ڈیجیٹل نیشن پاکستان دا مقصد شہریاں کوں مؤثر تے باسہولت خدمات فراہم کرݨ اے، مستحق طبقے کوں فیول سبسڈی دی فراہمی اچ اداریاں وچال اعداد و شمار دی شراکت کلیدی کردار ادا کیتا، وزیراعظم محمد شہباز شریف

اسلام آباد۔8 اکتوبر (اے پی پی) وزیراعظم محمد شہباز شریف آکھیا جو ڈیجیٹل نیشن پاکستان دا مقصد شہریاں کیتے موثر تے باسہولت خدمات کوں یقینی بݨاوݨ اے، مستحق طبقے کیتے فیول سبسڈی سکیم تے کامیاب عملدرآمد اچ اداریاں وچال اعداد و شمار دی شراکت کلیدی کردار ادا کیتے، ڈیجیٹل نیشن پاکستان دے تحت قومی سطح دا مرکزی ڈیٹا سینٹر حکومتی خدمات تے شہری سہولتاں پڄاوݨ اچ کلیدی کردار ادا کریسی۔ خمیس کوں وزیراعظم آفس دے میڈیا ونگ توں جاری بیان دے مطابق وزیراعظم محمد شہباز شریف دی صدارت وفاقی وزارتاں اچ ڈیجیٹل نیشن پاکستان پروگرام دے نفاذ تے پیشرفت جائزہ اجلاس تھیا۔ وزیراعظم دی صدارت پاکستان ڈیجیٹل نیشن پروگرام دے تحت وفاقی وزارتاں دی کارکردگی، متعلقہ اعداد و شمار دی ڈیجیٹائزیشن تے پیشرفت جائزہ اجلاس تھیا۔ مختلف وفاقی وزارتاں آپݨی عوامی خدمات، کارکردگی تے متعلقہ اعداد و شمار دی مرکزی ڈیٹا سینٹر اچ فراہمی تے بریفنگ ݙتی۔ وفاقی وزارتِ صحت نال متعلقہ اعداد و شمار دی مرکزی ڈیٹا سینٹر اچ فراہمی تے دوائیں دی معیاری تصدیق اچ ڈیجیٹائزیشن دے استعمال تے خصوصی بریفنگ ݙتی ڳئی۔ وزیراعظم ہدایت کیتی جو تمام وفاقی وزارتاں متعلقہ اعداد تے شمار دی قومی ڈیجیٹل پلیٹ فارم تے فراہمی کیتے بروقت ضروری اقدامات مکمل کرن۔ وزیراعظم آکھیا جو ڈیجیٹل نیشن پاکستان دے تحت قومی سطح دا مرکزی ڈیٹا سینٹر حکومتی خدمات تے شہری سہولتاں پڄاوݨ اچ کلیدی کردار ادا کریسی، وفاقی وزارتاں دی ذمہ داریاں، کارکردگی تے متعلقہ ڈیٹا دی مرکزی ڈیٹا سینٹر اچ فراہمی حکومتی نظام کوں عصرِ حاضر نال ہم آہنگ کریسی، ڈیجیٹل نیشن پاکستان دا مقصد درحقیقت قومی سطح تے شہریاں کیتے موثر تے باسہولت خدمات کوں یقینی بݨاوݨ اے۔ وزیراعظم آکھیا جو قومی سطح تے تمام شعبیاں تے حکومتی اداریاں دے کارآمد ڈیٹا دی ہک جگہ فراہمی ملکی معاشی ترقی اچ معاون ثابت تھیندی اے، مستحق طبقے کیتے فیول سبسڈی سکیم تے کامیاب عملدرآمد اچ اداریاں دے مابین اعداد و شمار دی شراکت کلیدی کردار ادا کیتا، وزارتاں دی کارکردگی تے متعلقہ اعداد و شمار دی ڈیجیٹائزیشن دراصل کرپشن تے ادارہ جاتی بدنظمی دے سدِ باب کیتے اہم کردار ادا کریندی اے، قومی سطح تے صوبائی حکومتاں دے تعاون نال یونیورسل میڈیکل ریکارڈ مرتب کرݨ کیتے وزارتِ صحت ولوں قابلِ تعریف اقدامات کیتے ڳئن۔ وزیراعظم آکھیا جو ملک بھر اچ معیاری دوائیں دی فراہمی کوں یقینی بݨاوݨ کیتے کیو آر کوڈ دا نفاذ لائقِ تحسین اے۔ اجلاس کوں ݙسایا ڳیا جو وفاقی وزارتِ انفارمیشن ٹیکنالوجی تمام متعلقہ وزارتاں دے بھرپور تعاون نال متعلقہ شعبہ جاتی ڈیجیٹائزیشن تے بھرپور اقدامات کریندی پئی اے، عوام دی سہولت دے پیشِ نظر بنیادی سہولت دے شعبیاں بالخصوص صحت، زراعت تے ٻیاں وزارتاں اچ ڈیجیٹائزیشن دا عمل ترجیحی بنیاداں تے مکمل کیتا ویندا پئے، وزارتِ انفارمیشن ٹیکنالوجی، وزارتِ قانون دے تعاون نال متعلقہ قومی قوانین دی ہک جگہ فراہمی کیتے خصوصی تے موثر اقدامات چائیندی پئی اے تانجو مستقبل اچ قانون سازی کیتے بہتر رہنمائی مل سڳے۔ وزیراعظم دی ہدایت دے مطابق ترجیحاتی سیکٹرز دی ڈیجیٹائزیشن تے کم جاری اے تے ڈیجیٹل حکومتی خدمات، ڈیجیٹل معیشت تے ڈیجیٹل عوامی سہولت جیہڑے مقاصد دی تکمیل کیتے خصوصی اقدامات کیتے ویندے پئن۔ وزیراعظم تمام وفاقی وزارتاں کوں صوبائی حکومتاں تے متعلقہ اداریاں دے تعاون نال متعلقہ ڈیٹا کوں ڈیجیٹائز کرݨ دے عمل کوں معینہ مدت دے اندر مکمل کرݨ دیاں خصوصی ہدایتاں جاری کیتیاں۔ اجلاس اچ وفاقی وزیرِ قانون اعظم نذیر تارڑ، وفاقی وزیرِ خزانہ محمد اورنگزیب، وفاقی وزیرِ اقتصادی امور احد چیمہ، وفاقی وزیرِ تجارت جام کمال خان، وفاقی وزیرِ اطلاعات تے نشریات عطاء اللہ تارڑ، وفاقی وزیرِ قومی صحت سید مصطفیٰ کمال، وفاقی وزیر برائے انفارمیشن ٹیکنالوجی شزا فاطمہ خواجہ، تے متعلقہ سرکاری اداریاں دے عہدے داراں شرکت کیتی۔