سندھ طاس معاہدہ یکطرفہ طور تے معطل، منسوخ یا بدالیا نی ونڄ سڳدا، بھارت کوں پاݨی کوں بطورِ ہتھیار استعمال کرݨ دی اجازت نہ ݙتی ویسے،عطاء اللہ تارڑ

اسلام آباد۔30 ستمبر (اے پی پی) وفاقی وزیرِ اطلاعات و نشریات عطاء اللہ تارڑ آکھیے جو سندھ طاس معاہدہ یکطرفہ طور تے معطل، منسوخ یا بدالیا نی ونڄ سڳدا، پاݨی پاکستان دے 24 کروڑ عوام دا بنیادی تے مسلمہ حق اے، بھارت کوں پاݨی کوں بطورِ ہتھیار استعمال کرݨ دی اجازت نہ ݙتی ویسے، پاکستان بین الاقوامی قانون موجب آپݨے قومی مفادات دا دفاع جاری رکھیسی، سندھ طاس معاہدے دی حیثیت اچ یکطرفہ تبدیلی دے وسیع تر اثرات دنیا اچ سرحد پار پاݨیاں دے انتظام تے مرتب تھی سڳدن، عالمی برادری کوں ایں معاملے دی حساسیت دا ادراک کرݨا ہوسی۔ اے ڳالھ انہاں اتھاں انسٹیٹیوٹ آف سٹریٹجک سٹڈیز اسلام آباد (آئی ایس ایس آئی) اچ ”پاݨی دا بطورِ ہتھیار استعمال، سندھ طاس معاہدے دی معطلی دے تاریخی، قانونی و تذویراتی پہلو“ دے موضوع تے خصوصی رپورٹ دی تقریبِ رونمائی نال خطاب کریندے آکھی ۔ وفاقی وزیر آکھیا جو اساں اپݨی شناخت دریائے سندھ دے پاݨیاں نال وابستہ سمجھدوں، سندھ طاس معاہدے دے وجود اچ آوݨ تے ݙوہیں فریقین وچال دستخط ویلھے شاید اے تصور وی نہ کیتا ڳیا ہوسی جو کجھ ݙہاکیں بعد ایہوجیھا ویلھا وی آسی ڄݙاں بھارت قانونی تقاضیں توں لاعلم تے اخلاقی اقدار توں عاری تھی ویسے۔ انہاں آکھیا جو سندھ طاس معاہدہ شرئط و ضوابط دا تعین کرݨ آلا قانونی فریم ورک اے تے دستخط دے بعد ݙوہیں فریقین تے قانونی طور تے قابلِ نفاذ تے لازم اے۔ ڄݙاں معاہدے اچ اے شرط وی موجود ہووے جو ایں کوں یکطرفہ طور تے منسوخ، ختم یا بدالیا نی ونڄ سڳدا تاں ایں نال پاکستان دے موقف کوں قانونی تقویت تے جواز ملدے۔ عطاء اللہ تارڑ آکھیا جو معاہدے کوں نہ تاں یکطرفہ طور تے تبدیل، ختم یا منسوخ کیتا ونڄ سڳدے تے نہ ہی ایں کوں معطل کیتا ونڄ سڳدے۔ کہیں جھیڑے دی صورت اچ وی ݙوہیں فریق معاہدے دیاں شرائط و ضوابط تے عمل کرݨ دے پابند ہن۔ انہاں آکھیا جو اگست 2025ء اچ عالمی ثالثی عدالت پاکستان دے ایں موقف کوں قانونی جواز تے تقویت ݙتی جو معاہدے دی حیثیت کوں یکطرفہ طور تے بدالݨ دی کوئی کوشش نی کیتی ونڄ سڳدی۔ انہاں آکھیا جو حکومتِ پاکستان ایں معاملے کوں سفارتی انداز اچ اڳوں ودھایا، عالمی برادری نال رابطہ کرتے اپݨا قانونی تے سفارتی موقف پیش کیتا تے ہک ایہوجیھی ریاست دے طور تے اپݨا مقدمہ پیش کیتا جیڑھا ٻئیں دے حقوق دا احترام کریندی اے۔ وفاقی وزیر آکھیا جو ہݨے ہی اقوامِ متحدہ دی جنرل اسمبلی دے 81ویں اجلاس اچ وزیراعظم محمد شہباز شریف آکھیا جو سندھ طاس معاہدہ پاکستان تے خطے دے عوام کیتے زندگی دی شہ رڳ اے تے ایں حق کوں غصب کرݨ دی کہیں وی کوشش کوں جنگی اقدام تصور کیتا ویسے۔ انہاں آکھیا جو سندھ طاس معاہدے دے حوالے نال پاکستان دا موقف بالکل واضح اے۔ دفترِ خارجہ تے وزارتِ اطلاعات و نشریات نہ صرف عالمی اداریں بلکہ خطے دے ملکاں نال وی رابطے اچ ہن کیوں جو سندھ طاس معاہدہ خطے اچ امن تے استحکام دا ذریعہ اے۔ عطاء اللہ تارڑ آکھیا جو بھارت اپݨے غیر قانونی اقدامات دے دفاع کیتے مبینہ سرحد پار دہشت گردی کوں جواز دے طور تے پیش کریندے، تاں جو پاکستان دہشت گردی دے خلاف جنگ اچ ہزاراں جاناں دیاں قربانیاں ݙتن جݙاں جو گزریل کئی ݙہاکیں دے دوران پاکستان کوں 150 ارب ڈالر توں ودھ دے معاشی ضیان دا سامݨا کرݨا پئے۔ انہاں آکھیا جو دہشت گردی دے خلاف جنگ اچ ڄݙاں کوئی پاکستانی اپݨی جان دا نذرانہ پیش کریندے تاں او صرف پاکستان دے تحفظ کیتے کائناں بلکہ پوری دنیا کوں زیادہ محفوظ بݨاوݨ کیتے ہوندے۔ انہاں آکھیا جو پاکستان دہشت گردی دی جنگ اچ صفِ اول دا کردار ادا کریندا پئے جݙاں جو ݙوجھے پاسے بھارت جئیں سندھ طاس معاہدہ غیر قانونی طور تے معطل کرݨ دی کوشش کیتی لیکن کینیڈا تے ٻئے ملکاں اچ سکھاں سودھے اقلیتاں دے خلاف ماورائے سرحد قتل و کارروائیاں دے الزامات وی لڳئن۔ وفاقی وزیر آکھیا جو پاݨی کوں ہتھیار بݨاوݨ تے سندھ طاس معاہدے دے حوالے نال جھیڑا پیدا کرݨ دی کوشش قابلِ مذمت اے تے ایں کوں قانونی، سفارتی یا اخلاقی سطح تے جائز قرار نی ݙتا ونڄ سڳدا۔ انہاں آکھیا جو سندھ طاس معاہدے دے حوالے نال پاکستان دا موقف واضح اے تے ٻہوں سارے ملکاں پاکستان دے موقف دی تائید کیتی اے۔ ڄݙاں وی اے معاملہ عالمی سطح تے قانونی فورمز تے پیش تھیا، اتھاں وی پاکستان دے موقف کوں تقویت ملی اے۔ عطاء اللہ تارڑ آکھیا جو پاکستان ہک پرامن قوم اے تے امن تے یقین رکھیندے تاں جو بھارت کوں پاݨی کوں بطورِ ہتھیار استعمال کرݨ دی اجازت نہ ݙیسی کیوں جو اے پاکستان دے 24 کروڑ عوام دا بنیادی تے مسلمہ حق اے۔ انہاں آکھیا جو عالمی برادری کوں ایں معاملے اچ موجود وسیع تر مثال کوں وی سامݨے رکھݨا چاہیدے۔ جے کوئی ریاست متفقہ جھیڑے دے حل دے طریقہ کار دی موجودگی دے باوجود کہیں پابند بین الاقوامی آبی معاہدے کوں یکطرفہ طور تے معطل کر سڳدی اے تاں ایں دے اثرات دنیا اچ سرحد پار پاݨی دے انتظام تے ونڈ دے نظام تئیں کھنڈ سڳدن۔ ایں دے انہاں ملکاں تے وی اثرات پئے سڳدن جنہاں وچال پاݨی دی ونڈ دے حوالے نال معاہدے موجود ہن، ایں کیتے انسٹیٹیوٹ آف سٹریٹجک سٹڈیز اسلام آباد دا کم اہم اے، تحقیقی اداریں دی ذمہ واری اے جو او ایہوجیھی پیشرفت دا تاریخی، قانونی تے تذویراتی جائزہ گھن تے پالیسی سازاں تے عالمی برادری کوں شواہد تے مبنی تجزیہ کرن۔ وفاقی وزیر آکھیا جو سندھ طاس معاہدے دے حوالے نال جاری کیتی ونڄݨ آلی خصوصی رپورٹ ایں بحث اچ اہم کردار ادا کریندی اے جیندے اچ سندھ طاس معاہدے دی تاریخ، بھارت دے فیصلیں دے قانونی پہلوواں، اتلے علاقیں اچ آبی انفراسٹرکچر متعلق پیشرفت تے پاکستان سودھے پورے خطے تے ایں دے تذویراتی اثرات دا جائزہ ڳھدا ڳئے۔ انہاں واضح کیتا جو حکومتِ پاکستان عالمی برادری نال رابطے جاری رکھیسی تے بین الاقوامی قانون موجب پاکستان دے اہم قومی مفادات دا دفاع کریندی رہسی۔ جیڑھے ملک بین الاقوامی قانون دی پاسداری نی کریندے او ترقی نی کرسڳدے تے انہاں دے عزائم کوں دنیا چنڳی طرح ݙیکھ سڳدی اے۔ عطاء اللہ تارڑ آکھیا جو ثالثی عدالت اچ بھارت کوں جئیں سبکی دا سامݨا کرݨا پئے، ایں کوں ساریں ݙٹھے۔ وفاقی وزیر خصوصی رپورٹ جاری کرݨ تے انسٹیٹیوٹ آف اسٹریٹجک اسٹڈیز اسلام آباد دا شکریہ ادا کریندے آکھیا جو حکومت ایں مقصد کیتے ادارے دے نال مسلسل کم کرݨ چاہندی اے۔