نائب وزیراعظم اُبھردیاں ٹیکنالوجیز دا غلط استعمال روکݨ، ہتھیاراں دی دروک اتے کشیدگی ودھݨ دے خطرات ڳھٹاوݨ اتے بین الاقوامی قانون دی پاسداری تے زور ݙتے

اسلام آباد۔7 اکتوبر(اے پی پی): نائب وزیراعظم و وزیرِ خارجہ سینیٹر محمد اسحاق ڈار مصنوعی ذہانت اتے ٻیاں اُبھردیاں ٹیکنالوجیز دا غلط استعمال روکݨ، ہتھیاراں دی دروک اتے کشیدگی ودھݨ دے خطرات ڳھٹاوݨ اتے بین الاقوامی قانون دی پاسداری تے زور ݙتے۔ انہاں اے ڳالھ فارن سروسز اکیڈمی اچ خطاب کریندے آکھی۔ نائب وزیراعظم آکھیا جو اقوامِ متحدہ دے امن دستے جنگ بندی برقرار رکھݨ، شہریاں دے تحفظ اتے سیاسی حل کیتے سازگار ماحول ٻݨوݨ اچ ہتھ ونݙیندن، ڄق دے وݙے فوجی دستے ݙیوݨ والے ملکاں اچ پاکستان وی شامل اے جیندے تے ماݨ اے، اساݙے بہادر امن دستیاں دے اہلکاراں اقوامِ متحدہ دے پرچم تلے امن دی خدمت کریندے ہوئیں اپݨیاں جاناں وی وارین۔سینیٹر اسحاق ڈار آکھیا جو پاکستان انسدادِ دہشتگردی کیتے وی اقوامِ متحدہ دے کثیر الجہتی اقدامات اچ بھرپور حصہ ڳھدے، سیکرٹری جنرل انتونیو گوتریس اقوامِ متحدہ دے چارٹر دے دفاع کیتے ثابت قدمی ݙکھائی اے اتے امن دے ودھارے، ماحولیاتی اقدامات کوں متحرک کرݨ اتے کمزور طبقات دے حقوق کیتے مسلسل اتے انتھک کوششاں کیتن، ساݙے کیتے او حقیقی معنے اچ پاکستان دے ہک عظیم دوست ہین۔ نائب وزیراعظم آکھیا جو تنازعات روکݨ اتے ثالثی دے طریقۂ کار کوں مزید مضبوط بݨاوݨا ہوسی، کثیر الجہتی نظام کیتے پاکستان پورے عزم نال کھڑے، ایں مقصد کیتے اقوامِ متحدہ دے چارٹر اتے بین الاقوامی قانون دی مستقل بنیاداں تے پاسداری کیتی ونڄے، ریاستاں دی خودمختاری، برابری، علاقائی سالمیت، عدم مداخلت، طاقت دے استعمال یا ایںدی دھمکی دی ممانعت تے حقِ خودارادیت دا احترام کیتا ونڄݨا چاہیدے، معاہدیاں دے تحت عائد ذمہ داریاں تے سلامتی کونسل دیاں قرارداداں تے عملدرآمد یقینی بݨایا ونڄے، فلسطین دے مسئلے تے جموں و کشمیر دے تنازعے دا منصفانہ تے پرامن حل ایں عزم دے بنیادی امتحانات اچ شامل اے، بین الاقوامی تعلقات اچ سفارت کاری کوں مرکزی حیثیت ݙتی ونڄے۔ انہاں اکھیا جو ایران امریکا ثالثی کیتے پاکستان دیاں کوششاں نال اسلام آباد مفاہمت دی یادداشت تے اتفاق ممکن تھیا، ڄئیں خطے اچ ہک تباہ کن عالمی بحران کوں ٹالݨ اچ مدد ݙتی۔ انہاں آکھیا جو پاکستان اینجھے عالمی نظام کیتے کردار ادا کرݨ کیتے تیار اے جتھاں تنازعات کوں مذاکرات اتے سفارت کاری نال حل کیتا ونڄے اتے انصاف نال امن کوں پائیدار بݨایا ونڄے۔ ایں موقع تے اقوامِ متحدہ دے سیکرٹری جنرل انتونیو گوتریس وی خطاب کیتا۔