بیروت ۔ 20 دسمبر (اے پی پی) لبنان دے صدر میشل عون سابق وزیرتعلیم حسان دیاب کوں ملک دا نواں وزیراعظم نامزدکرڈتے تے انہاں کوں نویں حکومت بنڑاونڑ دی دعوت ڈتی اے ۔لبنان دے ایوان صدر بیروت اچ ہک بیان اچ آکھیے جو صدر لازمی پارلیمانی مشاورت دے بعد حسان دیاب کوں وزیراعظم نامزد کرتے نویں حکومت بنڑاونڑ دی ذمے واری ڈتی اے ِ ایندے توں پہلے لبنانی پارلیمان دے ڈپٹی سپیکر ایلی الفرزلی ہک بیان اچ آکھیا ہئی جو انہاں سابق وزیر تعلیم حسان دیاب کوں وزیراعظم نامزد کیتے۔ڈپٹی سپیکر شیعہ ملیشیا حزب اللہ دے اتحادی ہن۔انہاں دا اعلان ایں گال دی وی مظہر اے جو حزب اللہ اتے ایندے اتحادی حسان دیاب دی نامزدگی توں متفق ہن۔واضح رہے جو لبنانی صدر گزریل ڈینھ پارلیمان دے 128 ارکان توں نویں وزیراعظم دی نامزدگی بارے اچ مشاورت کیتی اے تے انہاں توں نویں وزیراعظم دے انتخاب دے بارے صلاح منگی اے ۔ لبنان اچ فرقہ وار بنیاد تے مروج نظام حکومت دے تحت وزیراعظم دا منصب سنی مسلماناں کیتے مختص اے۔ پارلیمان دا سپیکر شیعہ ہوندے تے صدر مسیحی اقلیت نال تعلق رکھیندے ۔
