اسلامیہ یونیورسٹی بہاولپور اچ حب الوطنی تے قوم پرستی دے موضوع تے سیمینار

اسلام آباد۔12 اکتوبر (اے پی پی) اسلامیہ یونیورسٹی بہاولپور اچ حب الوطنی تے قوم پرستی دے موضوع تے شعبہ امورِ طلبہ تے کریکٹر بلڈنگ سوسائٹی دے زیراہتمام سیمینار دا انعقاد تھیا۔ جیندے اچ معروف پارلیمنٹرین تے سینئر کالم نگار سید تابش الوری، اسسٹنٹ پروفیسر میڈیا سٹڈیز ڈیپارٹمنٹ آئی یو بی ڈاکٹر سید اویس حسن گیلانی، مشیر آئی یو بی کریکٹر بلڈنگ سوسائٹی پروفیسر ڈاکٹر ضیاء الرحمن، ڈاکٹر سعد اسلم تے ٻیاں آپݨے خیالات دا اظہار کیتا۔ ڈاکٹر سید اویس حسن گیلانی آکھیا جو اساں اوں ویلھے تئیں محبِ وطن نھیں بݨ سڳدے جݙݨ تئیں اساں آپݨے ذاتی مفاداں دے خول توں ٻاہر نئی نکلدے۔ اساکوں صرف آپݨے کیتے نئی بلکہ ملک تے پوری قوم کیتے سوچݨا ہوسی۔ اساکوں ملک دے اندر رہ تے نوکریاں دے پچھوں بھڄݨ دی بجائے بزنس تے انڈسٹری کوں پروموٹ کرݨا ہوسی۔ سوشل میڈیا دے استعمال دے حوالے نال انہاں آکھیا جو اساں میسج لکھدے ہوئے وی سوچݨا اے جو جیڑھے الفاظ لکھدے پپئیوں او اساکوں جوڑ سڳدن یا توڑݨ دا سبب بݨسن۔ اے نہ سوچو جو ملک اساکوں کیا ݙتے بلکہ اے سوچو جو اساں ملک کیتے کیا کیتے۔ حب الوطنی اساکوں پاکستان دی حفاظت تے پیار دا درس ݙیندی اے، اے 25 کروڑ لوکاں دا ملک اے، تمام لوکاں دے نظریات ہکو سویں نئی تھی سڳدے، اختلاف دے باوجود ہک ٻئے کوں قبول کرݨا ای حب الوطنی اے۔ معروف پارلیمنٹرین سید تابش الوری آکھیا جو برصغیر اچ اساݙی مسلمان قوم متحدہ تھی تے انگریز سامراج تے ہندو رام راج کوں شکستِ فاش ݙتی، 20ویں صدی دے ساریاں توں وݙے سیاسی معجزے دے طور تے ظہور تھیا جینکوں پوری دنیا پاکستان دے ناں نال جاندی اے۔ پاکستان عالمِ اسلام دا مضبوط قلعہ اے، پاکستان دنیا دی ستویں جوہری طاقت اے۔ دنیا اچ اساݙیاں افواج کوں انفرادی حیثیت حاصل اے، دنیا جاندی اے جو اساݙیاں افواج تربیت یافتہ، مسلح، منظم تے جدید عسکری ٹیکنالوجی نال آراستہ ہن جنہاں 6 گنا وݙی عسکری طاقت کوں 2025ء اچ ناکوں چنے چبوائے، لیکن افسوس جو قائد اعظم محمد علی جناح تے شہیدانِ پاکستان دی روحاں دے سامنے اساں شرمسار ہن جو انہاں اساکوں دنیا دی ساریاں توں وݙی اسلامی مملکت بخشی، اساں ایں کوں ݙو لخت کر ݙتا۔ انہاں اساکوں ہک منظم قوم بݨایا، اساں قومیت تے علاقائی نعرے لیندے پئیوں۔ تاریخ فیصلے کریندی اے تے وقت حکم صادر کریندے، وقت تیزی نال اگاں ودھدا پیا اے، اساکوں ایں توں پہلے آپت اچ اتحاد، محبت تے جذبۂ حب الوطنی پیدا کرݨا ہوسی، کہیں اے نہ تھیوے جو وقت اساݙے خلاف فیصلہ صادر کر ݙیوے۔ایں سیمینار اچ کثیر تعداد اچ اساتذہ تے طلباء تے طالبات شرکت کیتی۔