اقوامِ متحدہ دے سیکرٹری جنرل انتونیو گوتریس دی جی ایچ کیو آمد، آرمی چیف نال ملاقات

اسلام آباد۔7 اکتوبر(اے پی پی)اقوامِ متحدہ دے سیکرٹری جنرل انتونیو گوتریس جنرل ہیڈکوارٹرز (جی ایچ کیو) راولپنڈی دا دورہ کیتا اتے چیف آف آرمی سٹاف و چیف آف ڈیفنس فورسز فیلڈ مارشل سید عاصم منیر نال اہم ملاقات کیتی۔ آئی ایس پی آر دے مطابق ملاقات اچ باہمی دلچسپی دے امور، خطے دی موجودہ سکیورٹی صورتحال اتے بین الاقوامی امن و سلامتی کیتے اقوامِ متحدہ دے کردار تے تفصیلی ڳالھ مہاڑ تھئی۔ ݙوہائیں رہنماواں خطے دے مجموعی استحکام، مسئلہ جموں و کشمیر، بھارت ولوں سندھ طاس معاہدے دی معطلی اتے افغانستان دی سرزمین توں اٹھݨ والی دہشت گردی دے چیلنجاں تے الایا۔ ایں موقع تے آرمی چیف عالمی امن و امان کیتے پاکستان دا پختہ عزم دوہریندے اقوامِ متحدہ دے امن مشناں اچ پاک فوج دیاں تاریخی اتے اہم خدمات دا ݙسایا۔ انہاں عالمی سطح تے امن دے قیام، علاقائی استحکام اتے انسانی ہمدردی دے شعبیاں اچ اقوامِ متحدہ دے کردار تے سیکرٹری جنرل انتونیو گوتریس دی قیادت کوں سراہیا۔ یو این سیکرٹری جنرل انتونیو گوتریس دہشتگردی دے خلاف جنگ اتے اقوامِ متحدہ دے امن مشناں اچ پاکستان تے ایں دیاں مسلح افواج دیاں بے مثال قربانیاں تے لازوال خدمات تے زبردست خراجِ تحسین پیش کیتا۔ انہاں بین الاقوامی امن و استحکام کیتے پاکستان دے مسلسل تے فعال کردار دا اعتراف کریندے ہوئیں علاقائی تنازعات دے پرامن حل کیتے پاکستان دیاں سفارتی و عملی کوشساں دی خصوصی تعریف کیتی۔