیر عاصم افتخار احمد اپݨے دورِ سفارت دے دوران سیکرٹری جنرل تے انہاں دی ٹیم دی طرفوں ݙتے ڳئے تعاون تے اظہارِ تشکر کیتا تے کثیر جہتی نظام، اقوامِ متحدہ دے منشور تے بین الاقوامی قانون کیتے انہاں دی قیادت تے اصولی حمایت دی تعریف کیتی۔ عاصم افتخار احمد اپریل 2025ء توں اقوامِ متحدہ اچ پاکستان دے چیف ڈیلیگیٹ دے طور تے خدمات انجام ݙتیاں۔ انہاں اقوامِ متحدہ دی سلامتی کونسل اچ پاکستان دی رکنیت دے دوران وی ملک دی نمائندگی کیتی تے جولائی 2025ء اچ سلامتی کونسل دے صدر دی حیثیت نال فرائض انجام ݙتے۔ ایں توں پہلے او 2022ء توں 2024ء تئیں فرانس تے 2017ء توں 2021ء تئیں تھائی لینڈ اچ پاکستان دے سفیر تے وزارتِ خارجہ دے ترجمان وی رہ چکئن۔