وزیر داخلہ محسن نقوی اتے وزیر مملکت طلال چوہدری نال برطانوی وزیرِ مملکت خارجہ امور سٹیفن ڈوٹی دی ملاقات

اسلام آباد۔7 اکتوبر(اے پی پی)وفاقی وزیرِ داخلہ محسن نقوی اتے وزیرِ مملکت طلال چوہدری نال برطانوی وزیرِ مملکت خارجہ امور سٹیفن ڈوٹی ملاقات کیتی، ملاقات اچ پاک برطانیہ تعلقات اتے مشترکہ مفادات دے شعبیاں اچ تعاون ودھاوݨ تے ڳالھ تھئی۔ ملاقات اچ غیر قانونی امیگریشن، انسدادِ منشیات اتے انسدادِ دہشت گردی کیتے تعاون ودھاوݨ تے ڳالھ مہاڑ تھئی، جعلی سٹوڈنٹ ویزاں نال برطانیہ ونڄݨ دا رجحان روکݨ کیتے مشترکہ اتے سخت اقدامات چاوݨ تے زور ݙتا ڳیا۔ ملاقات اچ غیر قانونی سرگرمیاں روکݨ کیتے پاکستان اتے برطانیہ وچال مفاہمتی یادداشت تے دستخط کرݨ تے اتفاق تھئے ڄݙاں جو مشترکہ ورکنگ گروپ دی 90 ݙینھاں دی پیش رفت اتے آئندہ دے لائحہ عمل دا جائزہ وی گھدا ڳیا۔ ملاقات اچ مشرقِ وسطیٰ دی صورتحال تے پاکستان دے مثبت کردار تے وی ڳالھ تھئی، ݙوہائیں رہنماواں خطے اچ کشیدگی اچ کمی کیتے سفارتی کوشساں جاری رکھݨ تے زور ݙتا۔ ملاقات اچ افغانستان نال سرحدی صورتحال سانڳے ڳالھ تھئی۔ وفاقی وزیرِ داخلہ محسن نقوی آکھیا جو جعلی سٹوڈنٹ ویزاں دے ذریعے بیرونِ ملک ونڄݨ والے پاکستانی طالب علماں دے معاملے اچ سخت جانچ پڑتال ضروری اے، اینٹی نارکوٹکس فورس برطانیہ سمگل کیتی ونڄݨ والی 55 میٹرک ٹن منشیات ضبط کیتن۔ برطانوی وزیر سٹیفن ڈوٹی پاکستان اچ آن لائن فراڈ اچ ملوث عناصر دے خلاف بھرپور کارروائیاں دی تعریف کیتی۔ برطانوی ہائی کمشنر جین میریٹ، قونصلر سکیورٹی الاسڈئیر گرانٹ تے سیکرٹری میتھیو میک ماہون وی ایں موقع تے موجود ہن۔