اقوامِ متحدہ دے سیکرٹری جنرل انتونیو گوتریس دا پاکستان دا ترائے ݙینھ دا سرکاری دورہ مکمل

اسلام آباد۔8 اکتوبر (اے پی پی) اقوامِ متحدہ دے سیکرٹری جنرل انتونیو گوتریس 6 توں 8 اکتوبر 2026ء تئیں پاکستان دا ترائے ݙینھ دا سرکاری دورہ مکمل کرݨ دے بعد پاکستان توں روانہ تھی ڳئے، سیکرٹری جنرل اقوامِ متحدہ دورے دے دوران پاکستان دی قیادت تے اعلیٰ حکام نال وسیع پیمانے تے ملاقاتاں تے ڳالھ مہاڑ کیتی۔ خمیس کوں ترجمان وزارتِ خارجہ دے دفتر توں جاری بیان دے مطابق اقوامِ متحدہ دے سیکرٹری جنرل انتونیو گوتریس 6 اکتوبر کوں نائب وزیراعظم و وزیرِ خارجہ سینیٹر محمد اسحاق ڈار نال ملاقات کیتی۔ ایں موقع تے نائب وزیراعظم و وزیرِ خارجہ اقوامِ متحدہ دے چارٹر دے مقاصد تے اصولاں، کثیر الجہتی نظام تے مذاکرات تے سفارت کاری دے ذریعے تنازعات دے پرامن حل کیتے پاکستان دے عزم دا اعادہ کیتا۔ انہاں علاقائی امن تے استحکام کیتے پاکستان دیاں جاری سفارتی کوشساں کوں وی اجاگر کیتا۔ نائب وزیراعظم تے وزیرِ خارجہ جموں و کشمیر دے تنازعے دے حوالے نال اقوامِ متحدہ دی سلامتی کونسل دیاں قرارداداں تے کشمیری عوام دیاں امنگاں دے مطابق مسئلہ کشمیر دے منصفانہ تے پرامن حل کیتے پاکستان دے مطالبے دا اعادہ کیتا۔ انہاں سیکرٹری جنرل کوں بھارت ولوں سندھ طاس معاہدے کوں یکطرفہ طور تے معطل رکھݨ دے فیصلے توں وی آگاہ کیتا، جیڑھا بین الاقوامی قانون دی کھلی خلاف ورزی اے۔ نائب وزیراعظم تے وزیرِ خارجہ فلسطینی عوام تے حقِ خودارادیت و ریاست دے حصول کیتے انہاں دی جائز جدوجہد کیتے پاکستان دی غیر متزلزل حمایت دا وی اعادہ کیتا۔ ݙوہائیں رہنماواں افغانستان تے انسدادِ دہشت گردی سمیت علاقائی تے عالمی امن و سلامتی، پائیدار ترقی، موسمیاتی تبدیلی تے کثیر الجہتی نظام دے مستقبل دے حوالے نال وی تبادلۂ خیال کیتا۔ سیکرٹری جنرل 6 اکتوبر کوں صدرِ مملکت آصف علی زرداری نال وی ملاقات کیتی۔ ملاقات دے بعد ایوانِ صدر اچ خصوصی تقریب تھئی جیندے اچ صدرِ مملکت عالمی امن تے ترقی کیتے انہاں دیاں نمایاں بین الاقوامی خدمات تے کردار دے اعتراف اچ سیکرٹری جنرل کوں نشانِ امتیاز عطا کیتا۔ 7 اکتوبر کوں سیکرٹری جنرل وزیراعظم محمد شہباز شریف نال ملاقات کیتی تے علاقائی تے عالمی اہمیت دے امور تے ڳالھ مہاڑ کیتی۔ دورے دے دوران سیکرٹری جنرل چیف آف ڈیفنس فورسز تے چیف آف آرمی سٹاف تے وزیرِ داخلہ و انسدادِ منشیات نال وی ملاقاتاں کیتیاں۔ آپݨی ملاقاتاں دے دوران سیکرٹری جنرل اقوامِ متحدہ کیتے پاکستان دیاں دیرینہ خدمات کوں سراہیا، جنہاں اچ اقوامِ متحدہ دے امن مشناں اچ پاکستان دا اہم کردار تے مکالمے، ثالثی تے بین الاقوامی تعاون دے فروغ کیتے ایں دیاں کوششاں شامل ہن۔ سیکرٹری جنرل اسلام آباد اچ اقوامِ متحدہ دے ملٹری آبزرور گروپ ان انڈیا اینڈ پاکستان (یو این ایم او جی آئی پی) دے ہیڈکوارٹرز دا وی دورہ کیتا تے نیشنل ڈیزاسٹر مینجمنٹ اتھارٹی (این ڈی ایم اے) اچ بریفنگ اچ شرکت کیتی جہاں انہاں کوں آفات نال نپٹݨ دی تیاری تے وقت توں پہلے انتباہی نظام دے شعبیاں اچ پاکستان دی پیشرفت توں آگاہ کیتا ڳیا۔ 7 اکتوبر کوں سیکرٹری جنرل فارن سروس اکیڈمی اچ ’’بدلدی دنیا اچ کثیر الجہتی نظام دا استحکام: جغرافیائی سیاست تے اقوامِ متحدہ دا کردار‘‘ دے موضوع تے خصوصی مذاکرے اچ بطورِ مہمانِ مقرر شرکت کیتی۔ نائب وزیراعظم تے وزیرِ خارجہ استقبالیہ کلمات ادا کیتے۔ آپݨے خطاب اچ سیکرٹری جنرل پاکستان دے نال آپݨی دیرینہ وابستگی دا ذکر کریندیں ہوئیں پاکستانی عوام دی سخاوت، استقامت تے یکجہتی کوں اجاگر کیتا اتے اقوامِ متحدہ کیتے ݙو دہائیاں تے محیط آپݨی خدمات، جنہاں اچ اقوامِ متحدہ دے ہائی کمشنر برائے مہاجرین دی حیثیت نال خدمات وی شامل ہن، دے تجربات دا حوالہ ݙتا۔ اے دورہ اقوامِ متحدہ دے نال پاکستان دی دیرینہ شراکت داری دے اعادے تے علاقائی تے عالمی سطح تے تھیوݨ آلی اہم پیش رفت تے ڳالھ مہاڑ دا ہک اہم موقع ثابت تھیا۔ ایں اقوامِ متحدہ کوں مرکزیت حاصل کثیر الجہتی نظام کیتے پاکستان دی غیر متزلزل حمایت تے اقوامِ متحدہ دے چارٹر دے مقاصد تے اصولاں نال ایں دی مستقل وابستگی کوں وی اجاگر کیتا۔