وزیرِ خزانہ دی موڈیز دے وفد نال ملاقات، پاکستان دی کریڈٹ ریٹنگ اچ ٻئی بہتری دے امکانات تے ڳالھ مہاڑ

بنکاک۔15 اکتوبر (اے پی پی) وفاقی وزیرِ خزانہ تے محصولات سینیٹر محمد اورنگزیب پاکستان دی کریڈٹ ریٹنگ اچ ٻئی بہتری، معاشی اشارییاں اچ پیشرفت تے عالمی سرمایہ منڈیاں تئیں رسائی دے امکانات تے موڈیز دے نمائندیاں نال ڳالھ مہاڑ کیتی۔ وزیرِ خزانہ تھائی لینڈ دے دارالحکومت بنکاک اچ ورلڈ بینک گروپ تے آئی ایم ایف دے سالانہ اجلاساں دے موقع تے موڈیز دے نمائندیاں نال ملاقات کیتی، جیندے اچ پاکستان دے معاشی منظرنامے تے خودمختار کریڈٹ پروفائل دا جائزہ گھدا ڳیا۔ ملاقات دے دوران پاکستان دی کریڈٹ ریٹنگ اچ حالیہ بہتری، مالیاتی تے بیرونی شعبے دے اشارییاں اچ پیشرفت تے عالمی کیپٹل مارکیٹس تئیں ولا رسائی دے معاملیاں تے بحث تھئی۔ وزیرِ خزانہ آکھیا جو حکومت بیرونی قرضیاں دے مجموعی حجم اچ اضافہ کیتے بغیر مہانگے تے قلیل مدتی قرضیاں دی ڄاہ طویل مدتی مالی وسائل حاصل کرݨ کیتے کوشاں اے۔ پاکستانی وفد زرِ مبادلہ دے ذخائر اچ اضافے، جاری کھاتے دے خسارے کوں محدود رکھݨ تے سٹیٹ بینک دی فارورڈ واجبات اچ ڳھٹکی کوں معاشی استحکام دے حوالے نال اہم پیشرفت قرار ݙتا۔ محمد اورنگزیب آئی ایم ایف پروگرام دے بعد وی ڈھانچہ جاتی اصلاحات دا عمل جاری رکھݨ تے برآمدات تے مبنی پائیدار معاشی ترقی کیتے حکومت دے عزم دا اعادہ کیتا۔ وزیرِ خزانہ موڈیز دے نمائندیاں نال پاکستان دی کریڈٹ ریٹنگ اچ ٻئی بہتری دے امکانات تے وی آرا طلب کیتیاں تے زور ݙتا جو درجہ بندی دے جائزے اچ سیاسی تے جغرافیائی خطراں دے نال معاشی کارکردگی تے بنیادی معاشی اشاریاں کوں وی مناسب اہمیت ݙتی ون٘ڄے۔