نیویارک ۔ 17 دسمبر (اے پی پی) انسانی حقوق دی عالمی تنظیم ہیومن رائٹس واچ عراقی حکومت تے زور ڈتے جو او گزریل کئی ہفتے توں جاری پرتشدد احتجاج دے دوران مظاہرین دیاں ہلاکتاں دی اصل تعداد سامنڑے گھن آوے ۔العربیہ ٹی وی دے مطابق انسانی حقوق دی عالمی تنظیم آکھیے جو عراق دی ہک مسلح فورس جیں کون بظاہر عراق دی مقامی نیشنل سکیورٹی فورسز دا تعاون حاصل ہئی 6 دسمبر کوں بغداد اچ تھیونڑ آلے مظاہرے دے دوران مظاہرین دے خلاف طاقت دا وحشیانہ استعمال کیتا ہئی جیں دے نتیجے اچ وڈی تعداد اچ مظاہرین ہلاک تے زخمی تھی گے ہن ۔ انسانی حقوق دی تنظیم آکھیے جو صرف 6دسمبر دے موقع تے ہلاکتاں دی تعداد 29توں 80دے درمیان ڈسائی ویندی اے طاقت دے استعمال نال 137مظاہرین زخمی تھی گے ہن ۔ مظاہرین دے خلاف کریک ڈاﺅں اتے طاقت دے استعمال دے وقت علاقے اچ بجلی وی بند کرڈتی گی ہئی ۔ اے واضح نی تھی سگیا جو ایں موقع تے کتنے بندے ہلاک یا بحفاظت فرار تھئے ہن ۔انسانی حقوق دی عالمی تنظیم آکھیے جو پولیس اتے سکیورٹی فورسز ایں وقت غائب تھی گئی جڈاں ہک نامعلوم ملیشیامظاہرین دے خلاف کارروائی شروع کیتی، ایں واقعے دی ساری ذمے واری عراقی حکومت تے لگدی اے جیرھے جو مظاہرین کوں تحفظ ڈیونڑ اچ ناکام رہی اے ۔
