نائب وزیراعظم دی صدارت اچ اجلاس، کݨک دی درآمد دے انتظامات تے پیشرفت دا جائزہ

اسلام آباد۔30 ستمبر (اے پی پی) نائب وزیراعظم و وزیرِ خارجہ سینیٹر محمد اسحاق ڈار دی صدارت اچ اجلاس تے کݨک دی درآمد دے انتظامات تے پیشرفت دا جائزہ ڳھدا ڳئے۔ دفترِ خارجہ توں جاری بیان موجب نائب وزیراعظم و وزیرِخارجہ فوڈ ایئر 2026-27ء کیتے کݨک دی درآمد متعلق سٹیئرنگ کمیٹی دے 7ویں اجلاس دی صدارت کیتی۔ کمیٹی کݨک دی درآمد دے انتظامات بارے پیشرفت دا جائزہ ڳھدا تے ٹریڈنگ کارپوریشن آف پاکستان (ٹی سی پی) کوں ہدایت کیتی جو سندھ دی کݨک دی باقی ماندہ ہک لکھ 85 ہزار میٹرک ٹن لوڑھ دی خریداری کیتے گھٹ توں گھٹ ٻولی/ٻولیاں کوں قبول کرݨ دا عمل اڳوں ودھایا ونڄے۔ نائب وزیراعظم پنجاب، سندھ تے خیبر پختونخوا دیاں حکومتاں کوں وی ہدایت کیتی جو مطلوبہ ادائیگیاں دا وقتی انتظام کرن تے ٹی سی پی دے نال سہ فریقی معاہدے وقتی مکمل کرن تاں جو کݨک دی درآمد دا عمل وقتی مکمل کیتا ونڄ سڳے۔ انہاں ایں ڳالھ تے زور ݙتا جو کݨک دی درآمد نال مناسب نرخاں تے کݨک دی وافر فراہمی یقینی بݨائی ونڄ سڳسی تے عوام کوں ودھ توں ودھ ریلیف ملسی۔ اجلاس اچ وفاقی وزیرقومی غذائی تحفظ و تحقیق، سندھ دے وزیرِ خوراک، معاونِ خصوصی وزیراعظم طارق باجوہ، سیکرٹری تجارت، منیجنگ ڈائریکٹر پاسکو، متعلقہ صوبائی سیکرٹریز تے وزارتِ قومی غذائی تحفظ و تحقیق تے ٹی سی پی دے سینئر حکام شرکت کیتی۔