رحیم یار خان: نہر اچ انسانی جاناں دی بھال کرݨ آلا ریسکیور عرفان ساجد شہید تھی ڳئیا، شہریاں دا خراجِ عقیدت

رحیم یار خان۔07 اکتوبر (اے پی پی) واہی جمن شاہ دے نیڑے کار نہر اچ ݙہݨ دے افسوسناک حادثے دی اطلاع تے ریسکیو 1122 دی ٹیم فوری طور تے موقع تے پڄ ڳئی، جتھ نہر دے ݙونگھے تے گندلے پاݨی اچ ڳاݙی تے ایں اچ موجود بندیاں دی بھال جاری ہئی۔ انسانی جاناں کوں بچاوݨ دے عظیم جذبے نال سرشار ریسکیو 1122 رحیم یار خان دے بہادر فائر ڈائیور ریسکیور عرفان ساجد سکوبا ڈائیونگ دا سامان پا تے بے خوفی نال نہر دے پاݨی اچ لہہ تے ݙٻݨ آلیاں دی بھال شروع کیتی۔ پاݨی انتہائی گندا ہووݨ پاروں جݙݨ کچھ نظر نہ آیا تاں عرفان ساجد انڈر واٹر سرچ دا فیصلہ کیتا اتے ایں دوران او کہیں نادیدہ شئے اچ پھنس ڳئے اتے ݙوجھیاں دی زندگی بچاوݨ دی کوشش اچ آپݨی قیمتی جان دا نذرانہ پیش کر ݙتا۔ سکوبا دے اُتے آوݨ تے ساتھی ریسکیورز فوراً آپݨے بہادر ساتھی دی بھال شروع کیتی تے طویل جدوجہد دے بعد شہید ریسکیور دی میت برآمد کر تے شیخ زاید ہسپتال منتقل کر ݙتی۔ عرفان ساجد دی اے عظیم قربانی ریسکیو 1122 دے ایں عزم دی روشن مثال اے جو ݙوجھیاں دی زندگی بچاوݨ کیتے ایں دے جوان آپݨی جان دی پروا کیتے بغیر اخری حد تئیں فرائض انجام ݙیندن۔