پی ٹی آئی نال مذاکرات ختم، اسلام آباد تے چڑھائی کہیں صورت برداشت نہ تھیسی، محسن نقوی

لاہور۔4 اکتوبر (اے پی پی) وفاقی وزیرِ داخلہ محسن نقوی آکھیے جو پاکستان تحریک انصاف نال مذاکرات ختم تھی ڳئن، حکومت کہیں وی صورت 9 مئی جیھے واقعات ول نہ تھیوݨ ݙیسی، ایں سارے معاملے کوں خراب کرݨ دے ذمہ وار وزیراعلیٰ خیبرپختونخوا ہن،جے ہک وی جان ویندی اے تاں ایں دے ذمہ وار وی وزیراعلیٰ خیبرپختونخوا ہوسن۔اتوار کوں قذافی سٹیڈیم اچ پریس کانفرنس نال خطاب کریندے انہاں آکھیا جو حکومت تے پاکستان تحریک انصاف وچال مذاکرات ون ون صورتحال اچ پڄ ڳئے ہن لیکن وزیراعلیٰ خیبرپختونخوا دی طرفوں معاہدے دے مسودے اچ ول ول تبدیلیاں کرݨ پاروں معاملہ خراب تھئے، مذاکرات ختم تھی چکئن تے حکومت اسلام آباد تے کہیں صورت چڑھائی کرݨ دی اجازت نہ ݙیسی۔ انہاں آکھیا جو صدرِ مملکت تے وزیراعظم مکمل طور تے رابطے اچ ہن۔انہاں صدرِ پاکستان کوں فائنل ڈرافٹ ݙکھایا ہئی تاں جو واپس آوݨ تے پتہ لڳیا جو وزیراعلیٰ خیبرپختونخوا ایں اچ تبدیلیاں کرݙتن۔ ہک ہک کرتے سارے معاملے حل کیتے ڳئن لیکن بعد اچ ڈرافٹ اچ مزید تبدیلیاں دا آکھیا ڳیا تے چار واری مسودے اچ تبدیلیاں کیتیاں ڳئیاں۔ انہاں آکھیا جو مذاکراتی عمل اچ علامہ ناصر عباس، اسد قیصر، بیرسٹر گوہر تے عامر ڈوگر نیک نیتی نال کوشش کیتی تاں جو بدقسمتی نال انہاں دی اپݨی جماعت دی طرفوں مذاکرات کوں سبوتاژ کرݨ دی کوشش کیتی ڳئی۔ جے فیصلے وزیراعلیٰ خیبرپختونخوا ہی کرݨے ہن تاں انہاں کوں خود مذاکرات اچ شامل تھیوݨا چاہیدا ہئی۔محسن نقوی آکھیا جو ݙو ݙینھ پہلے انہاں بیرسٹر گوہر کوں آکھیا ہئی جو وزیراعلیٰ خیبرپختونخوا اپݨا کوئی نمائندہ بھیج ݙیون تاں جو صوبے اچ دہشت گردی دے حوالے نال درپیش مشکلات تے انہاں نال ڳالھ کیتی ونڄ سڳے۔ متعلقہ لوک وزیراعلیٰ خیبرپختونخوا نال مذاکرات کرتے واپس آئے تاں جو ایں دے بعد وی ڈرافٹ اچ تبدیلیاں سامݨے آندیاں ریہاں۔ انہاں آکھیا جو وزیراعلیٰ خیبرپختونخوا کوں مذاکرات کیتے سݙایا ڳیا لیکن او نی آئے۔وفاقی وزیرِ داخلہ آکھیا جو جے حکومت کوں اندازہ ہوندا جو اپوزیشن کمیٹی اچ کوئی ایہوجیھا شخص موجود کائنی جئیں کنے خیبرپختونخوا حکومت دا مینڈیٹ ہووے تاں مذاکرات نہ کیتے ویندے۔ انہاں آکھیا جو حکومتی ارکان وی نیک نیتی نال مسئلہ حل کرݨ دی کوشش کیتی تے حکومتی ٹیم وی ایں دا کریڈٹ گھنݨ دی حق دار اے۔انہاں آکھیا جو مذاکرات اچ چھی، ست نکات ہن تے انہاں اچ کوئی ہک وی ایہوجیھا نکتہ کائناں ہئی جیندا تعلق سیاست نال ہووے، سارے معاملے دہشت گردی دے حوالے نال ہن۔ حکومت چاہندی اے جو خیبرپختونخوا اچ دہشت گردی دے خلاف سارے رل تے کھڑے تھیون۔ اے نی تھی سڳدا جو صوبے اچ دہشت گردی جاری ہووے تے صوبائی حکومت دے وزرا فوج دے خلاف بیانات ݙیون یا شہدا دے جنازیں اچ شرکت نہ کرن۔محسن نقوی آکھیا جو حکومت کنے شکایات ہن جو مقامی سطح تے دہشت گرداں کوں حمایت ݙتی ویندی پئی اے، جیندی تحقیقات تے تدارک ضروری اے۔ انہاں آکھیا جو وزیراعلیٰ خیبرپختونخوا رات نو وڄ تےپندرہ منٹ تے متحرک تھئے، ہک واری تبدیلی دا آکھیا ڳیا تے ݙوجھی وار وی تبدیلی کیتی ڳئی، ایں دا مقصد کیا ہئی، اے سوال اہم اے۔ انہاں آکھیا جو مذاکرات اچ وزیراعلیٰ دے نال موجود لوک وی کجھ نکات تے ڳالھ کرݨ توں انکار کیتا۔وفاقی وزیرِ داخلہ واضح کیتا جو حکومت دی طرفوں لانگ مارچ ملتوی کرݨ دی کوئی درخواست نی کیتی ڳئی البتہ پاکستان پیپلز پارٹی انہاں کوں لانگ مارچ ملتوی کرݨ دا آکھیا ہئی۔ انہاں آکھیا جو حکومت پہلے ہی واضح کر ݙتا ہئی جو لانگ مارچ شروع تھیوݨ دی صورت اچ مذاکرات ختم تھی ویسن۔انہاں آکھیا جو احتجاج ہر کہیں دا حق اے لیکن اسلام آباد تے چڑھائی دی اجازت نہ ݙتی ویسی۔ دھرنے کیتے جمع تھیوݨ آلے لوک قانون تے عدالت دے احکامات دی خلاف ورزی کریسن تاں انہاں دے خلاف کارروائی تے مقدمات چلائے ویسن۔ وفاقی وزیرِ داخلہ آکھیا جو حکومت کوں پتہ اے جو لانگ مارچ کیتے کئیں قسم دی تیاری کیتی ویندی پئی اے۔ اے نی تھی سڳدا جو صوبائی حکومت اقتدار دے فیدے وی حاصل کرے تے اپݨی مرضی نال ایہوجیھے اقدامات وی کرے جیڑھے ریاستی مفادات دے خلاف ہوون۔ انہاں آکھیا جو صدرِ مملکت تے وزیراعظم کوں گزریل رات دی صورتحال دا ݙسا ݙتا ڳئے تے ݙوہیں رل تے اڳوں فیصلہ کریسن۔محسن نقوی آکھیا جو حکومت تے مذاکراتی ٹیم گزریل ݙو ݙینھ نیک نیتی نال مسئلے دے حل دی کوشش کیتی۔ انہاں علامہ ناصر عباس، اسد قیصر، بیرسٹر گوہر تے عامر ڈوگر دا مذاکرات اچ نیک نیتی نال کردار ادا کرݨ تے شکریہ ادا کیتا تے آکھیا جو اسد قیصر ابتدا اچ ٻہوں چنڳاں جواب ݙتا ہئی۔انہاں آکھیا جو حکومت دی خواہش اے جو خیبرپختونخوا اچ دہشت گردی دے خلاف سارے ھک تھی تے کم کرن، تاں جو ایہوجیھے حالات اچ اے ممکن کائنی جو صوبے اچ دہشت گردی جاری ہووے تے صوبائی حکومت دا طرزِ عمل ایں دے برعکس ہووے ۔ انہاں آکھیا جو صدرِ مملکت تے وزیراعظم مکمل رابطے اچ ہن تے جیڑھا وی فیصلہ کیتا ویسی، او ملک دے بہترین مفاد اچ ہوسی۔