نیویارک ۔ 19 دسمبر (اے پی پی) اقوام متحدہ دے مشرقِ وسطی کیتے خصوصی ایلچی نیکولے میلادینوف آکھیے جو اسرائیل دریائے اردن دے مغربی کنارے دے علاقے اتے مقبوضہ بیت المقدس اچ یہودی آبادکاراں کیتے22 ہزار مکان بنڑیندا پئے۔ نیکولے میلادینوف اقوام متحدہ دی سلامتی کونسل اچ ڈسائے جو دسمبر 2016ءاچ قرارداد دی منظوری دے بعد جیں اچ اے آکھیا گیا ہئی جو فلسطینی علاقیں اچ تعمیر کیتی ونجنڑ آلیاں اسرائیل دیاں ساریاں یہودی وستیاں دا کوئی قانونی جواز کائنی ،اسرائیل مزید تقریباً8ہزار مکاناں دی تعمیر کیتے ٹینڈر جاری کیتن ۔انھاں آکھیے جو اے تعداد انہاں سارے ملکاں تے لوکاں کیتے ودھ ساری تشویش دا باعث ہوونڑیں چاہیدی اے ، جیرھے اسرائیل دے نال ہک آزاد اتے قابل عمل فلسطینی ریاست دے قیام دی حمایت جاری رکھی پن ۔اقوام متحدہ دے سیکرٹری جنرل وی سلامتی کونسل اچ غربِ اردن اچ اسرائیل دی یہودی آبادکاراں کیتے وستیاں بارے ہک رپورٹ پیش کیتی اے ایندے اچ آکھیا گے جو انہاں وستیاں دا کوئی قانونی جواز کائنی ۔ انہاں آکھیے جو انہاں وستیاں دی تعمیر تے منظوری دا عمل وختی روکنڑاں چاہیدے ۔
