جوائنٹ ایکشن کمیٹی تے پی ٹی آئی اچ ٻہوں ساریاں مشترک ہن، طلال چوہدری

اسلام آباد۔4 اکتوبر (اے پی پی) وزیرِمملکت داخلہ طلال چوہدری پریس کانفرنس کریندے آکھیے جو جوائنٹ ایکشن کمیٹی تے پی ٹی آئی وچال کئی ڳالھیں مشترک ہن۔ پی ٹی آئی دے لانگ مارچ آلے ݙینھ ہی جوائنٹ ایکشن کمیٹی وی احتجاج تے ہڑتال دی کال ݙتی، جینکوں کشمیری عوام مکمل طور تے مسترد کر ݙتے۔ انہاں آکھیے جو ہمسایہ ملک اپݨی پراکسیاں دے ذریعے پاکستان اچ عدم استحکام پیدا کرݨ چاہندے۔وزیرِ مملکت انکشاف کیتا جو افغانستان توں قبائلی علاقیں دے ذریعے آزاد کشمیر اچ غیر قانونی اسلحہ ݙتا ویندا پیا ہئی۔ ایں کیس اچ ضیا نامی ملزم دی گرفتاری بعد مزید تحقیقات دے نتیجے اچ ترئے ٻئے بندے،وقار حمید، محمد علی تے عمار سہیل کوں گرفتار کیتا ڳئے، جنہاں دے رابطے جوائنٹ ایکشن کمیٹی دی قیادت نال ملدن۔ پریس کانفرنس اچ انہاں ملزماں دے اعترافی ویڈیو بیانات وی پیش کیتے ڳئے، جنہاں اچ سکیورٹی فورسز تے فائرنگ، کشمیر مورچے اچ مسلح بندے بھیڄݨ تے راولپنڈی توں اسلحہ منگواوݨ دا اعتراف کیتا ڳئے۔طلال چوہدری آکھیے جو انہاں گرفتاریاں کوں “لاپتا لوکاں” دا رنگ ݙے تے پراݨا بیانیہ بݨاوݨ دی ناکام کوشش کیتی ڳئی۔ انہاں وضاحت کیتی جو جوائنٹ ایکشن کمیٹی دے 38 اچوں 37 مطالبے من ڳھدے ڳئن، ایندے باوجود پرتشدد احتجاج، کاروباری سرگرمیاں معطل کرݨ تے ٻالاں کوں تعلیم توں محروم رکھݨ عوام دے حقوق دی جنگ نی تھی سڳدی۔ انہاں زور ݙتا جو آزاد کشمیر اچ منتخب حکومت کم کریندی پئی اے تے ملک کوں عدم استحکام نال ݙوچار کرݨ دیاں ایہوجہیاں ساریاں سازشاں پہلے وی ناکام تھئن تے اڳوں وی ناکام رہسن۔