سری لنکا نال ٹی 20 اتے ون ڈے ٹرائی سیریز: قومی کرکٹ ٹیم دے کھلاڑیاں دا اعلان

اسلام اباد۔5 اکتوبر(اے پی پی)سری لنکا نال ترائے ٹی 20 اتے ٹرائی سیریز کیتے 15 رکنی قومی سکواڈ دا اعلان کر ݙتا ڳئے۔ صاحبزادہ فرحان سری لنکا دے خلاف ٹی ٹوئنٹی سیریز اچ ٹیم دی کپتانی کریسن ڄݙاں جو شاہین شاہ آفریدی انگلینڈ اتے سری لنکا دے خلاف ون ڈے ٹرائی سیریز اچ کپتان رہسن۔ پاکستان اتے سری لنکا دے ٹی ٹوئنٹی میچز راولپنڈی کرکٹ سٹیڈیم اچ کھیڈیے ویسن۔ پہلا ٹی ٹوئنٹی 9 اکتوبر، ݙوجھا 11 اکتوبر اتے تریجھا میچ 13 اکتوبر کوں تھیسی۔ سری لنکا دے خلاف ٹی ٹوئنٹی سکواڈ اچ صاحبزادہ فرحان، عبدالصمد، ابرار احمد، عرفات منہاس، فخر زمان، حسن نواز، محمد عمران رندھاوا اتے خواجہ نافع (وکٹ کیپر) شامل ہین۔ معاذ صداقت، نسیم شاہ، رضا اللہ، صائم ایوب، محمد سلمان مرزا، شاداب خان اتے سفیان مقیم وی 15 رکنی ٹی ٹوئنٹی سکواڈ اچ شامل ہین۔ پاکستان، انگلینڈ اتے سری لنکا وچال 7 میچاں دی ون ڈے ٹرائی سیریز تھیسی۔ سیریز دے پہلے ترائے میچ راولپنڈی اچ تھیسن، باقی لیگ میچز اتے فائنل لاہور اچ کھیڈے ویسن۔ 16 رکنی ون ڈے سکواڈ دی قیادت شاہین شاہ آفریدی کریسن، سکواڈ اچ ابرار احمد، سلمان علی آغا، عرفات منہاس، بابر اعظم، فہیم اشرف، فخر زمان، محمد غازی غوری، حارث رؤف، حسن نواز، نسیم شاہ، رضا اللہ، سعد بیگ، صائم ایوب، شاداب خان تے سفیان مقیم شامل ہن۔ ٹیم مینجمنٹ اچ مائیک ہیسن ہیڈ کوچ، شان ٹیٹ بولنگ کوچ اتے مائیکل سمتھ بیٹنگ کوچ ہوسن۔ منصور امجد فیلڈنگ کوچ ہوسن۔ نوید اکرم چیمہ پاکستان ٹیم دے منیجر ہوسن۔ راولپنڈی کیتے شفقت شبیر اتے لاہور کیتے سید نذیر احمد میڈیا منیجر ہوسن۔ کرنل عثمان انواری سیکیورٹی منیجر اتے ڈاکٹر واجد علی رفاعی ٹیم ڈاکٹر مقرر ہن۔