تحریکِ انصاف اپݨی دوغلی پالیسیاں توں دستبردار تھیوݨ تے آمادہ کائنی، عطاء اللہ تارڑ

اسلام آباد۔4 اکتوبر (اے پی پی) وفاقی وزیرِ اطلاعات و نشریات عطاء اللہ تارڑ آکھیے جو پی ٹی آئی دا وطیرہ ریہے جو اے ڳالھ مہاڑ کیتے آندے ضرور ہن مگر ݙوڑا معیار تے منافقت نال اپݨی دوغلی پالیسیاں کوں چھوڑݨ کیتے تیار کائںی تھیندے، اے یو ٹرن گھنݨ دے ماہر ہن تے اپݨی کہیں ہک ڳالھ تے قائم نی رہ سڳدے۔اتھاں خصوصی ڳالھ مہاڑ کریندے وفاقی وزیرِ اطلاعات آکھیا جو خیبر پختونخوا صوبے دے غیور عوام کوں تحفظ تے سکیورٹی ݙیوݨ صوبائی حکومت دی ذمہ واری اے۔ جے صوبائی حکومت اپݨے شہریاں دے جان و مال دا تحفظ نی کرسڳدی تاں اے ایں دی مکمل ناکامی اے۔ انہاں آکھیا جو تحریکِ انصاف دے اندروں مختلف بیانات سامݨے آندے پئن، سلمان اکرم راجہ ہک ڳالھ کریندے پئن جݙاںجو شفیع جان دا آکھݨ اے جو اساں دہشت گردی دے حوالے نال اپݨی پالیسی تبدیل کرݨی اے۔ انہاں آکھیا جو تحریکِ انصاف دی پالیسی دہشت گردی دی حوصلہ افزائی، دہشت گرداں کوں پروان چڑھاوݨ تے دہشت گردی کوں پورے صوبے اچ کھنڈاوݨ توں علاوہ کجھ کائنی۔وفاقی وزیرآکھیا جو انہاں کوں ہݨ انتخاب کرݨا ہوسی جو اے پاکستان دے نال ہن یا افغانستان دے نال، اے فیدے پاکستان توں گھندن تے حمایت افغانستان دی کریندن، اے ݙوڑا معیار نی چل سڳدا۔ انہاں آکھیا جو تحریکِ انصاف دی حکومت دہشت گردی دے خلاف نہ کارروائی کیتی، نہ کݙاہیں اونر شپ ڳھدی تے نہ ایں حوالے نال کوئی سنجیدگی ݙکھائی اے تے نہ انہاں دی خواہش اے جو ایں حوالے نال کجھ کرن۔ انہاں آکھیا جو اے جئیں پالیسی چینج دی ڳالھ کریندے پئن اے دہشت گرداں کوں تحفظ ݙیوݨ دے مترادف اے۔ اے ݙوڑا معیار، منافقت تے دوغلی پالیسی اے، ایں وجہ نال ہنگو، ڈی آئی خان تے کوہاٹ اچ نشوم شہریاں تے ٻالاں دیاں لاشاں ڈھاندیاں پئن، ریسکیو ورکرز دا خون وہندا پئے جݙاں جو وزیراعلیٰ سہیل آفریدی دی ترجیح قیدی دی رہائی اے۔انہاں آکھیا جو دہشت گردی دے خلاف اقدامات دے حوالے نال وفاقی حکومت کئی واری آکھ چکی اے جو انہاں کوں کارروائی توں کئیں روکیے؟ ڄݙاں وفاقی ایپکس کمیٹی دے اجلاس تھیندن تاں صوبائی ایپکس کمیٹی دے اجلاس سݙݨ توں انہاں کوں کئیں روکیے؟ ٻیاں ساریاں صوبائی حکومتاں اپݨی سطح تے ایپکس کمیٹی دے اجلاس سݙیندن لیکن پی ٹی آئی دی واحد صوبائی حکومت اے جیڑھی ایپکس کمیٹی دا اجلاس نی سݙیندی ۔ ایں دی وجہ ایہا اے جو پی ٹی آئی دہشت گرداں دے خلاف کارروائی نی چاہندی۔ ایں کیتے ایں کوں ٹی ٹی پی دی ”بی“ ٹیم تے ٹی ٹی اے دی ”سی“ ٹیم آہدن کیوں جوانہاں دے نظریات، خیالات تے اقدامات دے تانے بانے دہشت گرداں نال ملدن۔وزیرِ اطلاعات آکھیا جو انہاں کوں شہداء دے جنازیں اچ شرکت کرݨ تے انہاں دے لواحقین نال ہمدردی دا اظہار کرݨ توں کون روکیندے۔ انہاں کوں سکیورٹی فورسز نال اظہارِ یکجہتی کرݨ یا ایف سی اہلکاراں کنے ونڄݨ توں کئیں روکیے؟ انہاں کوں سی ٹی ڈی قائم کرݨ، سیف سٹی کیمرے نصب کرݨ، فرانزک لیب بݨاوݨ تے پولیس کوں ضروری آلات ݙیوݨ تے ایں دی استعدادِ کار ودھاوݨ توں کون روکیندے؟وزیرِ اطلاعات آکھیا جو پی ٹی آئی دی صوبائی حکومت کوں ہݨ تئیں کاؤنٹر ٹیررازم کیتے این ایف سی ایوارڈ دے تحت 700 ارب روپے توں ودھ مل چکئن جݙاں جو اڄوکے سال دے اعداد و شمار 45 ارب روپے ہن۔ پولیس دی استعدادِ کار اچ ودھارے تے کاؤنٹر ٹیررازم کیتے مختص رقم اچوں صرف ݙڈھ ارب روپے جاری کیتے ڳئن جݙاں جو باقی رقم تنخواہواں، پٹرول تے ٻئے حکومتی اخراجات تے خرچ تھیندی پئی اے۔ انہاں سوال کیتا جو کیا ایں ایویں دہشت گردی دا تدارک یا ایں دے خلاف جنگ لڑی ونڄ سڳدی اے؟وفاقی وزیر آکھیا جو انہاں دا ذہن دہشت گردی دے حامی تے دہشت گرداں دے حق اچ اے۔ انہاں کوں ایں ڳالھ دی وی پرواہ نی جو سکیورٹی فورسز، مسلح افواج تے پولیس دے ہزاراں جوان تے افسران شہید تھی چکئن۔ انہاں آکھیا جو انہاں کوں کݙاہیں  اے توفیق نی تھئی جو ٹی ٹی اے دی مذمت کرن تے آکھن جو کوہاٹ دی پاسوں ڈرون حملے دی مذمت کریندن تے ایں دا بھرپور جواب ݙیوݨ ڄاݨدن۔وزیرِ اطلاعات آکھیا جو کرم اچ فائرنگ دے واقعات تے وی کیا انہاں کݙاہیں آکھیا جو افغانستان دی طرفوں تھیوݨ آلی فائرنگ دی پرزور مذمت کریندن؟ اڄ تئیں انہاں دے منہ توں ایہوجہھے الفاظ سݨݨ کوں نی ملیے۔ انہاں آکھیا جو اے نہ شہداء دی تکریم کرسڳدن تے نہ دہشت گردی دے خلاف مؤثر اقدامات کیوں جو ایہا او جمات اے جیندے کیپٹن کرنل شیر خان جیھے بہادر جوان دے مجسمے دی بے حرمتی کیتی تے چاغی دے پہاڑ دے ماڈل کوں بھاہ لاتی۔ انہاں سوال کیتا جو دہشت گرد تے شرپسند ذہن رکھݨ آلے لوک حکومت اچ رہندے دہشت گردی کیویں روک سڳدن؟ انہاں آکھیا جو کیا خیبر پختونخوا حکومت ایں ذہنیت دے نال دہشت گردی روک سڳدی اے؟ ایں دا جواب نفی اچ اے۔انہاں آکھیا جو دہشت گردی دے خاتمے دی بجائے انہاں دی پالیسی دہشت گرداں کوں ودھارا ݙیوݨ تے انہاں کوں مزید اڳوں ودھاوݨ دی اے۔ وفاقی وزیر آکھیا جو اے آہدن جو شہریاں دے جان و مال دا تحفظ اساݙا مینڈیٹ کائنی، جݙاں جو پولیس تے سکیورٹی فورسز دے افسران و جوان تے شہری اپݨی جاناں دے نذرانے پیش کریندے پئن لیکن انہاں دی ساری توجہ ہک ہی مطالبے تے مرکوز اے جو قیدی کوں رہا کیتا ونڄے۔وفاقی وزیرِاطلاعات سوال کیتا جو امن و امان دے قیام تے دہشت گردی دے تدارک کیتے صوبائی حکومت کیا کریندی پئی اے؟ انہاں آکھیا جو خیبر پختونخوا حکومت دہشت گردی کھنڈݨ دی ذمہ وار اے تے ایں دے سارے اقدامات دہشت گرداں دی حمایت دی عکاسی کریندن۔ انہاں آکھیا جو صوبے اچ نیشنل ایکشن پلان تے عملدرآمد کائنی کیتا ڳیا، ایپکس کمیٹی دے اجلاس نی سݙئے ڳئے، پولیس دی استعدادِ کار اچ ودھارے کیتے اقدامات نی کیتے ڳئے، سی ٹی ڈی قائم نی کیتی ڳئی، فرانزک لیبارٹریاں نی بݨائیاں ڳئیاں تے شہراں اچ سیف سٹی کیمرے نصب نی کیتے ڳئے۔ انہاں آکھیا جو دہشت گرداں، کالعدم ٹی ٹی پی تے کالعدم ٹی ٹی اے دی وی مذمت نی کیتی ڳئی۔وزیرِ اطلاعات آکھیا جو پاکستان دی مسلح افواج افغانستان دی طرفوں کہیں وی ڈرون حملے یا فائرنگ دا بھرپور جواب ݙیندن تاں جو خیبر پختونخوا حکومت کݙاہیں اپݨی فوج تے ملک دے رلے کھڑی نی تھئی۔ انہاں آکھیا جو کوہاٹ دی پاسوں ڈرون حملے دے موقع تے صوبائی حکومت کوں ایں دی مذمت کریندے عوام دے نال کھڑا تھیوݨا چاہیدا ہئی۔ عطاء اللہ تارڑ آکھیا جو خیبر پختونخوا حکومت اچ اتنی وی سکت کائنی جو اپݨے عوام کوں حوصلہ ݙیوے۔انہاں آکھیا جو میں کوہاٹ تے ہنگو ڳیاں جتھاں زخمی شہری اے عزم ظاہر کریندے پئن جو او دہشت گرداں کوں نہ چھوڑیسن تے انہاں توں بدلہ گھنسن۔ وفاقی وزیرِ اطلاعات آکھیا جو خیبر پختونخوا حکومت کوں حکومت چلاوݨ دا طریقہ سمجھ نی آندا پیا۔ انہاں آکھیا جو ساریاں چیزاں ثانوی ہن، حکومت دی اولین ذمہ واری سیفٹی تے سکیورٹی ہوندی اے، انہاں کوں دھرنے دی پئی ہوئی اے، ایہ آون، اساں مکمل بندوبست کریسوں، کہیں کوں امن و امان خراب کرݨ نہ ݙیسوں۔انہاں آکھیا جو اساݙی ذمہ واری اے جو اساں اپݨے شہریاں دے جان و مال دا تحفظ یقینی بݨاوݨا اے۔ انہاں آکھیا جے خیبر پختونخوا حکومت پورے صوبے اچ سکیورٹی دی صورتحال بہتر نی بݨا سڳدی تاں صوبے دے ٻئے معاملے کیویں درست کریسی؟ وفاقی وزیرِ اطلاعات آکھیا جو صوبائی حکومت دا ݙوڑا معیار، دوغلی پالیسی تے دہشت گرداں دے نال مبینہ گٹھ جوڑ ہݨ کھل تے سامݨے آڳئے تے اے ایں دی مکمل ناکامی اے۔انہاں آکھیا جو صوبائی حکومت دے وزراء ہݨ دہشت گردی دے حوالے نال پالیسی تبدیل کرݨ دی ڳالھ کریندے پئن کیوں جو اے چاہندن جو دہشت گرداں کوں مزید سپیس ملے تے انہاں دے مالی معاملے مزید اڳوں ودھن۔ انہاں آکھیا جو صوبے اچ غیر قانونی مائننگ، غیر قانونی تجارت تے سمگلنگ جیھے معاملیں کوں ودھارا ݙیوݨ کیتے دہشت گردی دے خلاف مؤثر اقدامات توں گریز کیتا ویندا پئے۔ ایں کیتے نیشنل ایکشن پلان دے تحت ایپکس کمیٹی دے اجلاس نی سݙیے ویندے تے دہشت گردی دے خاتمے کیتے مطلوبہ اقدامات نی کیتے ویندے۔انہاں آکھیا جو دہشت گردی دے ودھارے دا مقصد سمگلنگ، غیر قانونی تجارت تے ٻیاں غیر قانونی سرگرمیاں کوں ودھاوݨا تے مالی فیدے حاصل کرݨا اے کیوں جو اے طرزِ عمل انہاں دی سیاست کیتے موزوں اے۔ وفاقی وزیرِ اطلاعات آکھیا جو او پہلے وی آکھ چکئن جو شہریاں دی حفاظت تے انہاں دے جان و مال دا تحفظ حکومت دی اولین ترجیح اے۔ انہاں آکھیا جو سیاست بعد دی ڳالھ اے، خیبر پختونخوا حکومت کوں چاہیدے جو عوام دے جان و مال دا تحفظ یقینی بݨاوے تے دہشت گردی دے خلاف مؤثر اقدامات کرے۔ انہاں آکھیا جو دہشت گردی دے خلاف کارروائی نہ کرݨ دی وجہ اے ہے جو صوبائی حکومت کیتے ذاتی تے سیاسی مفادات مقدم ہن جݙاں جو خیبر پختونخوا دے عوام دے مفادات دی انہاں کیتے کوئی حیثیت کائنی۔