اقوامِ متحدہ دے سیکرٹری جنرل انتونیو گوتریس دی وزارتِ داخلہ آمد، وفاقی وزیرِ داخلہ محسن نقوی نال اہم ملاقات

اسلام آباد۔8 اکتوبر (اے پی پی) اقوامِ متحدہ دے سیکرٹری جنرل انتونیو گوتریس وزارتِ داخلہ دا دورہ کیتا، جہاں انہاں وفاقی وزیرِ داخلہ محسن نقوی تے وزیرِ مملکت طلال چوہدری نال ملاقات کیتی۔ وزارتِ داخلہ توں جاری بیان دے مطابق ملاقات دے دوران عالمی تے علاقائی سلامتی دی صورتحال تے اقوامِ متحدہ دے امن مشناں نال تعلق رکھݨ آلے امور تے تفصیلی ڳالھ مہاڑ کیتی ڳئی۔ ایں موقع تے سپیشل سیکرٹری داخلہ، ایڈیشنل سیکرٹری داخلہ تے ٻئے اعلیٰ حکام وی موجود ہن۔ ملاقات دے دوران وفاقی وزیرِ داخلہ محسن نقوی آکھیا جو پاکستان دہشت گردی دے خلاف عالمی جنگ لڑدا پئے۔ انہاں عالمی برادری کوں خبردار کریندیں ہوئیں آکھیا جو ایں وقت افغانستان اچ 25 دہشت گرد تنظیماں سرگرم ہن جیڑھیاں دنیا دے امن کیتے سنگین خطرہ ہن، تے ایں خطرے نال نبڑݨ کیتے دنیا کوں مشترکہ اقدامات کرݨے ہوسن۔ وزیرِ داخلہ واضح کیتا جو پاکستان اقوامِ متحدہ دے امن مشناں اچ آپݨا بھرپور کردار جاری رکھیسی، جتھاں پاکستان پولیس دے افسراں تے اہلکار وی خدمات سرانجام ݙیندے پئن، جݙانجو پاکستان امن دی بحالی کیتے ہݨ تئیں 181 جاناں دا نذرانہ پیش کیتے۔ محسن نقوی قدرتی آفات دے دوران پاکستان دی بھرپور مدد تے سیکرٹری جنرل دا شکریہ وی ادا کیتا۔ اقوامِ متحدہ دے سیکرٹری جنرل انتونیو گوتریس عالمی امن کیتے پاکستان دے کردار کوں سراہندے ہوئیں آکھیا جو اقوامِ متحدہ دے امن مشناں اچ پاکستان دی شرکت ہمیشہ نمایاں تے قابلِ ستائش رہی اے، تے دنیا دے امن کیتے پاکستان دیاں قربانیاں ناقابلِ فراموش ہن۔