وزیرِ خزانہ محمد اورنگزیب دی امریکی محکمۂ خزانہ دی انڈر سیکرٹری نال ملاقات، معاشی اصلاحات تے بیرونی مالی معاونت تے ڳالھ مہاڑ

بنکاک۔16 اکتوبر (اے پی پی) وفاقی وزیرِ خزانہ تے محصولات سینیٹر محمد اورنگزیب امریکی محکمۂ خزانہ دی انڈر سیکریٹری برائے بین الاقوامی امور ایرن بران نال ملاقات کیتی تے پاکستان دے معاشی منظرنامے، اصلاحات، بیرونی مالی معاونت تے برآمدات تے مبنی ترقی دے اقدامات تے ڳالھ مہاڑ کیتی۔ بنکاک اچ عالمی بینک گروپ تے آئی ایم ایف دے سالانہ اجلاساں دے موقع تے تھیوݨ آلی ایں ملاقات اچ گورنر سٹیٹ بینک آف پاکستان جمیل احمد وی موجود ہن۔ ملاقات دے دوران وزیرِ خزانہ ستمبر اچ پاکستان ولوں 3 ارب ڈالر دے یورو بانڈ دے اجراء تے سکوک، پانڈا بانڈز سمیت ٻیاں مالیاتی ذرائع دے ذریعے وسائل حاصل کرݨ اچ تنوع پیدا کرݨ دے منصوبیاں دا ݙسیا۔ انہاں آئی ایم ایف پروگرام دے تحت پیشرفت، ٹیکس اصلاحات، مسلسل ترائے سال بنیادی مالیاتی سرپلس دے حصول تے زرِ مبادلہ دے ذخائر ودھ تے تقریباً 21.6 ارب ڈالر تئیں پڄݨ بارے وی ݙسایا۔ انہاں آکھیا جو پاکستان برآمدات تے مبنی ترقی، آئی ٹی برآمدات اچ اضافے تے عالمی منڈیاں اچ پاکستانی مصنوعات دی مسابقت بہتر بݨاوݨ تے توجہ ݙیندا پئے۔ انہاں ایں سلسلے اچ قرضیاں دی پائیداری کوں وی اہم قرار ݙتا تانجو ملک دی خودمختار کریڈٹ ریٹنگ کوں ڈبل بی درجے تئیں گھن ون٘ڄݨ دی پیشرفت کیتی ون٘ڄ سڳے۔ ملاقات اچ علاقائی تنازعے دے توانائی، مہنگائی تے غذائی تحفظ تے اثرات، رسد دے تسلسل تے موسمِ سرما اچ توانائی دی طلب پوری کرݨ دیاں تیاریاں تے وی ڳالھ مہاڑ کیتی ڳئی۔ وزیرِ خزانہ نجکاری، ہوائی اڈیاں دے انتظامی امور آؤٹ سورس کرݨ، بوئنگ نال رابطیاں تے امریکی ایکسپورٹ امپورٹ بینک توں ممکنہ مالی معاونت دے معاملیاں تے وی ڳالھ مہاڑ کیتی۔ انہاں پاکستان دے نال امریکہ دے مسلسل تعاون تے اظہارِ تشکر کیتا۔