خام تیل دیاں بلند قیمتاں دے باوجود ایں مالی سال دے دوران ملکی معیشت دی شرحِ نمو 4 فیصد توں ودھ رہوݨ دی توقع اے، زرِ مبادلہ دے ذخائر دے استحکام کیتے مجوزہ 10 ارب ڈالر دی سہولت تے امریکہ دے نال مذاکرات جاری ہن: وزیرِ خزانہ دا رائٹرز کوں انٹرویو

اسلام آباد۔12 اکتوبر (اے پی پی) وفاقی وزیرِ خزانہ تے محصولات سینیٹر محمد اورنگزیب آکھیا جو خام تیل دی بلند قیمتاں دے باوجود ایں مالی سال دے دوران پاکستان دی معیشت دی نمو دی شرح 4 فیصد توں ودھ رہوݨ دی توقع اے۔ آئی ایم ایف تے عالمی بینک دے بنکاک اچ تھیوݨ آلے سالانہ اجلاس دے موقع تے سنوار کوں برطانوی خبررساں ایجنسی رائٹرز کوں انٹرویو ݙیندیں ہوئیں وزیرِ خزانہ آکھیا جو پاکستان آپݨی ضرورتاں دے مطابق ایندھن دی وافر مقدار حاصل کرݨ اچ کامیاب رہیے، جئیں پاروں ملک اچ ایندھن دی قلت پیدا نئی تھئی، زراعت جیسے اہم شعبے وی دباؤ دے باوجود بہتر کارکردگی دا مظاہرہ کریندے پئن، میکوں ہݨ وی پورا یقین اے جو اساں 4 فیصد توں ودھ شرحِ نمو حاصل کریسوں۔ وزیرِ خزانہ آکھیا جو مہنگائی دے معاملے تے وی حکومت دی گہری نظر اے کیونجو اجناس دیاں قیمتاں اچ اضافے دے بالواسطہ اثرات مرتب تھیندن۔ وزیرِ خزانہ آکھیا جو پاکستان گزشتہ ہفتے آئی ایم ایف دے نال سٹاف سطح دا معاہدہ کیتے، جیندے توسیعی فنڈ سہولت تے موسمیاتی پروگرام دے تحت تقریباً 1.21 ارب ڈالر دی مالی معاونت دی راہ ہموار تھی سڳدی اے۔ وزیرِ خزانہ آکھیا جو پاکستان زرِ مبادلہ دے ذخائر دے استحکام کیتے مجوزہ 10 ارب ڈالر دی سہولت کیتے امریکہ دے نال مذاکرات وی جاری رکھے ہوئے ۔ انہاں آکھیا جو اگر اے سہولت حاصل تھی ویندی اے تاں اے اساݙے کیتے بہوں وݙی مدد ثابت ہوسی۔ انہاں آکھیا جو اگر اے سہولت حاصل نہ وی تھئی تاں ایں توں پاکستان دی عالمی مالیاتی منڈیاں تئیں رسائی متاثر نہ ہوسی اتے نہ ایں حوالے نال کوئی مسئلہ پیدا تھیسی۔