اسلامی ملکاں دے وزرائے خارجہ دی کولمبیا دی طرفوں بیت المقدس اچ سفارت خانہ کھولݨ دی مذمت

اسلام آباد۔16 اکتوبر(اے پی پی) پاکستان، مصر، فلسطین، ترکیہ، جبوتی، لبنان، لیبیا، یمن، قطر، اردن، وفاقی صومالیہ، ملائیشیا، انڈونیشیا، سعودی عرب، کویت، الجزائر، عمان، شام تے سوڈان دے وزرائے خارجہ جمہوریہ کولمبیا دی طرفوں بیت المقدس اچ سفارت خانہ کھولݨ دی شدید مذمت کریندے ایں اقدام کوں ݙوٹوک الفاظ اچ مسترد کر ݙتے تے آکھیے جو اے اقدام اقوامِ متحدہ دی سلامتی کونسل دیاں متعلقہ قرارداداں دے منافی تے ݙو ریاستی حل دی بنیاد تے منصفانہ تے پائیدار امن دے قیام کیتے جاری بین الاقوامی کوششاں کیتے نقصان دہ اے۔ وزارتِ خارجہ توں جاری اعلامیہ موجب اسلامی ملکاں دے وزرائے خارجہ ایں ڳالھ دی توثیق کیتی جو مقبوضہ بیت المقدس دی قانونی یا تاریخی حیثیت کوں تبدیل کرݨ یا ایں کوں اسرائیل دا دارالحکومت تسلیم کرݨ کیتے کیتا ونڄݨ آلا کوئی وی اقدام یا فیصلہ غلط اے تے ایں دی کوئی قانونی حیثیت کائںی ۔ اے موقف اقوامِ متحدہ دی سلامتی کونسل تے جنرل اسمبلی دیاں متعلقہ قرارداداں بالخصوص سلامتی کونسل دیاں قرارداداں 476 (1980) تے 478 (1980) دے عین موجب اے جنہاں اچ بیت المقدس دے تشخص یا حیثیت کوں تبدیل کرݨ دیاں کوششاں کوں مسترد کیتا ڳئے تے رکن ملکاں توں مطالبہ کیتا ڳئے جو او ایں شہر توں اپݨے سفارتی مشنز واپس ولواون کیوں جو بیت المقدس فلسطینی علاقے دا حصہ اے جیندے تے 1967ء اچ قبضہ کیتا ڳیا ہئی۔اسلامی ملکاں دے وزرائے خارجہ کولمبیا دی حکومت تے زور ݙتے جو او اپݨے فیصلے تے نظرِ ثانی کرے تے ایں کوں واپس گھنے، بین الاقوامی قانون دے تحت اپݨی ذمہ واریاں دی پاسداری کرے تے ایجھے اقدامات توں گریز کرے جنہاں نال فلسطینی عوام دے جائز حقوق بشمول مشرقی بیت المقدس کوں دارالحکومت بݨاوݨ دے نال ہک آزاد تے خودمختار فلسطینی ریاست دے قیام دا حق متاثر تھیندا ہووے۔